Azərbaycan Respublikasının Cinayət Məcəlləsində dəyişikliklər edilməsi haqqında

AZƏRBAYCAN RESPUBLİKASININ QANUNU

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 17-ci bəndini rəhbər tutaraq, Azərbaycan Respublikasının Cinayət Məcəlləsini “Dini ekstremizmə qarşı mübarizə haqqında” Azərbaycan Respublikasının 2015-ci il 4 dekabr tarixli 27-VQ nömrəli Qanununa uyğunlaşdırmaq məqsədi ilə qərara alır:

Azərbaycan Respublikasının Cinayət Məcəlləsində (Azərbaycan Respublikasının Qanunvericilik Toplusu, 2000, No– 4, II kitab, maddə 251, No– 5, maddə 323, No– 12, maddə 835; 2001, No– 1, maddə 24, No– 7, maddə 455; 2002, No– 1, maddə 9, No– 5, maddələr 236, 248, 258, No– 6, maddə 326, No– 8, maddə 465; 2003, No– 6, maddələr 276, 279, No– 8, maddələr 424, 425, No– 12, I kitab, maddə 676; 2004, No– 1, maddə 10, No– 4, maddə 200, No– 5, maddə 321, No– 8, maddə 598, No– 10, maddə 762, No– 11, maddə 900; 2005, No– 1, maddə 3, No– 6, maddə 462, No– 7, maddə 575, No– 10, maddə 904, No– 11, maddə 994; 2006, No– 2, maddələr 71, 72, 75, No– 5, maddə 390, No– 12, maddələr 1008, 1020, 1028; 2007, No– 2, maddə 68, No– 5, maddə 398, No– 6, maddələr 560, 562, 579, No– 8, maddə 757, No– 10, maddələr 937, 941, No– 11, maddələr 1049, 1080, 1090, No– 12, maddə 1221; 2008, No– 6, maddələr 454, 461, No– 7, maddə 602, No– 10, maddə 884, No– 12, maddələr 1047, 1049; 2009, No– 5, maddə 315, No– 7, maddə 517, No– 12, maddə 953; 2010, No– 2, maddə 70, No– 3, maddələr 171, 178, No– 4, maddələr 275, 276, No– 7, maddə 591; 2011, No– 4, maddə 253, No– 6, maddə 472, No– 7, maddələr 587, 601, 621, No– 11, maddə 980, No– 12, maddə 1093; 2012, No– 2, maddə 45, No– 3, maddələr 193, 196, No– 7, maddələr 666, 669, 673, No– 11, maddə 1068, No– 12, maddə 1223; 2013, No– 1, maddə 14, No– 2, maddə 102, No– 4, maddə 364, No– 5, maddələr 459, 479, 481, No– 6, maddələr 594, 600, No– 11, maddələr 1264, 1286, 1312, No– 12, maddə 1492; 2014, No– 2, maddələr 89, 95, No– 4, maddə 327, No– 6, maddələr 618, 622; 2015, No– 4, maddələr 339, 359, 368, No– 5, maddələr 504, 508, 510, No– 6, maddələr 678, 690, 692, No– 11, maddələr 1253, 1268, 1289, 1298, No– 12, maddələr 1437, 1445; 2016, No– 4, maddələr 634, 636, 638, 653, No– 5, maddə 1001) aşağıdakı dəyişikliklər edilsin:

1.167-1-ci maddə üzrə:
1.1. maddənin adında “etmə” sözündən sonra “və ya bu əməllərin dini düşmənçilik, dini radikalizm və ya dini fanatizm zəminində törədilməsini maliyyələşdirmə” sözləri əlavə edilsin;
1.2. aşağıdakı məzmunda 167-1.4-cü və 167-1.5-ci maddələr əlavə edilsin:
“167-1.4. Bu Məcəllənin 167-1.1-ci maddəsində nəzərdə tutulmuş əməllər dini düşmənçilik, dini radikalizm və ya dini fanatizm zəminində törədildikdə –
yeddi min manatdan doqquz min manatadək miqdarda cərimə və ya iki ildən beş ilədək müddətə azadlıqdan məhrumetmə ilə cəzalandırılır.
167-1.5. Bu Məcəllənin 167-1.1-ci maddəsində nəzərdə tutulmuş əməllərin dini düşmənçilik, dini radikalizm və ya dini fanatizm zəminində törədilməsini maliyyələşdirmə –
iki ildən beş ilədək müddətə azadlıqdan məhrumetmə ilə cəzalandırılır.”.

2. Aşağıdakı məzmunda 167-3-cü maddə əlavə edilsin:
“167-3. Dini ekstremist materialları hazırlama, saxlama, yayma və ya bu əməlləri maliyyələşdirmə
167-3.1. Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma –
səkkiz min manatdan on min manatadək miqdarda cərimə və ya iki ildən beş ilədək müddətə azadlıqdan məhrum etmək ilə cəzalandırılır.
167-3.2. Bu Məcəllənin 167-3.1.-ci maddəsində nəzərdə tutulmuş əməlləri maliyyələşdirmə –
iki ildən beş ilədək müddətə azadlıqdan məhrum etmə ilə cəzalandırılır.”.

3. 214.2.5-ci maddədə tire işarəsi nöqtəli vergül işarəsi ilə əvəz edilsin və aşağıdakı məzmunda 214.2.6-cı maddə əlavə edilsin:
“214.2.6. dini düşmənçilik, dini radikalizm və ya dini fanatizm zəminində törədildikdə –”.

4. 278-ci maddə üzrə:
4.1. maddənin adında “saxlama” sözündən sonra “, dövlətin konstitusiya quruluşunu zorla dəyişdirmə” sözləri əlavə edilsin;
4.2. maddənin mətni 278.1-ci maddə hesab edilsin və aşağıdakı məzmunda 278.2-ci maddə əlavə edilsin:
“278.2. Azərbaycan Respublikasının konstitusiya quruluşunun, o cümlədən onun dünyəvi xarakterinin zorla dəyişdirilməsinə və ya ərazi bütövlüyünün parçalanmasına, yaxud hakimiyyətin zorla ələ keçirilməsinə yönələn hərəkətlərin dini düşmənçilik, dini radikalizm və ya dini fanatizm zəminində törədilməsi –
on beş ildən iyirmi ilədək müddətə azadlıqdan məhrum etmə və ya ömürlük azadlıqdan məhrum etmə ilə cəzalandırılır.”.

5.   279-cu maddə üzrə:
5.1. aşağıdakı məzmunda 279.1-1-ci maddə əlavə edilsin:
“279.1-1. Dini düşmənçilik, dini radikalizm və ya dini fanatizm zəminində bu Məcəllənin 279.1-ci maddəsində nəzərdə tutulan silahlı birləşmələr və ya qruplar yaratma, həmin birləşmə və ya qruplarda iştirak etmə –
altı ildən on ilədək müddətə azadlıqdan məhrum etmə ilə cəzalandırılır.”;
5.2. 279.2-ci maddədə “maddəsində” sözü “və 279.1-1-ci maddələrində” sözləri ilə əvəz edilsin.

6. Aşağıdakı məzmunda 283.1-1-ci və 283.3-cü maddələr əlavə edilsin:
“283.1-1. Bu Məcəllənin 283.1-ci maddəsində nəzərdə tutulmuş əməllər dini düşmənçilik, dini radikalizm və ya dini fanatizm zəminində törədildikdə –
üç ildən beş ilədək müddətə azadlıqdan məhrum etmə ilə cəzalandırılır.
283.3. Bu Məcəllənin 283.1-ci maddəsində nəzərdə tutulmuş əməllərin dini düşmənçilik, dini radikalizm və ya dini fanatizm zəminində törədilməsinin maliyyələşdirilməsi –
üç ildən beş ilədək müddətə azadlıqdan məhrum etmə ilə cəzalandırılır.”

7. 283-1.1-ci maddədə “dini düşmənçilik” sözlərindən sonra “, dini radikalizm və ya dini fanatizm” sözləri əlavə edilsin.

İlham Əliyev
Azərbaycan Respublikasının Prezidenti

Bakı şəhəri, 28 oktyabr 2016-cı il
No– 365-VQD