“Reklam haqqında” Azərbaycan Respublikasının Qanununda dəyişikliklər edilməsi barədə

AZƏRBAYCAN RESPUBLİKASININ QANUNU

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 12-ci və 26-cı bəndlərini rəhbər tutaraq qərara alır:

“Reklam haqqında” Azərbaycan Respublikasının Qanununda (Azərbaycan Respublikasının Qanunvericilik Toplusu, 2015, No– 7, maddə 812; 2016, No– 11, maddə 1755; No– 12, maddə 1996; 2017, No– 3, maddə 334, No– 5, maddələr 675, 748, No– 6, maddə 1029, No– 7, maddə 1307) aşağıdakı dəyişikliklər edilsin:

1. 26.1-ci maddənin ikinci cümləsində “daşıyıcılarının” sözü “qurğularının” sözü ilə əvəz edilsin.

2. 26.2-2-ci maddə aşağıdakı redaksiyada verilsin:
“26.2-2. Reklam yayıcısı, həmçinin:
26.2-2.1. reklam daşıyıcısının yerləşdiriləcəyi xüsusi mülkiyyətdə olan daşınmaz əmlakın mülkiyyətçisi ilə həmin əmlakın istifadəsinə dair müqavilə bağlamalıdır;
26.2-2.2. reklam daşıyıcısının bələdiyyə mülkiyyətində olan daşınmaz əmlakda yerləşdiriləcəyi təqdirdə həmin əmlakın istifadəsinə dair bələdiyyə ilə müvafiq icra hakimiyyəti orqanının yaratdığı qurum arasında bağlanılacaq müqavilədən irəli gələn məbləği həmin quruma ödəməlidir.”.

3. Aşağıdakı məzmunda 26.2-3-cü maddə əlavə edilsin:
“26.2-3. Reklam yayıcısı açıq məkanda reklam yayımına görə bu Qanunun 35.3-cü maddəsinə uyğun olaraq, müvafiq icra hakimiyyəti orqanının yaratdığı quruma haqq ödəyir.”.

4. 26.8-ci maddədə birinci halda “lövhələr” sözü “sayı 1-dən, ümumi ölçüsü 2 kvadrat metrdən artıq olmayan lövhələr (yazılar)” sözləri ilə, “reklam daşıyıcıları” sözləri “və Azərbaycan Respublikası Şəhərsalma və Tikinti Məcəlləsinin 86.1-ci maddəsində nəzərdə tutulmuş məlumat lövhələri reklam daşıyıcıları və yerləşdirilməsinə icazə alınması tələb olunan reklam” sözləri ilə əvəz edilsin.

5. 35.1-ci maddəyə “münasibətlərinə” sözündən sonra “(bu Qanunun 35.2-ci və 35.3-cü maddələrində nəzərdə tutulmuş hallar istisna olmaqla)” sözləri əlavə edilsin.

6. 35.2-ci maddədə “26.2-2-ci maddəsinə uyğun olaraq, müqavilə dövlət və bələdiyyə mülkiyyətində olan daşınmaz əmlakın mülkiyyətçisi ilə (və ya onlar barədə sərəncam vermək hüququ olan şəxslə) bağlandıqda, müvafiq” sözləri “26.2-2.2-ci maddəsinə uyğun olaraq, müqavilə bələdiyyə ilə bağlandığı halda müvafiq əmlakdan istifadəyə görə” sözləri ilə əvəz edilsin.

7. Aşağıdakı məzmunda 35.3-cü maddə əlavə edilsin:
“35.3. Açıq məkanda reklam yayımına görə ödənilən haqqın məbləği müvafiq icra hakimiyyəti orqanı tərəfindən müəyyən edilir. Bu maddənin birinci cümləsinin tələbi nəzərə alınmaqla, açıq məkanda reklam yayımına görə haqqın ödənilməsi ilə bağlı məsələlər hər bir reklam yayıcısı ilə bağlanan bu Qanunun 26.2-ci maddəsində nəzərdə tutulmuş icazə müqaviləsində müəyyən edilir.”.

İlham Əliyev
Azərbaycan Respublikasının Prezidenti

Bakı şəhəri, 17 noyabr 2017-ci il
No– 867-VQD