Aprelin 2-də  Milli Məclisdə  “Avronest”  Parlament  Assambleyasının  növbəti  sessiyası  çərçivəsində Siyasi  məsələlər, insan  hüquqları və  demokratiya  üzrə  komitənin  iclası keçirildi.
İclasda  komitənin həmsədrləri Gunnar Hökmark və xanım Çiora Taktakaşvili tədbirə ev sahibliyi edən Azərbaycana minnətdarlıqlarını bildirdilər. Qeyd olundu ki, Azərbaycan sürətlə inkişaf edən, Avropaya inteqrasiya edən bir ölkədir. Bu inkişaf avropalı deputatlar tərəfindən çox yüksək qiymətləndirlir.  
Tədbirdə iştirak edən Azərbaycanın xarici işlər  naziri Elmar Məmmədyarov Azərbaycan ərazilərinin 20 faizinin işğal altında olduğunu, bir milyondan çox soydaşımızın qaçqın və məcburi köçkün vəziyyətində yaşadığını vurğulayaraq Dağlıq Qarabağ münaqişəsinin həllinin yalnız ölkəmizin ərazi bütövlüyü çərçivəsində mümkünlüyünü  bildirdi.
Sonra nazir vurğuladı ki, bu gün Azərbaycanın qonşu ölkələrlə, xüsusilə də Rusiya və Gürcüstanla yaxşı strateji tərəfdaşlıq münasibətləri inkişaf edir. O, Azərbaycanın təşəbbüsü və iştirakı ilə həyata keçirilən iri miqyaslı layihələrdən söz açdı, Bakı-Tbilisi-Ceyhan neft, Bakı-Tbilisi-Ərzurum qaz kəmərlərinin, eləcə də Bakı-Tbilisi-Qars dəmir yolu xəttinin əhəmiyyətini xüsusi qeyd etdi. Bildirildi ki, Bakı-Tbilisi-Qars dəmir yolu xətti ilə ilk qatar bu ilin sonunda Bakıdan yola düşəcək. Ölkəmizin Gürcüstan iqtisadiyyatının müxtəlif sahələrinə sərmayə qoyduğu, hazırda Azərbaycan Dövlət Neft Şirkətinin Gürcüstanın ən böyük vergi ödəyicilərindən biri olduğu diqqətə çatdırıldı. Sonra məruzə ətrafında fikir mübadiləsi aparıldı, Elmar Məmmədyarov avropalı deputatların suallarını cavablandırdı.
İclasda  quruma  üzv ölkələrin nümayəndələrinin  çıxışları  dinlənildi.

Milli Məclisin
Mətbuat xidməti