Mayın 20-də Milli Məclis sədrinin birinci müavini, Parlamentin Təhlükəsizlik və müdafiə komitəsinin sədri Ziyafət Əsgərovun ölkəmizdə səfərdə olan Avropa Şurası Parlament Assambleyasının  Üzv  dövlətlər  tərəfindən öhdəliklərin yerinə yetirilməsi  üzrə komitəsinin  (Monitorinq komitəsi) həmməruzəçiləri  Pedro Aqramunt  və Cozef Debano Qrexlə görüşü oldu.
Ziyafət Əsgərov bildirdi ki, Azərbaycan Avropa Şurası ilə sıx əməkdaşlıq edir və ölkəmizin bu qurumun Nazirlər Komitəsinə sədrlik etməsi məsuliyyətimizi daha da artıracaq. Bildirdi ki, Azərbaycan Avropa Şurasının əsas dəyərləri olan qanunun aliliyi və hakimiyyət bölgüsü prinsiplərinə həmişə üstünlük verir. Vitse-spiker ölkəmizin üzərinə götürdüyü öhdəlikləri yerinə yetirməsindən danışdı.
Söhbət zamanı Ukraynada baş verən hadisələr, siyasi məhbus anlayışının müəyyən olunması və digər mövzularda fikir mübadiləsi aparıldı.
Sonra Avropa Şurası Parlament Assambleyasının Monitorinq komitəsinin həmməruzəçisi Pedro Aqramunt qarşılıqlı əməkdaşlığın perspektivləri ilə bağlı fikirlərini bölüşdü.

Milli Məclisin
Mətbuat xidməti