Dekabrın 16-da  Milli Məclisin növbəti plenar iclası  keçirildi.  Milli Məclisin Sədri Oqtay Əsədov iclası  açdı. Gündəlik təsdiq edildikdən sonra cari məsələlər ətrafında müzakirələr aparıldı. Millət vəkilləri Musa  Quliyev,  Vahid  Əhmədov, Fazil Mustafa, Zahid Oruc, Fərəc Quliyev, Qüdrət Həsənquliyev, Siyavuş Novruzov, Bəxtiyar Əliyev ölkə  gündəmi ilə əlaqədar vacib məsələlərdən  söz  açdılar.
Sonra gündəlikdəki məsələlərin müzakirəsinə başlandı. Əvvəlcə  “Azərbaycan Respublikası Hökuməti ilə Rusiya Federasiyası Hökuməti arasında sərmayələrin təşviqi və qarşılıqlı qorunması haqqında” Sazişin  təsdiq  edilməsi  barədə qanun  layihəsi ilə əlaqədar Milli Məclisin İqtisadi  siyasət  komitəsinin sədri  Ziyad Səmədzadə məlumat  verdi  və sənəd  səsə  qoyularaq  qəbul  edildi.
Beynəlxalq  münasibətlər  və parlamentlərarası əlaqələr  komitəsinin sədri  Səməd  Seyidov “Azərbaycan, İran İslam Respublikası, Qazaxıstan, Rusiya Federasiyası və Türkmənistan Prezidentlərinin Bəyanatının təsdiq edilməsi haqqında” qanun layihəsini şərh etdi. Layihə Azərbaycanın milli  maraqlarına tam  uyğun olan, ölkəmizin ərazi  bütövlüyünü dəstəkləyən tarixi  Sülh sənədi  kimi  dəyərləndirildi və səsə  qoyularaq  təsdiqləndi.
“Xəzər dənizində fövqəladə halların qarşısının alınması və aradan qaldırılması sahəsində əməkdaşlıq haqqında” Sazişin təsdiq edilməsi barədə Milli Məclis Sədrinin birinci müavini, Təhlükəsizlik və müdafiə  komitəsinin sədri  Ziyafət Əsgərov məlumat verdi. Qeyd  olundu ki, sənəddə  əməkdaşlığın prinsipləri, forma və məzmunu ətraflı  olaraq əksini tapıb.  Milli Məclisin sədr müavini Valeh Ələsgərov “Xəzər dənizinin hidrometeorologiyası sahəsində əməkdaşlığa dair Sazişin təsdiq edilməsi haqqında” və “Xəzər dənizinin su bioloji resurslarının mühafizəsi və səmərəli istifadəsi haqqında” Sazişlərin təsdiq  edilməsi barədə  məlumat verdikdən sonra hər  üç  sənəd  ayrı-ayrılıqda səsə qoyularaq  qəbul  edildi.
Ziyafət  Əsgərov daha sonra Azərbaycan Respublikası Prezidenti və Tacikistan Respublikası Prezidentinin Birgə Bəyannaməsinin təsdiq edilməsi haqqında və “Azərbaycan Respublikası Hökuməti ilə Tacikistan Respublikası Hökuməti arasında mülki müdafiə, fövqəladə halların qarşısının alınması və nəticələrinin aradan qaldırılması sahəsində əməkdaşlıq haqqında” qanun layihələri ilə əlaqədar  fikirlərini  bildirdi. Sənədlər  səsvermə  yolu ilə  təsdiqləndi.
İclasda Aqrar  siyasət  komitəsinin sədri Eldar İbrahimovun “Azərbaycan Respublikası Hökuməti ilə Tacikistan Respublikası Hökuməti arasında bitki karantini sahəsində əməkdaşlıq haqqında” saziş barədə məlumatı  dinlənildi. Komitə  sədri dedi ki, 2014-cü il oktyabrın 16-da prezident İlham Əliyevin Tacikistana rəsmi səfəri zamanı imzalanan sənəd insan sağlamlığı və bitkilərin qorunması baxımından böyük əhəmiyyət kəsb edir. Bitki karantini hər bir dövlətin daima diqqət mərkəzində və nəzarətində olan aqrar bölmənin mühüm sahəsidir. Buradakı hər hansı bir nöqsan  insan tələfatına və bitkilərin məhvinə səbəb ola, həm də  ölkə iqtisadiyyatına külli miqdarda ziyan vura bilər. Saziş bu istiqamətdə  əməkdaşlığın gücləndirilməsi üçün mühüm rol oynayır. Qeyd  olundu ki, 13 maddədən ibarət olan sazişdə bitki karantini sahəsində əməkdaşlıq üçün  vacib olan amillər əksini tapıb.  Qanun layihəsi  səsə  qoyularaq  qəbul  edildi.
Sonra İqtisadi  siyasət  komitəsinin sədri Ziyad  Səmədzadə  “Vergi məsələləri üzrə qarşılıqlı inzibati yardım haqqında” Konvensiyaya düzəlişlər edilməsi haqqında” Protokolun təsdiq edilməsi barədə qanun layihəsinin  əhəmiyyətli məqamlarından söz  açdı.  Sənəd  qəbul  edildi.
Su Məcəlləsində dəyişiklik edilməsi haqqında danışan Milli Məclisin Sədr müavini Valeh Ələsgərov ölkə Prezidenti İlham Əliyevin  qanunvericilik təşəbbüsü  qaydasında daxil olduğunu bildirdi. Vitse-spiker təklif  edilən  dəyişikliklərin mahiyyətini açıqladı. Bu sənəd  də millət  vəkillərinin  yekdil razılığı ilə qarşılandı. 
 “Hərbi qulluqçuların dövlət icbari şəxsi sığortası haqqında” Qanunda dəyişikliklər edilməsi barədə  məlumat  verən Ziyad  Səmədzadə  bildirdi ki, sənəd “İcbarı  sığortalar  haqqında”  qanuna  uyğunlaşdırma  məqsədi daşıyır. Millət  vəkilləri Fəzail Ağamalı, Leyla Abdullayeva,  Bəxtiyar  Əliyev  sənədlə əlaqədar   fikirlərini  bildirdilər.  Qanun  layihəsi səsə  qoyularaq  qəbul  edildi.
 Bundan  sonra  Ziyad  Səmədzadə  “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında”  və “Məhkəmə və hüquq mühafizə orqanları işçilərinin dövlət icbari şəxsi sığortası haqqında” qanunlarda dəyişiklik edilməsi barədə məlumatı  diqqətə  çatdırdı.  Bildirildi ki,   qanun layihələrinə əsasən sığortaçı müvafiq  riskləri  nəzərə  alaraq  sığorta  etdirməkdən imtina  edə bilməz. Sənədlər  qəbul  edildi.
Sonra  “Yol hərəkəti haqqında” Qanunda dəyişikliklər edilməsi barədə qanun layihəsi haqqında Hüquq  siyasəti  və  dövlət  quruculuğu  komitəsinin sədri  Əli Hüseynli ətraflı məlumat verdi. Qeyd  olundu ki,  qanunun 83-cü  maddəsində edilən dəyişikliyə görə yollarda hərəkət təhlükəsizliyinin təmin edilməsinə nəzarət müvafiq icra hakimiyyəti  orqanının əməkdaşları tərəfindən stasionar  və digər postlarda, xüsusi avadanlığı olan nəqliyyat vasitələri və xüsusi texniki vasitələrin tətbiqi ilə həyata keçirilir. Yol hərəkəti qaydaları əleyhinə olan inzibati xətaların aşkarlanmasında istifadə olunan, foto və ya video qeydiyyat funksiyalarına malik xüsusi texniki vasitələr müvafiq icra hakimiyyəti orqanının mərkəzi informasiya  sisteminə inteqrasiya olunmalıdır. Sənəd  müzakirələrdən  sonra  qəbul  edildi.
“Kütləvi informasiya vasitələri haqqında” qanuna edilən  dəyişikliklər  geniş  müzakirələrə  səbəb oldu.  Sənədlə bağlı  İnsan hüquqları  komitəsinin sədri Rəbiyyət Aslanova məlumat verərək bildirdi ki, dəyişikliklər kütləvi informasiya vasitələrinin işində münasibətlərin daha təkmil tənzimlənməsi məqsədini daşıyır. Sənədə görə, əvvəl təsis edilmiş mətbu nəşrlə oxşar ada malik olan mətbu nəşrlərin fəaliyyətinə yol verilməyəcək. Bu məqsədlə qanuna “oxşar ad” anlayışı daxil edilir. Sənədin 19-cu maddəsinə edilən dəyişikliyə görə isə kütləvi informasiya vasitələrinin xarici ölkənin dövlət orqanı, fiziki və ya hüquqi şəxsi tərəfindən qanuna zidd şəkildə maliyyələşdirilməsini aşkar etmiş qurumların məlumatları daxil olduqda və kütləvi informasiya vasitəsi məhkəmənin qərarı ilə qərəzli yazılara görə il ərzində iki dəfə məsuliyyətə cəlb edildikdə onun istehsalına və yayımına xitam verilməsi barədə məhkəmə qarşısında iddia qaldırıla bilər.
Sənədlə əlaqədar Milli Məclis  sədrinin müavini Bahar Muradova    fikirlərini  bildirdi. O, qeyd  etdi ki, mətbuat  sahəsində məsuliyyətin möhkəmləndirilməsi digər sahələrə nisbətən daha vacibdir. Azərbaycan jurnalistikasında mətbuatdan  tələb olunan odur ki, milli maraqları məhz ölkədən kənarda, həmin informasiyaların getdiyi qurumlarda qoruma imkanlarından yararlansınlar. Bu istiqamətdə ixtisaslaşsınlar. Təkcə Azərbaycan içində qruplararası vasitəçiyə çevrilməsinlər və ölkənin maraqlarını xarici mətbuat səhifələrində də qorusunlar. Çünki bir söz bütün toplumu yerindən oynada bilir, bir söz ordunu döyüşə ruhlandıra bilir, bir söz kütləni tamamilə ruhdan sala bilər. Ona görə də hər bir sözün məsuliyyətini daşımaq media  mənsubunun mənəvi və hüquqi borcudur. Bu məsuliyyətin ciddiləşməsindən heç də çəkinmək lazım deyil. Bu  sənəd  də  ətraflı müzakirə  edilərək   qəbul  edildi.
İclasda Miqrasiya, Ticarət Gəmiçiliyi  və İnzibati  Xətalar Məcəllələrinə, “Yol hərəkəti haqqında, “İnformasiya əldə etmək haqqında”, “Sağlamlıq imkanları məhdud şəxslərin təhsili (xüsusi təhsil) haqqında” “Dövlət əmlakının özəlləşdirilməsi haqqında” qanunlarda  edilən  dəyişikliklər  də  millət  vəkilləri  tərəfindən  nəzərə  alındı.
“Dərman vasitələri haqqında” qanunda dəyişikliklər edilməsi barədə qanun layihəsi haqqında məlumat  verən  Sosial  siyasət  komitəsinin  sədri Hadi Rəcəbli bildirdi ki,  qanuna  əlavə edilən yeni maddəyə əsasən dövlət qeydiyyatına alınmış dərman vasitələrinin tarif və qiymətlərinin tənzimlənməsi, həmin qiymətlərə dövlət  tərəfindən nəzarətin həyata keçirilməsi qaydaları müəyyən ediləcək. Komitə  sədri vurğuladı ki, indiyə kimi rayonlara ayrılan dərman vasitələri ilə bağlı vəsaitlər rayonların büdcəsində cəmləşirdi. Növbəti ilin büdcəsində bu vəsaitlərin bir əldə cəmləşməsi və bunun  Səhiyyə Nazirliyi vasitəsilə həyata  keçirilməsi nəzərdə tutulur. Bundan  sonra  müxtəlif  regionlarda dərmanların qiymətlərində olan fərqlər  də aradan  qaldırılacaq. Sənəd  səsvermə  yolu ilə qəbul  edildi.
İclasın  sonunda  “Bələdiyyələrin statusu haqqında”, “Bələdiyyə torpaqlarının idarə edilməsi haqqında”, “Bələdiyyələrin maliyyəsinin əsasları haqqında”,  Azərbaycan Respublikasının 2003-cü il 17 iyun tarixli 478-IIQ nömrəli Qanunu ilə təsdiq edilmiş “Bələdiyyələrin  vergi xidməti orqanı haqqında Əsasnamə”də dəyişiklik edilməsi barədə Azərbaycan Respublikası qanununun layihələri haqqında Regional məsələlər komitəsinin sədri Arif  Rəhimzadə məlumat verdi. Bildirildi ki, bu sənədlər bələdiyyələrin  fəaliyyətində mövcud olan boşluqların aradan qaldırılmasına  xidmət  edəcək.  Hər  bir  sənəd  ayrı-ayrılıqda  səsə  qoyularaq  təsdiqləndi.
Bununla  da  Milli Məclis bugünkü  işini başa  çatdırdı.

Milli Məclisin
Mətbuat  xidməti