Azərbaycan Respublikasının bəzi qanunvericilik aktlarına əlavələr edilməsi barədə

AZƏRBAYCAN RESPUBLİKASININ

Q A N U N U

Azərbaycan Respublikasının Milli Məclisi qərara alır:

I. "Torpaq islahatı haqqında" Azərbaycan Respublikası Qanununun (Azərbaycan Respublikasının Qanunvericilik Toplusu, 1997-ci il, No–3, maddə 203; 2001-ci il, No–1, maddə 26, No–3, maddə 149, No–6, maddə 375; 2002-ci il, No–5, maddələr 237, 241; 2003-cü il, No–1, maddə 14) 6-cı maddəsinin birinci hissəsinə aşağıdakı məzmunda altıncı bənd əlavə edilsin:

"6) Xəzər dənizinin (gölünün) Azərbaycan Respublikasına mənsub olan bölməsinin sahilboyu 80-130 metrlik zolağının altında olan torpaqlar;";

6-9-cu bəndlər müvafiq olaraq 7-10-cu bəndlər hesab edilsin.

II. Azərbaycan Respublikasının Torpaq Məcəlləsinin (Azərbaycan Respublikasının Qanunvericilik Toplusu, 1999- cu il, No–8, maddə 478; 2001-ci il, No–12, maddə 736; 2002-ci il, No–5, maddələr 237, 241; 2003-cü il, No–1, maddə 11, No–6, maddə 256, No–8, maddə 423) 110-cu maddəsinin onuncu abzasında "öhdəliklərin yerinə yetirilməməsi" sözlərindən sonra "Xəzər dənizinin (gölünün) Azərbaycan Respublikasına mənsub olan bölməsinin sahilboyu 80-130 metrlik zolağının altında olan torpaq sahələrinin hasara alınması yolu ilə və ya digər üsullarla bağlanılması və dənizin sahilinə gediş-gəlişin məhdudlaşdırılması" sözləri əlavə edilsin.

III. Bu Qanun dərc edildiyi gündən qüvvəyə minir.

İlham Əliyev

Azərbaycan Respublikasının Prezidenti

Bakı şəhəri, 13 yanvar 2004-cü il

No– 587-IIQD