SOSİAL SİYASƏT KOMİTƏSİNİN İCLASINDA
Mayın 23-də Milli Məclisin Sosial siyasət komitəsinin növbəti iclası keçirildi. İclasda əvvəlcə “Şəkərli diabet xəstəliyinə tutulmuş şəxslərə dövlət qayğısı haqqında” qanunun icrası ilə bağlı dinləmələr aparıldı.
Komitə sədri Hadi Rəcəbli bildirdi ki, vaxtaşırı cəmiyyətdə maraq doğuran xüsusi qanunlara, o cümlədən sözügedən sənədə dəyişikliklər edilməsi zərurəti yaranır. Bu baxımdan belə müzakirələrin aparılması çox əhəmiyyətlidir. O, qeyd etdi ki, 2003-cü ilin dekabrında sənəd parlamentdə qəbul ediləndə ölkədə şəkərli diabet xəstələrinin sayı 30 min nəfər idisə, hal-hazırda rəsmi statistikaya görə bu cür xəstələrin sayı 206 min nəfərdir. Təkcə cari ilin ilk 5 ayı ərzində belə xəstələrin sayı 10 min nəfər artıb. Hadi Rəcəbli dövlət tərəfindən şəkərli diabet xəstəliyinin müalicə və profilaktikasına göstərilən qayğı və böyük diqqətə görə ölkə rəhbərliyinə minnətdarlığını ifadə etdi.
İclasda iştirak edən mütəxəssislər, respublika Endokrinoloji Mərkəzinin və QHT-lərin nümayəndələri bildirdilər ki, MDB məkanında ilk dəfə Azərbaycanda şəkərli diabet xəstələri ilə bağlı Dövlət Proqramı və qanun qəbul edilib. Bu cür xəstələrə müalicə üçün ötən il qanda şəkərin miqdarını müəyyən edən 420 mindən artıq test çubuğu və 464 mindən artıq qlükometr aparatı pulsuz paylanıb. Qeyd olundu ki, rəsmi qeydiyyatdan keçən şəkərli diabet xəstələri pusuz olaraq dərmanlarla təmin olunurlar. Çıxışlarda xəstəliyə qarşı mübarizə aparmaq məqsədi ilə əhali arasında ciddi maarifləndirmə işinin gücləndirilməsinin vacibliyi diqqətə çatdırıldı.
İclasda deputatlar “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” qanunda dəyişikliklərin edilməsi barədə məsələni də müzakirə etdilər. Sənədə edilən dəyişikliyə əsasən sığortaçı sığorta ödənişini qanunla müəyyən edilən müddətə ödəmədikdə hər geçikdirilmiş gün üçün sığorta ödənişinin 0,1 faizi həcmində cərimə ödəməlidir.
Qanun layihəsi yekdilliklə Milli Məclisin plenar iclasına tövsiyə olundu.
Milli Məclisin
Mətbuat xidməti