Aprelin 20-də  Milli Məclisin İnsan  hüquqları komitəsinin  növbəti iclası   keçirildi. İclası  açan komitə  sədri  Rəbiyyət Aslanova  gündəlikdə olan “Vətəndaşların müraciətləri haqqında”  qanun layihəsi ilə bağlı ətraflı  danışdı. Bildirildi ki, 1997-ci ildə qəbul olunmuş “Vətəndaşların müraciət qaydaları haqqında” qanun tamamilə yenidən işlənmiş, sənədin birinci  oxunuşda  müzakirəsi zamanı millət  vəkilləri  və mütəxəssilər  tərəfindən  verilən  bütün dəyərli  təkliflər  nəzərə  alınmış, layihə daha da təkmilləşdirilmişdir.
Komitə  sədri onu da  vurğuladı ki,  sənəd ölkə vətəndaşlarının müraciət etmək hüququnun həyata keçirilməsi ilə bağlı hüquqi münasibətləri tənzimləyir, vəzifəli şəxslərin müraciətlərə baxması qaydalarını müəyyən edir. 17 maddədən ibarət layihədə vətəndaşların müraciətlərinə baxılmasının əsas prinsipləri, baxılma müddəti, vətəndaşların qəbul edilməsi qaydaları və digər vacib məsələlər əksini tapır. Hər bir maddədə vətəndaşların konstitusion hüquqlarının qorunmasına  xidmət  edir. Burada vətəndaşların müraciət etmək hüququnun həyata keçirilməsi ilə bağlı hüquqi münasibətləri tənzimləyən, vəzifəli şəxslərin müraciətlərə baxması qaydasını müəyyənləşdirən 10-dan çox müraciət forması var. Layihədə  qanunun tələblərinin pozulmasına görə şəxslərin Mülki, İnzibati Xətalar və Cinayət məcəllələrinə uyğun olaraq məsuliyyət daşımaları  prinsipləri də əks  olunmuşdur.
İclasda Milli Məclisin Hüquq siyasəti və dövlət quruculuğu komitəsinin sədri Əli Hüseynli, Azərbaycan Respublikasının İnsan hüquqları üzrə müvəkkili (ombudsman) Elmira Süleymanova, deputatlardan Yevda Abramov, Rəfael Cəbrayılov çıxış edərək sənədin əhəmiyyətindən danışdılar, təklif və tövsiyələrini səsləndirdilər. Bildirildi ki, bu gün ölkədə gedən sürətli proseslər vətəndaşla dövlət arasında daha səmərəli münasibətlərin yaranması üçün yeni qanun layihəsinin hazırlanmasını zəruri etmişdir. Yeni sənədin əhatə dairəsi mövcud qanundan xeyli genişdir. Vətəndaşlar hər zaman müraciət hüququndan istifadə edə biləcəklər.
Ətraflı müzakirələrdən sonra qanun layihəsinin Milli Məclisin plenar iclasına tövsiyə edilməsi qərara  alındı.

 

Milli Məclisin
Mətbuat  xidməti