Sentyabrın  17-də  Milli Məclisin  Elm və təhsil  komitəsinin payız  sessiyasında  ilk  iclası  keçirildi.
 Komitə  sədri  Şəmsəddin Hacıyev 2015-ci ilin yaz sessiyası dövründə komitədə görülən işlərin hesabatını  təqdim etdi. Qeyd  olundu ki,  ötən  sessiya  ərzində komitə səmərəli fəaliyyət göstərib, beynəlxalq qurumlarla əməkdaşlıq genişləndirilib.  Şəmsəddin Hacıyev  “Elm haqqında” qanun layihəsinin  hazırlanaraq ilk oxunuşda Milli Məclisin  müzakirəsinə  çıxarılmasını komitənin ən uğurlu  işlərindən biri kimi dəyərləndirdi. Vurğulandı ki,  sənədin parlamentdə müzakirəsi zamanı millət vəkillərinin səsləndirdiyi təklif və tövsiyyələr, eləcə də müxtəlif qurumlar tərəfindən alınan rəylər araşdırılaraq müzakirə olunub. Bunlardan müvafiq sayılanlar sənəddə əksini tapacaq. Qanun layihəsi növbəti oxunuşda Milli Məclisin plenar iclasında müzakirəyə çıxarılmağa hazırdır. Komitə sədri əlavə  etdi ki,  payız sessiyasında da əsas diqqət yeni hazırlanan  bu  sənədə  yönəldiləcək. Deputatlar  komitənin yaz sessiyası dövründəki fəaliyyətini qənaətbəxş qiymətləndirdilər.
 Sonra  iclasda 2015-ci ilin payız sessiyası üçün iş planına baxıldı və  təsdiqləndi.
Komitə  üzvləri “Təhsil haqqında” və “Milli arxiv fondu haqqında” qanunlara təklif olunan redaktə xarakterli dəyişiklikləri də müzakirə  etdilər.
Müzakirə olunan sənədlərin Mili Məclisin plenar  iclasına  cıxarılması qərara  alındı.

Milli Məclisin
Mətbuat  xidməti