Noyabrın 25-də Milli Məclisin  Regional məsələlər komitəsinin iclası keçirildi. Komitə sədri Arif Rəhimzadə iclası  acaraq  bildirdi ki, gündəliyə təqdim edilən məsələlər bələdiyyələrin fəaliyyətini tənzimləyən qanun layihələrinə dəyişiklik edilməsi ilə bağlıdır.
Arif  Rəhimzadə  qeyd  etdi ki, müzakirəyə çıxarılan  “Bələdiyyələrin maliyyə əsasları haqqında”, “Bələdiyyələrin statusu haqqında”, “Bələdiyyələrin vergi xidməti orqanı  haqqında  Əsasnamənin  təsdiq  edilməsi haqqında”  qanunlara  texniki xarakterli dəyişikliklər  edilməsi  nəzərdə  tutulur. Düzəlişlərə  əsasən bundan  sonra  bələdiyyə orqanları ödənişləri  nağd  şəkildə  yox,  poçt  və ya bank vasitəsilə  həyata  keçirə bilərlər.  Bu günəcən onlara ancaq dotasiyalar ayrılırdısa, bundan sonra subvensiyalar da  ayrılacaq.
İclasda iştirak edən Ədliyyə Nazirliyinin Bələdiyyələrlə İş mərkəzinin rəhbəri Mehdi Səlimzadə bələdiyyələrin fəaliyyətindən danışdı, qarşıdan  gələn bələdiyyə seçkilərinə hazırlıqlar barədə məlumat verdi, yerli özünüidarəetmə orqanlarında təmsil olunmaq istəyən insanların sayının artdığını vurğuladı. O, qanun layihələrində edilən dəyişikliklərin əhəmiyyətli olduğunu bildirdi. 
Müzakirələrdən  sonra qanun layihələri Milli Məclisin plenar iclasına  tövsiyə olundu.

Milli Məclisin
Mətbuat  xidməti