"Əhalinin ekoloji təhsili və maarifləndirilməsi haqqında" Azərbaycan Respublikası Qanununun tətbiqi ilə əlaqədar Azərbaycan Respublikasının bəzi qanunvericilik aktlarına dəyişikliklər və əlavə edilməsi barədə

AZƏRBAYCAN RESPUBLİKASININ
Q A N U N U

Azərbaycan Respublikasının Milli Məclisi qərara alır:

I."Ətraf mühitin mühafizəsi haqqında" Azərbaycan Respublikasının Qanununda (Azərbaycan Respublikasının Qanunvericilik Toplusu, 1999-cu il, No–8, maddə 472; 2001-ci il, No–3, maddə 148; 2002-ci il, No–5, maddə 238; 2003-cü il, No–4, maddə 178) aşağıdakı dəyişikliklər edilsin:

1. 28-ci maddənin 1.6-cı bəndində və IX fəslin adında "tərbiyə" sözü "maarifləndirmə" sözü ilə əvəz edilsin;

2. 59-cu maddədə:

2.1. maddənin adı aşağıdakı redaksiyada verilsin:

"Ekoloji təhsil və maarifləndirmə";

2.2. 1-ci hissə aşağıdakı redaksiyada verilsin:

"1. Əhalinin ekoloji təhsili və maarifləndirilməsi ilə bağlı münasibətlər müvafiq qanunla tənzimlənir.";

2.3. 2-ci və 3-cü hissələr çıxarılsın və 4-cü hissə müvafiq olaraq 2-ci hissə hesab edilsin.

II. Azərbaycan Respublikasının İnzibati Xətalar Məcəlləsinə (Azərbaycan Respublikasının Qanunvericilik Toplusu, 2000-ci il, No–8, I kitab, maddə 584; 2001-ci il, No–1, maddə 24; No–3, maddə 139; No–7, maddə 455; No–11, maddələr 680, 698; No–12, maddə 731; 2002-ci il No–1, maddə 9; No–4, I kitab, maddə 165; No–5, maddələr 234, 237, 239; No–6, maddə 326; No–8, maddə 463; No–12, maddə 692; 2003-cü il, No–1, maddələr 3, 13, 23; No–4, maddələr 177, 178; No–5, maddə 228; No–6, maddələr 257, 276, 279; No–8, maddələr 407, 425; Azərbaycan Respublikasının 2003- cü il 7 noyabr tarixli 512-IIQD nömrəli, 5 dekabr tarixli 536-IIQD nömrəli, 9 dekabr tarixli 556-IIQD nömrəli, 557-IIQD nömrəli və 558-IIQD nömrəli, 30 dekabr tarixli 569-IIQD nömrəli, 2004-cü il 6 yanvar tarixli 574-IIQD nömrəli Qanunları) aşağıdakı məzmunda 84-1-ci maddə əlavə edilsin:

"Maddə 84-1. Əhalinin ekoloji təhsili və maarifləndirilməsi haqqında qanunvericiliyin pozulması Əhalinin ekoloji təhsili və maarifləndirilməsi haqqında qanunvericiliyin pozulmasına görə -xəbərdarlıq edilir və ya şərti maliyyə vahidinin on mislindən qırx mislinədək miqdarda cərimə edilir.".

III. Bu Qanun dərc edildiyi gündən qüvvəyə minir.

İlham Əliyev

Azərbaycan Respublikasının Prezidenti

Bakı şəhəri, 5 mart 2004-cü il

No– 600-IIQD