Dekabrın 2-də Milli Məclisdə Türkdilli Ölkələrin Parlament Assambleyasının (TÜRKPA) Sosial, mədəni və humanitar məsələlər  komissiyasının dördüncü iclası keçirildi. Toplantıda Azərbaycan, Qazaxıstan, Türkiyə və Qırğız respublikaları parlamentlərinin deputatları, diplomatlar, TÜRKPA katibliyinin əməkdaşları, TÜRKSOY-un, Türk Şurasının, Beynəlxalq Türk Akademiyasının, Türk Dünyası Bələdiyyələr Birliyinin, Manas Qırğız-Türk Universitetinin, Ahmed Yesevi Qazax-Türk Universitetinin təmsilçiləri, KİV nümayəndələri iştirak edirdilər.
İclası Azərbaycanın TÜRKPA-dakı nümayəndə heyətinin üzvü,  qurumun Sosial, mədəni və humanitar məsələlər komissiyasının sədr müavini Sevinc Hüseynova açdı. Komissiyanın səmərəli fəaliyyət göstərdiyini, müzakirəyə çıxarılmış məsələnin ölkələrimiz arasında əlaqələrin möhkəmləndirilməsində mühüm rol oynayacağını qeyd etdi.
Azərbaycan parlamentinin rəhbərliyi adından qonaqları salamlayan  Milli Məclisin Mədəniyyət komitəsinin sədri, TÜRKPA-nın Sosial, mədəni və humanitar məsələlər komissiyasının üzvü Nizami Cəfərov altı il öncə yaradılmış qurumun keçdiyi inkişaf yolundan söz açdı. Bildirdi ki, TÜRKPA ötən müddətdə hər baxımdan kifayət qədər güclənib, beynəlxalq miqyasda nüfuz qazanıb. Eyni kökdən olan, ortaq milli-mədəni dəyərləri bölüşən dost və qardaş xalqların parlament məclisi ölkələrimiz arasında siyasi, iqtisadi, mədəni və humanitar əlaqələrin genişlənməsinə öz töhfələrini verir. Bu gün TÜRKPA-nın bir sıra nüfuzlu qurumları, Beynəlxalq Türk Akademiyası kimi intellektual beyin mərkəzi var.
Hazırkı dövrdə TÜRKPA məkanında informasiya mübadiləsinin böyük əhəmiyyətini qeyd edən Nizami Cəfərov vurğuladı ki, əlaqələrimizin daha da genişlənməsi üçün ortaq telekanalın qurulması, üzv ölkələrdən hər birində fəaliyyət göstərən televiziya kanallarında türk dünyasından bəhs edən verilişlərin hazırlanması və s. kimi elmi-kütləvi, mədəni tədbirlərin həyata keçirilməsi vacibdir.
Qurumun coğrafiyasına toxunan Nizami Cəfərov Özbəkistan və Türkmənistanın, eləcə də Başqırdıstan, Tatarıstan kimi digər türkdilli dövlətlərin TÜRKPA-ya qoşulmasının arzulandığını dilə gətirdi. Komitə sədri bugünkü toplantıya uğurlar arzuladı və aparılacaq fikir mübadiləsinin, veriləcək tövsiyələrin, qəbul ediləcək qərarların gələcək fəaliyyət üçün faydalı olacağına inam ifadə etdi.
Sonra iclasda gündəliyin qəbulu məsələsinə baxıldı. Sosial, mədəni və humanitar məsələlər komissiyasının üzvləri TÜRKPA-nın üzv dövlətləri arasında məlumat axınının gücləndirilməsinə dair hesabat məruzəsinin və müvafiq tövsiyə qərarının layihələrini, həmçinin təşkilati məsələləri əhatə edən gündəliyi təsdiqlədilər.
  Gündəliyin qəbulundan sonra  Qazaxıstan  parlamentinin  deputatı Aldan Smayl “TÜRKPA-ya üzv  dövlətlər  arasında  məlumat  axınının  gücləndirilməsinə  dair  hesabat  məruzəsi”ni  təqdim  etdi.
Sonra Türk Şurasının layihə direktoru Zamin Əliyev məlumat axının gücləndirilməsi istiqamətində Şuranın fəaliyyəti haqqında məlumat verdi. O qeyd  etdi ki, cari ilin iyun ayında Türk Dünyası Əməkdaşlıq Şurasının IV Zirvə toplantısında Qazaxıstan prezidenti Nursultan Nazarbayev tərəfindən “Ortaq Türk Telekanalı”nın yaradılması təşəbbüsü irəli sürülüb. Bu ilin oktyabr ayında isə koordinasiya qrupunun iclasında kanalın yaradılması barədə qərar qəbul olunub. Telekanalın həm ingilis, həm də türkdilli ölkələrin rəsmi dövlət dillərində fəaliyyət göstərməsi,  “Al Jazira”, “Euronews” kimi beynəlxalq status daşıması nəzərdə tutulur.
Sonra TÜRKSOY-un Azərbaycan təmsilçisi Elçin Cəfərli qurumun  son 20 il ərzində gördüyü işlər barədə məlumat  verdi.
İclasda  çıxış edən Ədliyyə Nazirliyi  Bələdiyyələrlə İş mərkəzinin  rəhbəri, Türk Dünyası Bələdiyyələri Birliyinin həmsədri Mehdi  Səlimzadə  üzv dövlətlərin yerli özünüidarəetmə orqanları arasında mövcud  əlaqələrdən söhbət  acdı. O, qeyd  etdi ki,  qloballaşan dünyada  türk  dövlətləri  arasında sosial, mədəni, humanitar  inkişafın  formalaşması, məlumat  axınının  gücləndirilməsi   olduqca  vacib  və əhəmiyyətlidir.
Komissiyada Manas Qırğız-Türk Universitetinin nümayəndəsi Murat Sadullah Çebi, Ahmed Yesevi Qazax-Türk Universitetinin nümayəndəsi Mehmet Kutalmış  mövzu ilə əlaqədar fikirlərini  bildirdilər.
Sonra qurumun  prosedur qaydalarına uyğun olaraq məruzəyə  dair  - TÜRKPA-ya  üzv dövlətlər arasında məlumat axınının gücləndiirlməsinə dair tövsiyə qərarı qəbul edildi. Komissiyanın 5-ci  iclasının yeri və vaxtı təyin olundu. Bildirildi ki, gələn ilin ikinci yarısında Qazaxıstanın paytaxtı Astanada keçirilməsi planlaşdırılan toplantı “TÜRKPA-ya üzv dövlətlər  arasında ekoloji fəlakət və böhranın idarə olunması sahəsində əməkdaşlıq” mövzusuna  həsr  olunacaq.
Bununla  da  komissiya  öz işini başa  çatdırdı.

Milli Məclisin
Mətbuat  xidməti