İSPANİYA - AZƏRBAYCAN PARLAMENTLƏRARASI DOSTLUQ QRUPUNUN RƏHBƏRİ MİLLİ MƏCLİSDƏ
Oktyabrın 2-də Milli Məclisin Azərbaycan-İspaniya parlamentlərarası əlaqələr üzrə işçi qrupunun rəhbəri Fəzail Ağamalı İspaniya parlamentinin Azərbaycanla dostluq qrupunun rəhbəri Xose Maria Çikio ilə görüşdü.
Qonağı səmimi salamlayan Fəzail Ağamalı onun cari ilin fevral ayında Azərbaycan parlamentində olduğunu, həmin vaxt keçirilən görüşləri xatırladı. Bildirildi ki, belə qarşılıqlı səfərlərin intensivləşməsi gələcək əlaqələrin inkişafında önəmli rol oynayır. Millət vəkili Azərbaycan parlament nümayəndə heyətinin də yaxın zamanda dost ölkəyə səfərinin reallaşaçağına ümidvar olduğunu qeyd etdi. Sonra o, qonağa Azərbaycan parlamentində qəbul edilən yeni qanun layihələri, ölkədə həyata keçirilən iqtisadi islahatlar barədə məlumat verdi.
Yüksək qonaqpərvərlik üçün təşəkkürünü bildirən İspaniya parlamentinin Azərbaycanla dostluq qrupunun rəhbəri Xose Maria Çikio Bakıya Dördüncü Beynəlxalq Humanitar Forumda iştirak etmək üçün gəldiyini söylədi. Qonaq dedi: “Azərbaycanı yenidən görmək və buradakı dostlarımla görüşmək mənə çox xoş təsir bağışladı. Bura mənim üçün qardaşlıq diyarıdır. Bakıda özümü qətiyyən yad yerdə hiss etmirəm. Azərbaycanda artıq İspaniya səfirliyi açılıb. Bu hadisə ölkələrarası əlaqələrin inkişafına böyük töhfə olacaq.” O, sonra Forumun işindən danışaraq bildirdi ki, Azərbaycan Prezidenti İlham Əliyev tədbirdə çıxış edərək Ermənistan-Azərbaycan, Dağlıq Qarabağ münaqişəsi barədə geniş məlumat verdi. Həqiqətən də bu problem Azərbaycan xalqının böyük ağrısıdır. Həm İspaniya hökuməti, həm də parlamenti bu məsələdə Azərbaycanın haqlı mövqeyini dəstəkləyir. Ümid edirəm ki, bu problem tezliklə ədalətli həllini tapacaq və bir milyondan artıq qaçqın və məcburi köçkün öz yurd-yuvasına qayıdacaq. Çalışmaq lazımdır ki, Birləşmiş Millətlər Təşkilatının və digər beynəlxalq təşkilatların Dağlıq Qarabağla bağlı qəbul etdikləri qətnamələr kağız üzərində qalmasın.
Görüşdə Azərbaycan-İspaniya əlaqələrinin inkişaf perspektivləri barədə geniş fikir mübadiləsi aparıldı.
Milli Məclisin
Mətbuat xidməti