FAN TRUNG Lİ: “Azərbaycan mənim üçün çox doğma bir yerdir”
Oktyabrın 9-da Milli Məclisin Azərbaycan-Vyetnam parlamentlərarası əlaqələr üzrə işçi qrupu üzvlərinin Vyetnam Milli Assambleyasının daimi komitəsinin üzvü, Vyetnam parlamentinin Hüquq komitəsinin sədri Fan Trung Linin başçılıq etdiyi nümayəndə heyəti ilə görüşü oldu.
Qonaqları salamlayan işçi qrupun rəhbəri, millət vəkili Novruzəli Aslanov qeyd etdi ki, Azərbaycan və Vyetnam xalqları arasında daim səmimi bir dostluq mövcud olub, ikitərəfli əməkdaşlıq dinamik şəkildə inkişaf edir. Ölkələrimiz arasında indiyədək 6 vacib sənəd imzalanıb, 10-a yaxın əhəmiyyətli sənəd isə imzalanmağa hazırlanır. Münasibətlərimizin inkişafında dövlət başçılarımızın rolunu vurğulayan işçi qrupun rəhbəri qonaqlara parlamentin fəaliyyəti, qəbul edilən yeni qanun layihələri haqqında da ətraflı məlumat verdi. Bildirildi ki, öz müstəqilliyinə yenidən qovuşduqdan sonra Azərbaycan hüquqi və demokratik inkişaf yolu seçib. Bu gün ölkəmizdə təkcə iqtisadi sahədə deyil, həmçinin insan hüquq və azadlıqlarının qorunması, hüququn aliliyi və vətəndaş cəmiyyətinin formalaşması istiqamətində böyük irəliləyişlərə nail olunub.
Vyetnamlı qonaqlara Ermənistan-Azərbaycan, Dağlıq Qarabağ münaqişəsinin yaranması və mövcud durumu haqqında danışan Novruzəli Aslanov bildirdi ki, bu problem Azərbaycanın sürətli inkişafını əngəlləməklə bərabər regionun təhlükəsizliyini də təhdid altında saxlayır. O, bir milyondan artıq soydaşımızın öz doğma yurd-yuvasından didərgin salındığını, Ermənistan dövlətinin münaqişənin həlli prosesinə təsir göstərəcək beynəlxalq təşkilatların qəbul etdikləri sənədlərə əhəmiyyət vermədiyini dilə gətirdi.
Fan Trung Li səmimi görüşə görə minnətdarlıq edərək bildirdi ki, Azərbaycan onun üçün çox doğma bir məkandır. O, ali təhsilini Bakı Dövlət Universitetində hüquq sahəsi üzrə aldığını, burda öyrəndiklərinin ona həyatda çox gərəkli olduğunu dedi. Ölkəmizin son illərdə həddindən artıq gözəlləşdiyini qeyd edən qonaq Odlar Yurdu Azərbaycanla daim qürur duyduğunu vurğuladı. Daha sonra o, belə bir fikir ifadə etdi ki, Azərbaycan və Vyetnam xalqları öz müstəqilliklərini çox gərgin siyasi mübarizələrdən sonra əldə ediblər. Sonra qonaq öz ölkəsinin qanunvericilik sistemi barədə də ətraflı məlumat verdi.
Görüşdə hər iki ölkənin parlament nümayəndə heyətlərinin səfərlərinin daha da intensivləşməsinin vacibliyi qeyd olundu, qarşılıqlı maraq doğuran bir sıra məsələlər barəsində fikir mübadiləsi aparıldı.
Milli Məclisin
Mətbuat xidməti