1983-cü il avqustun 22-də Zərdab rayonunun Ağabağı kəndində anadan olmuşdur. Bakı Dövlət Universitetinin Jurnalistika və Hüquq fakültələrini bitirmişdir. Hüquq üzrə fəlsəfə doktoru, dosentdir. 1 monqorafiya, 3 kitab, 7 tədris proqramı və 30-dan çox elmi məqalənin müəllifidir. İngilis, rus və ivrit dillərini bilir.
2003–2010-cu illərdə «Azad Azərbaycan» Teleradio Yayım Şirkətinin «Xəbərlər» redaksiyasının müxbiri, redaktor müavini, redaktoru olmuş, 2010-cu ildən Azərbaycan Beynəlxalq Bankı Tədris mərkəzində hüquqşünas, 2011-ci ildən «Media İnvest» MMC-də «Discovery Azerbaijan» jurnalının hüquqşünası, baş redaktor müavini, 2012-ci ildən «AvroMed Company» MMC-də baş direktorun müavini, Hüquq şöbəsinin müdiri işləmişdir. 2015–2018-ci illərdə Azərbaycan Respublikası Konstitusiya Məhkəməsi Aparatının Mülki hüquq şöbəsinin məsləhətçisi, 2019–2020-ci illərdə «Paşa Sığorta» ASC-nin Hüquq xidmətinin rəhbəri vəzifələrində çalışmışdır. 2018–2020-ci illərdə Azərbaycan Respublikası Vəkillər Kollegiyasının üzvü olmuşdur. 2013-cü ildən Bakı Dövlət Universiteti Hüquq fakültəsinin müəllimi və dosentidir.
Bitərəfdir.
Milli Məclisin Hüquq siyasəti və dövlət quruculuğu komitəsinin, İnsan hüquqları komitəsinin üzvüdür. Azərbaycan-Yunanıstan parlamentlərarası əlaqələr üzrə işçi qrupunun rəhbəri, Amerika Birləşmiş Ştatları, Argentina, Avstraliya və Yeni Zelandiya, Cənubi Afrika Respublikası, İordaniya, Kuba, Qətər, Pakistan parlamentləri ilə əlaqələr üzrə işçi qruplarının üzvüdür.
Evlidir, 2 övladı var.