Valeh ƏLƏSGƏROV: “AZƏRBAYCANIN ABŞ-la ƏMƏKDAŞLIĞI YÜKSƏK SƏVİYYƏDƏDİR”
Oktyabrın 3-də Milli Məclis Sədrinin müavini Valeh Ələsgərov ABŞ-ın Los-Anceles şəhərinin sabiq meri Antonio Ramon Viyarayqosanla görüşdü.
Qonağı səmimi salamlayan vitse-spiker Azərbaycanla ABŞ arasında mövcud əməkdaşlığın yüksək səviyyədə olduğunu dedi. Bildirildi ki, ölkələrimiz Amerika ilə enerji sahəsində əməkdaşlığın inkişafına, xüsusilə də neft-qaz yataqlarının birgə işlənilməsi prosesinə xüsusi önəm verir. Azərbaycan iqtisadi cəhətdən regionun aparıcı dövlətidir. Ölkə iqtisadiyyatı Cənubi Qafqaz iqtisadiyyatının 70 faizdən çoxunu təşkil edir. Bu bölgədə elə bir qlobal layihə yoxdur ki, Azərbaycanın orada iştirakı olmasın. Bakı–Tbilisi–Ceyhan əsas ixrac neft boru kəmərinin reallaşdırılmasında ABŞ-ın böyük dəstəyi olduğunu deyən Valeh Ələsgərov bir milyon barrel ötürücülük qabiliyyəti olan bu kəmərin 2006-cı ildən fəaliyyətə başladığını vurğuladı. Qeyd olundu ki, artıq bu kəmər Qazaxıstanın və Türkmənistanın da neftini nəql edir.
Milli Məclis Sədrinin müavini daha sonra bildirdi ki, ötən ayın 20-də Bakıda “Cənub” qaz dəhlizinin təməli qoyuldu ki, bununla da ölkəmiz Avropanın enerji təhlükəsizliyinin təmin edilməsində mühüm rol oynayacağını bir daha bəyan etmiş oldu. Valeh Ələsgərov Azərbaycanın təşəbbüskarı və fəal iştirakçısı olduğu TAP və TANAP layihələrindən, gələn il istifadəyə veriləcək Bakı-Tbilisi-Qars dəmir yolu xəttinin çəkilişi prosesindən söhbət açdı.
Valeh Ələsgərov Ermənistanın işğalçılıq siyasəti nəticəsində yaranmış Dağlıq Qarabağ münaqişəsi, təcavüzkar dövlətin bu problemin həlli ilə bağlı beynəlxalq qurumların qəbul etdikləri sənədlərə məhəl qoymaması barədə də qonağa ətraflı məlumat verdi.
IV Bakı Beynəlxalq Humanitar Forumuna dəvət olunduğuna görə təşəkkürünü bildirən ABŞ-ın Los-Anceles şəhərinin sabiq meri Antonio Roman Viyarayqosa xəritədə kiçik olmasına baxmayaraq Azərbaycanın böyük ölkələrin həyata keçirə bilmədiyi layihələri reallaşdırdığını dedi. Qeyd olundu ki, bu gün Azərbaycan Avropaya neft ixracatında mühüm rol oynayır. Forumda müzakirə olunan məsələlərin dünyanı düşündürən aktual problemlər olduğunu deyən qonaq Azərbaycanın mövqeyini, ölkə Prezidentinin tədbirdəki çıxışını yüksək qiymətləndirdi.
Görüşdə Azərbaycan-ABŞ əlaqələrinin gələcək inkişaf perspektivləri, beynəlxalq terrorizmlə mübarizə, narkoticarətin qarşısının alınması və digər məsələlər barədə geniş fikir mübadiləsi aparılıb.
Milli Məclisin
Mətbuat xidməti