ATƏT-İN BAKI OFİSİNİN NÜMAYƏNDƏSİ MİLLİ MƏCLİSDƏ OLDU
İyunun 19-da Milli Məclis Sədrinin müavini Bahar Muradovanın ATƏT-in Bakıdakı layihə koordinatoru Ələsgər Şaxtaxtinski ilə görüşü oldu.
Qonağı salamlayan Bahar Muradova ona fəaliyyətində uğurlar arzuladı, əslən azərbaycanlı olan bir insan kimi onun ATƏT-Azərbaycan əməkdaşlığına layiqli töhfələr verəcəyinə inandığını bildirdi. Vitse-spiker sonra qonağa Milli Məclisin fəaliyyəti, qanun yaradıcılığı prosesi barədə məlumat verdi. ATƏT-lə münasibətlərin inkişafı barədə danışan Bahar Muradova qurumda ölkəmizlə bağlı konkret layihələrin hazırlanmasından məmnunluğunu ifadə etdi, yeni layihələrdə parlament üzvlərinin həvəslə iştirak edəcəyini vurğuladı. Azərbaycan ATƏT-in bərabərhüquqlu üzvü olmaqla yanaşı təşkilatın dəyərlərinin regionda bərqərar olmasının ən fəal təbliğatçısıdır. Qeyd etdi ki, bir neçə gündən sonra Azərbaycan qurumla bağlı böyük bir tədbirə - ATƏT Parlament Assambleyasının 23-cü illik sessiyasına ev sahibliyi edəcək. Toplantıya hazırlıqlarla bağlı geniş məlumat verən Milli Məclis Sədrinin müavini qeyd etdi ki, sessiyaya böyük maraq var, artıq quruma üzv olan ölkələrdən 370-dən artıq parlamentari qeydiyyatdan keçib. Bahar Muradova qurumun Bakıda keçiriləcək sessiyasının açılış mərasimində ölkə Prezidenti İlham Əliyev və ATƏT-in fəaliyyətdə olan sədri Didye Burkhalterin iştirak edəcəyini diqqətə çatdırdı.
ATƏT-in Bakıdakı layihə koordinatoru Ələsgər Şaxtaxtinski Azərbaycanın qurumdakı fəaliyyətini yüksək qiymətləndirdi, ölkədə müşahidə etdiyi demokratik inkişafdan və iqtisadi yüksəlişdən məmnun olduğunu bildirdi. O, ATƏT PA-nın 23-cü sessiyasının Bakıda keçirilməsinin təşkilatdakı fəaliyyətində uğurlu bir başlanğıc olduğunu dedi. Qonaq Milli Məclisin ATƏT-in Bakı ofisi ilə sıx əlaqələrinin mövcud olduğunu və bundan sonra bu əlaqələrin daha da intensivləşməsi üçün əlindən gələni əsirgəməyəcəyini diqqətə çatdırdı. Sonra o, təşkilatda həyata keçirilməsi planlaşdırılan yeni layihələrdən söhbət açdı.
Görüşdə qarşılıqlı maraq doğuran digər məsələlər müzakirə olundu.
Milli Məclisin
Mətbuat xidməti