Layihə

 

AZƏRBAYCAN RESPUBLİKASININ QANUNU

“Ölçmələrin vəhdətinin təmin edilməsi haqqında”, “Uyğunluğun qiymətləndirilməsi sahəsində akkreditasiya haqqında”, “Standartlaşdırma haqqında” və “Texniki tənzimləmə haqqında” Azərbaycan Respublikasının qanunlarında dəyişiklik edilməsi barədə

 

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 24-cü bəndini rəhbər tutaraq qərara alır:

Maddə 1. “Ölçmələrin vəhdətinin təmin edilməsi haqqında” Azərbaycan Respublikasının Qanununda (Azərbaycan Respublikasının Qanunvericilik Toplusu, 2013, № 7, maddə 778 (Cild I), 2024, № 4, maddə 365, № 7, maddə 751) aşağıdakı dəyişikliklər edilsin:

1.1. 5.3-cü maddəyə aşağıdakı məzmunda üçüncü cümlə əlavə edilsin:

“Ölçmə metodikalarının (metodlarının) attestasiyasının nəticələri attestasiya haqqında şəhadətnamə ilə təsdiq edilir.”;

1.2. aşağıdakı məzmunda 5.4-1-ci və 5.4-2-ci maddələr əlavə edilsin:

“5.4-1. Ölçmələrin vəhdətinin təmin edilməsinin dövlət tənzimlənməsinə aid olan ölçmə metodikalarının (metodlarının) attestasiyası haqqında şəhadətnamənin yaradılması, qeydiyyatı, qüvvəsinin dayandırılması, bərpası və ləğv edilməsi, yenidən rəsmiləşdirilməsi müvafiq icra hakimiyyəti orqanının müəyyən etdiyi orqanın (qurumun) informasiya sistemi vasitəsilə həyata keçirilir. Ölçmələrin vəhdətinin təmin edilməsinin dövlət tənzimlənməsinə aid olan ölçmə metodikalarının (metodlarının) attestasiyası haqqında şəhadətnamə hüquq sahibinin istəyindən asılı olaraq elektron üsulla (o cümlədən elektron poçt ünvanı vasitəsilə) və ya kağız daşıyıcıda hüquq sahibinə təqdim olunur.

5.4-2. Ölçmələrin vəhdətinin təmin edilməsinin dövlət tənzimlənməsinə aid olan ölçmə metodikalarının (metodlarının) attestasiyası haqqında şəhadətnamənin qeydiyyatı müvafiq icra hakimiyyəti orqanının müəyyən etdiyi orqan (qurum) tərəfindən aparılır.”;

1.3. 12-ci maddə üzrə:

1.3.1. aşağıdakı məzmunda 12.5-1-ci, 12.6-1-ci və 12.6-2-ci maddələr əlavə edilsin:

“12.5-1. Ölçmələrin vəhdətinin təmin edilməsinin dövlət tənzimlənməsinə aid olan sahədə istifadə edilmək üçün nəzərdə tutulmuş ölçmə vasitələrinin yoxlanılmasının nəticəsinə əsasən ölçmə vasitələri istifadəyə yararsız sayılırsa, yoxlama nişanı və (və ya) yoxlama haqqında şəhadətnamə ləğv olunur və yararsızlıq haqqında bildiriş verilir və ya texniki sənədlərdə müvafiq qeydlər aparılır.”;

“12.6-1. Ölçmə vasitələrinin yoxlanılmasının nəticələri əsasında təqdim olunmuş ölçmə vasitələrinin yoxlanılması haqqında şəhadətnamənin yaradılması, qeydiyyatı, qüvvəsinin dayandırılması, bərpası və ləğv edilməsi, yenidən rəsmiləşdirilməsi, habelə yararsızlıq haqqında bildirişin yaradılması, qeydiyyatı və ləğv edilməsi bu Qanunun 5.4-1-ci maddəsində nəzərdə tutulan informasiya sistemi vasitəsilə həyata keçirilir. Ölçmə vasitələrinin yoxlanılması haqqında şəhadətnamə və yararsızlıq haqqında bildiriş hüquq sahibinin istəyindən asılı olaraq elektron üsulla (o cümlədən elektron poçt ünvanı vasitəsilə) və ya kağız daşıyıcıda hüquq sahibinə təqdim olunur.

12.6-2. Ölçmə vasitələrinin yoxlanılmasının nəticələri əsasında təqdim olunmuş ölçmə vasitələrinin yoxlanılması haqqında şəhadətnamənin, yoxlama nişanının və yararsızlıq haqqında bildirişin qeydiyyatı müvafiq icra hakimiyyəti orqanının müəyyən etdiyi orqan (qurum) tərəfindən aparılır.”;

1.3.2. 12.7-ci maddə ləğv edilsin;

1.4. 16.1-ci maddənin birinci cümləsindən “attestasiya edilmiş ölçmə metodikaları (metodları),”, “, ölçmə vasitələrinin yoxlanılmasının nəticələri” sözləri çıxarılsın və həmin cümləyə “məlumatlar toplusu,” sözlərindən sonra “attestasiya edilmiş ölçmə metodikaları (metodları),” sözləri əlavə edilsin;

1.5. 17-ci maddə üzrə:

1.5.1. 17.3-cü maddə aşağıdakı redaksiyada verilsin:

“17.3. Ölçmə vasitələrinin kalibrlənməsi “Uyğunluğun qiymətləndirilməsi sahəsində akkreditasiya haqqında” Azərbaycan Respublikasının Qanunu ilə müəyyən olunmuş qaydada akkreditasiya edilmiş uyğunluğu qiymətləndirən qurumlar tərəfindən həyata keçirilir.”;

1.5.2. 17.6-cı maddədə “Ölçmə vasitələrinin kalibrlənməsi işlərini yerinə yetirmək, kalibrlənmə haqqında sertifikat vermək və ya kalibrlənmə nişanını vurmaq hüququnun verilməsi qaydası və kalibrlənmə” sözləri “Kalibrlənmə” sözü ilə əvəz edilsin;

1.5.3. aşağıdakı məzmunda 17.7-ci və 17.8-ci maddələr əlavə edilsin:

“17.7. Kalibrlənmə haqqında sertifikatın (kəmiyyət vahidinin dövlət etalonundan ötürülməsinin nəticələrinə dair kalibrlənmə haqqında sertifikatlar istisna olmaqla) yaradılması, qeydiyyatı, qüvvəsinin dayandırılması, bərpası və ləğv edilməsi, yenidən rəsmiləşdirilməsi bu Qanunun 5.4-1-ci maddəsində nəzərdə tutulan informasiya sistemi vasitəsilə həyata keçirilir. Kalibrlənmə haqqında sertifikat hüquq sahibinin istəyindən asılı olaraq elektron üsulla (o cümlədən elektron poçt ünvanı vasitəsilə) və ya kağız daşıyıcıda hüquq sahibinə təqdim olunur.

17.8. Kalibrlənmə haqqında sertifikatın (kəmiyyət vahidinin dövlət etalonundan ötürülməsinin nəticələrinə dair kalibrlənmə haqqında sertifikatlar istisna olmaqla) və kalibrlənmə nişanının qeydiyyatı müvafiq icra hakimiyyəti orqanının müəyyən etdiyi orqan (qurum) tərəfindən aparılır.”.

Maddə 2. “Uyğunluğun qiymətləndirilməsi sahəsində akkreditasiya haqqında” Azərbaycan Respublikasının Qanununda (Azərbaycan Respublikasının Qanunvericilik Toplusu, 2014, № 7, maddə 758 (Cild I) aşağıdakı dəyişikliklər edilsin:

2.1. 1-ci maddə üzrə:

2.1.1. 1.0.1-ci, 1.0.3-cü və 1.0.8 – 1.0.10-cu maddələr aşağıdakı redaksiyada verilsin:

“1.0.1. uyğunluğun qiymətləndirilməsi – malın (xidmətin, işin), onunla əlaqəli prosesin, idarəetmə sisteminin, istehsal metodunun və işçi heyətin texniki reqlamentdə və digər normativ hüquqi aktda, müvafiq standartlaşdırma sahəsində normativ sənəddə müəyyən olunmuş tələblərə uyğunluğunun müəyyənləşdirilməsi;”;

“1.0.3. uyğunluğu qiymətləndirən qurum – malın (xidmətin, işin), onunla əlaqəli prosesin, idarəetmə sisteminin, istehsal metodunun və işçi heyətin texniki reqlamentdə və digər normativ hüquqi aktda, müvafiq standartlaşdırma sahəsində normativ sənəddə müəyyən olunmuş tələblərə uyğunluğunun qiymətləndirilməsini təmin edən təşkilatlar, hüquqi və fiziki şəxslər;”;

“1.0.8. sınaq – malın (xidmətin, işin), onunla əlaqəli prosesin, idarəetmə sisteminin, istehsal metodunun və işçi heyətin texniki reqlamentdə və digər normativ hüquqi aktda, müvafiq standartlaşdırma sahəsində normativ sənəddə müəyyən olunmuş göstəricilərə uyğunluğunun təyin edilməsi üzrə texniki əməliyyat;

1.0.9. sertifikatlaşdırma – uyğunluğu qiymətləndirən qurum tərəfindən malın (xidmətin, işin), onunla əlaqəli prosesin, idarəetmə sisteminin, istehsal metodunun və işçi heyətin texniki reqlamentdə və digər normativ hüquqi aktda, müvafiq standartlaşdırma sahəsində normativ sənəddə müəyyən olunmuş tələblərə uyğunluğunun elektron formada təsdiqi;

1.0.10. inspeksiya orqanı – malın (xidmətin, işin), onunla əlaqəli prosesin, idarəetmə sisteminin, istehsal metodunun və işçi heyətin texniki reqlamentdə və digər normativ hüquqi aktda, müvafiq standartlaşdırma sahəsində normativ sənəddə müəyyən olunmuş tələblərə uyğunluğunu rəy verməklə müəyyən edən qurum;”;

2.1.2. 1.0.13-cü maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 1.0.14 – 1.0.19-cu maddələr əlavə edilsin:

“1.0.14. mal – müəyyən kəmiyyət, keyfiyyət və istehlak xüsusiyyətlərinə malik, müxtəlif məqsədlər üçün istifadəsi nəzərdə tutulan, istehsal və ya emal fəaliyyətinin maddi formada təqdim edilən nəticəsi;

1.0.15. xidmət, iş – mal hesab olunmayan, nəticələri maddi ifadə kəsb edən fəaliyyət;

1.0.16. mal ilə əlaqəli proses – malların istehsalı, qablaşdırılması, etiketləşdirilməsi, daşınması, saxlanılması, istismarı, satışı, məhv edilməsi və utilizasiyası ilə bağlı olan proseslər;

1.0.17. xidmətlə, işlə əlaqəli proses – mal ilə əlaqəli proses sayılmayan, xidmətin göstərilməsi və işin görülməsi ilə bağlı olan proses;

1.0.18. istehsal metodu – malın yaradılması ilə bağlı emal və ya istehsal fəaliyyəti zamanı tətbiq edilən üsul və texniki həllər;

1.0.19. kalibrləmə – ölçmə vasitələrinin metroloji xarakteristikalarının həqiqi qiymətlərinin təyin edilməsi məqsədilə yerinə yetirilən əməliyyatların məcmusu.”;

2.2. 2.1.7-ci maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 2.1.8-ci maddə əlavə edilsin:

“2.1.8. kalibrləmə laboratoriyaları.”;

2.3. 2.2-ci maddəyə “prosesin” sözündən əvvəl “onunla əlaqəli” sözləri əlavə edilsin;

2.4. aşağıdakı məzmunda 4-1-ci maddə əlavə edilsin:

“Maddə 4-1. Müvafiq icra hakimiyyəti orqanının müəyyən etdiyi orqanın (qurumun) informasiya sistemi

4-1.1. Ölçmə vasitələrinin yoxlanılması haqqında şəhadətnamələrin və kalibrlənməsi haqqında sertifikatların (kəmiyyət vahidinin dövlət etalonundan ötürülməsinin nəticələrinə dair kalibrlənmə haqqında sertifikatlar istisna olmaqla), ölçmələrin vəhdətinin təmin edilməsinin dövlət tənzimlənməsinə aid olan ölçmə metodikalarının (metodlarının) attestasiyası haqqında şəhadətnamələrin, sınaq laboratoriyalarında aparılmış tədqiq (sınaq) nəticələrinə dair sənədlərin, inspeksiya orqanının rəyinin, malın (xidmətin, işin), onunla əlaqəli prosesin, idarəetmə sisteminin, istehsal metodunun və işçi heyətin müvafiq standartlaşdırma sahəsində normativ sənədlərin tələblərinə uyğunluğunun qiymətləndirilməsi barədə uyğunluq sertifikatlarının elektron formada yaradılması, qeydiyyatı, qüvvəsinin dayandırılması, bərpası və ləğv edilməsi, yenidən rəsmiləşdirilməsi, yararsızlıq haqqında bildirişin yaradılması, qeydiyyatı və ləğv edilməsi, texniki reqlamentlərlə əhatə olunan malların, onlarla əlaqəli proseslərin və istehsal metodlarının müvafiq texniki reqlamentlə müəyyən olunmuş tələblərə uyğunluğunun qiymətləndirilməsi barədə uyğunluq sertifikatlarının və uyğunluq bəyannamələrinin, orta riskli mallar üçün uyğunluğu qiymətləndirən qurum tərəfindən uyğunluğun təsdiqi barədə təsdiqedici sənədin, habelə xarici mənşəli uyğunluq sənədlərinin tanınması barədə qərarların elektron formada yaradılması, qeydiyyatı, reyestri, qüvvəsinin dayandırılması, bərpası və ləğv edilməsi, yenidən rəsmiləşdirilməsi, habelə ölçmə vasitələrinin üzərinə vurulan yoxlama və kalibrlənmə nişanlarının qeydiyyatı müvafiq icra hakimiyyəti orqanının müəyyən etdiyi orqanın (qurumun) informasiya sistemi vasitəsilə təmin olunur.

4-1.2. “İnformasiya əldə etmək haqqında” Azərbaycan Respublikasının Qanunu ilə müəyyən edilmiş əldə olunması məhdudlaşdırılan informasiya istisna olmaqla, bu Qanunun 4-1.1-ci maddəsində nəzərdə tutulan informasiya sisteminə daxil edilən məlumatlar ictimaiyyət üçün açıqdır və həmin məlumatlardan “İnformasiya əldə etmək haqqında”, “İnformasiya, informasiyalaşdırma və informasiyanın mühafizəsi haqqında”, “Dövlət sirri haqqında”, “Fərdi məlumatlar haqqında” və “Elektron imza və elektron sənəd haqqında” Azərbaycan Respublikası qanunlarının tələbləri nəzərə alınmaqla mühafizə və istifadə olunur. 

4-1.3. Bu Qanunun 4-1.1-ci maddəsində nəzərdə tutulan informasiya sistemi vasitəsilə həmin maddədə göstərilən sənədlərin yaradılması üçün istifadə haqqı ödənilir. Bu Qanunun 4-1-ci maddəsində nəzərdə tutulan informasiya sistemindən istifadə haqqının məbləği, ödənilməsi və ondan istifadə qaydası müvafiq icra hakimiyyəti orqanının müəyyən etdiyi orqan (qurum) tərəfindən təsdiq edilir.”.

Maddə 3. “Standartlaşdırma haqqında” Azərbaycan Respublikasının Qanununda (Azərbaycan Respublikasının Qanunvericilik Toplusu, 2019, № 7, maddə 1175 (Cild I) aşağıdakı dəyişikliklər edilsin:

3.1. 1-ci maddə üzrə:

3.1.1. 1.0.2-ci maddə aşağıdakı redaksiyada verilsin:

“1.0.2. standart – təkrar və ümumi istifadə üçün nəzərdə tutulan, standartlaşdırma obyektlərinə dair qaydaları, tövsiyələri, texniki xarakteristikaları müəyyən edən, tətbiqi könüllü olan normativ sənəd;”; 

3.1.2. 1.0.11-ci maddədə “mala (işə, xidmətə), onunla əlaqəli proseslərə (o cümlədən idarəetmə sistemlərinə) və istehsal metodlarına” sözləri “standartlaşdırma obyektlərinə” sözləri ilə əvəz edilsin;

3.1.3. 1.0.15-ci maddə aşağıdakı redaksiyada verilsin:

“1.0.15. standartlaşdırma obyekti – mal (xidmət, iş), onunla əlaqəli proses, idarəetmə sistemi, istehsal metodu, işçi heyəti, terminologiya, şərti işarələr, ölçmələr (nümunələrin götürülməsi də daxil olmaqla), sınaq üsulları və qaydaları, ölçmə metodları, uyğunluğun qiymətləndirilməsi prosedurları;”;

3.1.4. 1.0.17-ci maddədə “malın (işin, xidmətin), onunla əlaqəli prosesin (o cümlədən idarəetmə sisteminin), istehsal metodunun” sözləri “standartlaşdırma obyektinin” sözləri ilə əvəz edilsin;

3.1.5. 1.0.22-ci maddə aşağıdakı redaksiyada verilsin:

“1.0.22. idarəetmə sistemi – konkret məqsədə çatmaq üçün istifadə olunan prosedur və proseslərin məcmusu. Bu Qanuna görə, idarəetmə sistemi keyfiyyətin, ətraf mühitin, əməyin mühafizəsinin və sağlamlığın, qida və informasiya təhlükəsizliyinin və sosial məsuliyyətin idarəetmə sistemlərini əhatə edir;”;

3.1.6. 1.0.23-cü maddədə “(o cümlədən idarəetmə sisteminin), istehsal metodunun standartlarda” sözləri “, idarəetmə sisteminin, istehsal metodunun və işçi heyətin standartlaşdırma sahəsində normativ sənədlərdə” sözləri ilə əvəz edilsin;

3.1.7. 1.0.24-cü maddə ləğv edilsin;

3.1.8. aşağıdakı məzmunda 1.0.25 – 1.0.29-cu maddələr əlavə edilsin:

“1.0.25. mal – müəyyən kəmiyyət, keyfiyyət və istehlak xüsusiyyətlərinə malik, müxtəlif məqsədlər üçün istifadəsi nəzərdə tutulan, istehsal və ya emal fəaliyyətinin maddi formada təqdim edilən nəticəsi;

1.0.26. xidmət, iş – mal hesab olunmayan, nəticələri maddi ifadə kəsb edən fəaliyyət;

1.0.27. mal ilə əlaqəli proses – malların istehsalı, qablaşdırılması, etiketləşdirilməsi, daşınması, saxlanılması, istismarı, satışı, məhv edilməsi və utilizasiyası ilə bağlı olan proseslər;

1.0.28. xidmətlə, işlə əlaqəli proses – mal ilə əlaqəli proses sayılmayan, xidmətin göstərilməsi və işin görülməsi ilə bağlı olan proses;

1.0.29. istehsal metodu – malın yaradılması ilə bağlı emal və ya istehsal fəaliyyəti zamanı tətbiq edilən üsul və texniki həllər.”;

3.2. 2.2-сi maddədə “(o cümlədən idarəetmə sisteminin), istehsal metodunun” sözləri “, idarəetmə sisteminin, istehsal metodunun və işçi heyətinin” sözləri ilə əvəz edilsin;

3.3. 4.1.1-ci və 4.1.2-ci maddələrdə “malın (xidmətin, işin), onunla əlaqəli prosesin (o cümlədən idarəetmə sisteminin), istehsal metodunun” sözləri “standartlaşdırma obyektinin” sözləri ilə əvəz edilsin;

3.4. 5.2-ci maddədə “malın (xidmətin, işin), prosesin, istehsal metodunun” sözləri “standartlaşdırma obyektinin” sözləri ilə əvəz edilsin; 

3.5. 7.3-cü maddə üzrə:

3.5.1. 7.3.2-ci maddədə “malın (xidmətin, işin), onunla əlaqəli prosesin (o cümlədən idarəetmə sisteminin), istehsal metodunun” sözləri “standartlaşdırma obyektinin” sözləri ilə əvəz edilsin;

3.5.2. 7.3.4-cü maddədə “termin” sözü “terminologiya, şərti işarələr” sözləri ilə əvəz edilsin;

3.5.3. 7.3.5-ci maddə “malın (xidmətin, işin), onunla əlaqəli prosesin (o cümlədən idarəetmə sisteminin), istehsal metodunun” sözləri “standartlaşdırma obyektinin” sözləri ilə əvəz edilsin və həmin maddəyə “xarakteristikaları” sözündən əvvəl “texniki” sözü əlavə edilsin;

3.5.4. 7.3.10-cu maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 7.3.11 – 7.3.13-cü maddələr əlavə edilsin:

“7.3.11. ölçmələr (nümunələrin götürülməsi də daxil olmaqla);

7.3.12. ölçmə metodları;

7.3.13. uyğunluğun qiymətləndirilməsi prosedurları.”;

3.6. 8.1-ci, 8.3-cü, 9.2-ci maddələrdə və 9.3-cü maddənin birinci cümləsində ismin müvafiq hallarında “mal (iş, xidmət), onunla əlaqəli proses (o cümlədən idarəetmə sistemi), istehsal metodu” sözləri ismin müvafiq hallarında “standartlaşdırma obyekti” sözləri ilə əvəz edilsin;

3.7. 9.4-cü maddənin ikinci cümləsində “gün” sözü “iş günü” sözləri ilə əvəz edilsin;

3.8. 11.1-ci maddədə “hər il” sözləri “beş ildən gec olmayaraq” sözləri ilə əvəz edilsin;

3.9. 12.1-ci və 12.2-ci maddələrdə “(o cümlədən idarəetmə sisteminin), istehsal metodlarının” sözləri “, idarəetmə sisteminin, istehsal metodlarının və işçi heyətin” sözləri ilə əvəz edilsin;  

3.10. 13-cü maddə üzrə:

3.10.1. 13.1-ci maddə üzrə:

3.10.1.1. birinci cümlədə “Uyğunluğun könüllü qiymətləndirilməsi üçün mal (iş, xidmət), onunla əlaqəli proses (o cümlədən idarəetmə sistemi), istehsal metodu” sözləri “Texniki tənzimləmənin şamil olunduğu standartlaşdırma obyekti” sözləri ilə əvəz edilsin;

3.10.1.2. ikinci cümləyə “cavab verən” sözlərindən sonra “malın, onunla əlaqəli prosesin, istehsal metodunun” sözləri əlavə edilsin və həmin cümlədə “(o cümlədən idarəetmə sisteminin), istehsal metodunun” sözləri “, idarəetmə sisteminin, istehsal metodunun və işçi heyətin” sözləri ilə əvəz edilsin;

3.10.2. aşağıdakı məzmunda 13.1-1-ci və 13.6-cı maddələr əlavə edilsin:

“13.1-1. Uyğunluq sertifikatının yaradılması, qeydiyyata alınması, qüvvəsinin dayandırılması, bərpası, ləğv edilməsi və yenidən rəsmiləşdirilməsi müvafiq icra hakimiyyəti orqanının müəyyən etdiyi orqanın (qurumun) informasiya sistemi vasitəsilə həyata keçirilir. Uyğunluq sertifikatı hüquq sahibinin istəyindən asılı olaraq elektron üsulla (o cümlədən elektron poçt ünvanı vasitəsilə) və ya kağız daşıyıcıda hüquq sahibinə təqdim olunur.”;

“13.6. Uyğunluq sertifikatlarının qeydiyyatı müvafiq icra hakimiyyəti orqanının müəyyən etdiyi orqan (qurum) tərəfindən aparılır.”; 

3.10.3. 13.3-cü maddəyə “forması” sözündən sonra “və təqdim edilməsi” sözləri əlavə edilsin;

3.10.4. 13.5-ci maddənin birinci və ikinci cümlələrində “(o cümlədən idarəetmə sisteminin), istehsal metodunun” sözləri “, idarəetmə sisteminin, istehsal metodunun və işçi heyətin” sözləri ilə əvəz edilsin;

3.11. 19-cu maddədə “(işin, xidmətin), onunla əlaqəli prosesin (o cümlədən idarəetmə sisteminin),” sözləri “, onunla əlaqəli prosesin və” sözləri ilə, “(işə, xidmətə), prosesə (o cümlədən idarəetmə sisteminə),” sözləri “, onunla əlaqəli prosesə və” sözləri ilə əvəz edilsin. 

Maddə 4. “Texniki tənzimləmə haqqında” Azərbaycan Respublikasının Qanununda (Azərbaycan Respublikasının Qanunvericilik Toplusu, 2019, № 11, maddə 1679 (Cild I) aşağıdakı dəyişikliklər edilsin:

4.1. 1-ci maddə üzrə:

4.1.1. 1.1.7-ci maddəyə “bəyan edildiyi” sözlərindən sonra “, elektron formada tərtib edilən” sözləri əlavə edilsin;

4.1.2. 1.1.8-ci maddəyə “təsdiq edən” sözlərindən sonra “, elektron formada tərtib edilən” sözləri əlavə edilsin;

4.1.3. 1.1.12-ci maddədən “kağız üzərində yazılı və ya” sözləri çıxarılsın;

4.1.4. 1.1.13-cü maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 1.1.14 – 1.1.16-cı maddələr əlavə edilsin:

“1.1.14. mal – müəyyən kəmiyyət, keyfiyyət və istehlak xüsusiyyətlərinə malik, müxtəlif məqsədlər üçün istifadəsi nəzərdə tutulan, istehsal və ya emal fəaliyyətinin maddi formada təqdim edilən nəticəsi;

1.1.15. mal ilə əlaqəli proses – malların istehsalı, qablaşdırılması, etiketləşdirilməsi, daşınması, saxlanılması, istismarı, satışı, məhv edilməsi və utilizasiyası ilə bağlı olan proseslər;

1.1.16. istehsal metodu – malın yaradılması ilə bağlı emal və ya istehsal fəaliyyəti zamanı tətbiq edilən üsul və texniki həllər.”;

4.2. 5.2-ci maddəyə ikinci halda “malların” sözündən sonra “istehsal,” sözü əlavə edilsin;

4.3. aşağıdakı məzmunda 7.15-ci maddə əlavə edilsin: 

“7.15. Texniki tənzimləmənin şamil olunduğu malların siyahısı müvafiq icra hakimiyyəti orqanının müəyyən etdiyi orqan (qurum) tərəfindən təsdiq edilir.”;

4.4.  13-cü maddə üzrə:

4.4.1. 13.5-ci maddənin ikinci cümləsi çıxarılsın;

4.4.2.  aşağıdakı məzmunda 13.5-1-ci maddə əlavə edilsin:

“13.5-1. Uyğunluq sertifikatının, uyğunluq bəyannaməsinin, uyğunluğu təsdiq edən sənədin yaradılması, qeydiyyatı, qüvvəsinin dayandırılması, bərpası və ləğv edilməsi, yenidən rəsmiləşdirilməsi müvafiq icra hakimiyyəti orqanının müəyyən etdiyi orqanın (qurumun) informasiya sistemi vasitəsilə həyata keçirilir. Uyğunluq sertifikatı və uyğunluğu təsdiq edən sənəd hüquq sahibinin istəyindən asılı olaraq elektron üsulla (o cümlədən elektron poçt ünvanı vasitəsilə) və ya kağız daşıyıcıda hüquq sahibinə təqdim olunur.”;

4.4.3. 13.9-cu maddə ləğv edilsin;

4.4.4. 13.10-cu və 13.12-ci maddələr aşağıdakı redaksiyada verilsin:

“13.10. Uyğunluq sertifikatlarının, uyğunluq bəyannamələrinin, uyğunluğu təsdiq edən sənədlərin və xarici mənşəli uyğunluq sənədlərinin tanınması haqqında qərarların reyestri müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən aparılır.”;

“13.12. Azərbaycan Respublikasının tərəfdar çıxdığı beynəlxalq müqavilələrdə birbaşa tanınma nəzərdə tutulduğu hallar istisna olmaqla, xarici mənşəli uyğunluq sənədlərinin tanınması üçün təsərrüfat subyekti uyğunluq sənədlərini malın idxalından əvvəl akkreditasiya edilmiş hər hansı uyğunluğu qiymətləndirən quruma göndərməlidir. Akkreditasiya edilmiş uyğunluğu qiymətləndirən qurumlar göndərilən uyğunluq sənədlərinin bu Qanunun 13.11-ci maddəsinə uyğun olaraq tanınması və ya tanınmasından imtina haqqında qərar qəbul etməlidir. Xarici mənşəli uyğunluq sənədlərinin tanınması haqqında qərarın yaradılması, qeydiyyatı, qüvvəsinin dayandırılması, bərpası və ləğv edilməsi, yenidən rəsmiləşdirilməsi bu Qanunun     13.5-1-ci maddəsində nəzərdə tutulan informasiya sistemi vasitəsilə həyata keçirilir. Xarici mənşəli uyğunluq sənədlərinin tanınması haqqında qərar hüquq sahibinin istəyindən asılı olaraq elektron üsulla (o cümlədən elektron poçt ünvanı vasitəsilə) və ya kağız daşıyıcıda hüquq sahibinə təqdim olunur.”; 

4.4.5. 13.13-cü maddədə “istehsalçı və ya ticarət nümayəndəsi” sözləri “təsərrüfat subyekti” sözləri ilə əvəz edilsin;

4.5. 14-cü maddə üzrə:

4.5.1. 14.1-ci maddənin birinci cümləsindən “, realizə edilməzdən” sözləri çıxarılsın;

4.5.2. 14.2-ci maddədən “realizə etmək,” sözləri çıxarılsın;

4.5.3. 14.3-cü maddədən “realizəsi,” sözü çıxarılsın.

 

Azərbaycan Respublikasının Prezidenti