Komitənin sədri Hadi Rəcəbli bildirdi ki, gündəliyə iki məsələ daxil edilmişdir. Gündəlikdəki birinci məsələ - “Sosial siyasət komitəsinin 2015-ci il yaz sessiyasının yekunları və 2015-ci il payız sessiyasının qanunvericilik işləri planı” barədədir.  Hadi Rəcəbli 2015-ci ilin yaz sessiyası dövründə komitədə görülən işlərdən danışaraq diqqətə çatdırdı ki, ötən sessiyada komitəyə 575 ərizə və müraciət daxil olmuş, 266 vətəndaş qəbul edilmişdir. Daxil olmuş ərizə və müraciətlərə baxılmış, lazımi tədbirlər görülmüşdür. Sessiya ərzində komitədə bir sıra qanun layihələrinə baxılaraq Milli Məclisin plenar iclasına tövsiyə olunmuşdur.  Qarşıdan gələn payız sessiyasında isə ölkə Prezidentinin qanunvericilik təşəbbüsü qaydasında təqdim edəcəyi qanun layihələrinə, həmçinin 2016-cı ilin dövlət büdcəsi haqqında qanun layihəsinə baxılacaqdır. Sessiya ərzində komitədə “Optika və optik eynəklər(optometriya) haqqında” və digər qanun layihələrinin hazırlanması da nəzərdə tutulmuşdur.

Qeyd olundu ki, iclasın gündəliyindəki ikinci məsələ “Özəl tibb fəaliyyəti haqqında” Qanuna dəyişikliklər edilməsi barədədir. Bildirildi ki,  bu dəyişikliklər “Özəl tibb fəaliyyəti haqqında” Qanunu “Əhalinin sağlamlığının qorunması haqqında” Qanuna dəyişikliklər edilməsi barədə 2015-ci il 24 fevral tarixli Qanuna uyğunlaşdırmaq məqsədi daşıyır.

Çıxış edən deputatlar gündəlikdəki bütün məsələləri müsbət qiymətləndirdilər. İclasın sonunda gündəlikdəki hər 2 məsələ Milli Məclisin iclasında müzakirəyə tövsiyə edildi.