MİLLLİ MƏCLİSLƏ MEKSİKA SENATI ARASINDA ƏMƏKDAŞLIQ GENİŞLƏNİR
Yanvarın 13-də Milli Məclisin Beynəlxalq münasibətlər və parlamentlərarası əlaqələr komitəsi üzvlərinin ölkəmizdə səfərdə olan Meksika Senatı Xarici əlaqələr komitəsinin üzvləri ilə görüşü oldu.
Qonaqları salamlayan komitə sədri Səməd Seyidov onlara parlamentdə qəbul edilən sənədlər, qanun yaradıcılığı prosesi, rəhbərlik etdiyi komitənin fəaliyyəti barədə ətraflı məlumat verdi. Bildirildi ki, Azərbaycanın Latın Amerikası ölkələri, o cümlədən Meksika ilə əlaqələri yaxşı səviyyədədir və bu münasibətlərin daha da inkişaf etdirilməsi üçün xalqlarımız bir-birinə dəstək göstərməlidirlər. Qeyd olundu ki, hər iki ölkədə mədəniyyət, iqtisadiyyat, səhiyyə, təhsil sahələrində əməkdaşlığın inkişafı üçün geniş potensial var. Sonra komitə sədri xalqlarımız arasında oxşar mədəniyyətlər, Azərbaycan cəmiyyətində qadınların rolu, ölkəmizdə gender bərabərliyi prinsiplərinin qorunması barədə geniş söhbət açdı.
Görüşdə komitə sədrinin müavini Sevinc Fətəliyeva və deputat Asim Mollazadə çıxış edərək paytaxt Mexikoda Xocalı faciəsi qurbanlarının xatirəsinə ucaldılan abidənin Meksika hökuməti tərəfindən xalqımıza, ölkələrimiz arasındakı dostluğa verilən yüksək qiymət kimi dəyərləndirdilər.
Meksika Senatı Xarici əlaqələr komitəsinin sədri, senator Qabriela Kuevas Barron səmimi görüş və ətraflı məlumat üçün minnətdarlığını bildirdi. Qonaq Meksika ilə Azərbaycan arasında dostluğun hər zaman davam etdirilməsi üçün əllərindən gələni əsirgəməyəcəklərini vurğuladı. Xanım senator qeyd etdi ki, Şərqin bu gözəl ölkəsi onlar üçün hər zaman maraqlı olub və birgə əməkdaşlığımız hələ bir çox mötəbər qələbələrə yol açacaq.
Söhbətdə qarşılıqlı maraq doğuran məsələlər ətrafında fikir mübadiləsi aparıldı.
Görüşün sonunda Milli Məclisin Beynəlxalq münasibətlər və parlamentlərarası əlaqələr komitəsi ilə Meksika Senatı Xarici Əlaqələr komitəsi arasında əməkdaşlıq və parlamentlərarası dialoq haqqında anlaşma memorandumu imzalandı.
Milli Məclisin
Mətbuat xidməti