1958-ci il dekabrın 16-da Bakı şəhərində anadan olmuşdur. Azərbaycan Dövlət Neft və Kimya İnstitutunu fərqlənmə diplomu ilə bitirmişdir. Texnika elmləri doktoru, professordur. Əməkdar elm xadimidir. Rus və ingilis dillərini bilir. 1980-ci ildən neft-qaz və neft-qaz qurğuları və avadanlığı sahəsində müxtəlif vəzifələrdə işləmişdir. 1999-cu ildən ARDNŞ-nin «Dənizneftqazlayihə » Dövlət Elmi Tədqiqat və Layihə İnstitutunun direktoru, 2001-ci ildən Azərbaycan Respublikasının yanacaq və energetika naziri, 2004-cü ildən Azərbaycan Respublikasının sənaye və energetika naziri vəzifələrində çalışmışdır. Azərbaycan Respublikası Prezidentinin sərəncamı ilə «Azəri-Çıraq-Günəşli», «Şahdəniz», «Bakı-Tbilisi-Ceyhan» və «Bakı-Tbilisi-Ərzurum» layihələrinin həyata keçirilməsi üzrə komissiyanın sədri olmuşdur. «Azərbaycan Respublikasının yanacaq-energetika kompleksinin inkişafı (2005–2015-ci illər) üzrə Dövlət Proqramı»nın və «Azərbaycan Respublikasının alternativ və bərpa olunan enerji mənbələrindən istifadə olunması üzrə Dövlət Proqramı»nın işlənib hazırlanmasına rəhbərlik etmişdir. 2005-ci ildən «Azərikimya» Dövlət Şirkətinin prezidentidir. Yeni Azərbaycan Partiyasının üzvüdür. Milli Məclisin Hüquq siyasəti və dövlət quruculuğu məsələləri daimi komissiyasının üzvüdür. Azərbaycan-Almaniya Federativ Respublikası, Azərbaycan-Çexiya, Azərbaycan-Fransa, Azərbaycan-Səudiyyə Ərəbistanı parlamentlərarası əlaqələr üzrə işçi qruplarının üzvüdür. Evlidir, 2 övladı var.