Dekabrın 1-də Milli Məclisin beşinci çağırış yeni tərkibdə növbəti iclası  keçirildi. İclası  açan parlament  Sədri  Oqtay  Əsədov bildirdi ki,  Azərbaycan Prezidenti İlham Əliyevin rəhbərliyi altında həyata keçirilmiş islahatlar, ölkəmizin demokratik inkişafı parlament seçkilərinin də azad və ədalətli keçirilməsi üçün lazımi şərait yaratmışdır.  Bu  demokratik  və şəffaf  seçkilərin  nəticəsi olaraq ölkəmizin beşinci  çağırış Milli Məclisi  uğurla  formalaşmışdır. Seçkiləri  müşahidə  edən  çoxsaylı  müşahidəçilər  seçkilərin azad  keçirildiyini  vurğulamış, nəticələri  yüksək  dəyərləndirmişlər. Oqtay Əsədov deputatlar adından parlament seçkilərinin yüksək səviyyədə keçirilməsinə görə Mərkəzi Seçki Komissiyasının rəhbərliyinə,  üzvlərinə və MSK aparatının əməkdaşlarına dərin minnətdarlığını bildirdi. Spiker 2005-ci ildən deputat vəsiqələrinin ilk dəfə olaraq Milli Məclisdə deputatlara təqdim olunduğunu xatırlatdı və bu ənənənin davam etdirildiyini qeyd  etdi.
İclasda çıxış edən Mərkəzi  Seçki Komissiyasının sədri Məzahir Pənahov ölkəmizdə noyabrın 1-də  keçirilən Milli Məclisə seçkilərdə mandat qazanan  millət  vəkillərini  təbrik  etdi,  onlara  gələcək  fəaliyyətlərində uğurlar arzuladı. O, demokratik, azad  və şəffaf seçkilərin hər bir ölkədə cəmiyyətin güzgüsü  olduğunu qeyd  etdi. Azərbaycanın  bütün  coğrafiyasını  əhatə  edən parlament  seçkilərində  yerli  və beynəlxalq müşahidəçilərin, kütləvi informasiya  vasitələri  nümayəndələrinin  fəaliyyətini  yüksək dəyərləndirdi, onlar  üçün   bütün  lazımi şəraitin yaradıldığını vurğuladı. Məzahir  Pənahov seçkilərdə  beynəlxalq seçki  standartlarına  uyğun  tələb və normaların tam olaraq  yerinə  yetirilməsinin  ölkə  rəhbərliyinin  siyasi  iradəsinin bariz nümunəsi olduğunu  diqqətə  çatdırdı.  Buna  görə Azərbaycan  Prezidenti  İlham Əliyevə  minnətdarlığını ifadə  etdi,  beşinci çağırış Milli Məclisin Azərbaycan xalqına layiqincə xidmət edəcəyinə əminliyini bildirdi.
Sonra Məzahir  Pənahov Milli Məclisin Sədri Oqtay Əsədova, Sədrin birinci müavini Ziyafət Əsgərova, müavinlər Bahar Muradovaya, Valeh Ələsgərova və digər  millət  vəkillərinə  deputat vəsiqələrini təqdim etdi. 
Vəsiqələrin təqdimatından sonra gündəlikdəki məsələlərin  müzakirəsinə başlanıldı. İclasda Milli Məclisin İntizam komissiyası təşkil olundu. Komissiyanın  tərkibi   deputatlar – Ağacan Abiyev, Xanlar Fətiyev, Məlahət İbrahimqızı, Mirkazım Kazımov, Səttar Möhbalıyev, Fazil  Mustafa və Kamran  Nəbizadədən ibarət  olaraq  formalaşdırıldı.  Yeni  tərkibdə  komissiyanın  təşkili  millət  vəkilləri  tərəfindən  etirazsız  qarşılandı.
Sonra İsa  Həbibbəylinin  Elm  və  təhsil komitəsinin  sədri  seçilməsi ilə  əlaqədar  onun Milli Məclisin Hesablayıcı  Komissiyasının tərkibindən çıxarılması və  Fəttah  Heydərovun  Hesablayıcı  Komissiyanın  üzvü seçilməsi  məsələsinə  baxıldı.   Bu  qərar da  yekdilliklə  qəbul  edildi.
İclasda daha  sonra “Milli Məclis  komitələrinin  sədr  müavinlərinin seçilməsi haqqında”  qərar  layihəsi  müzakirə olundu. Səsvermə  yolu ilə Rövşən Rzayev Hüquq  siyasəti  və  dövlət  quruculuğu,  Aydın Mirzəzadə Müdafiə, təhlükəsizlik və korrupsiya ilə mübarizə, Ağalar Vəliyev İqtisadi siyasət, sənaye və sahibkarlıq, Kamran Nəbizadə Təbii  ehtiyatlar, energetika  və  ekologiya, Eldar  Quliyev Aqrar  siyasət, Rauf Əliyev Əmək və  sosial  siyasət,  Fəttah Heydərov Regional  məsələlər, Bəxtiyar  Əliyev Elm  və təhsil,  Jalə Əliyeva Mədəniyyət, Yevda Abramov İnsan  hüquqları, Sevinc  Fətəliyeva  Beynəlxalq  münasibətlər  və parlamentlərarası əlaqələr,  Musa Quliyev Səhiyyə, Sahibə Qafarova Ailə, qadın və uşaq  məsələləri, Xanlar Fətiyev İctimai birliklər və dini  qurumlar, Ülvi Quliyev isə Gənclər  və idman  komitələrinin  sədr  müavinləri   seçildilər.
Sonra iclasda Milli Məclisin komitələrinin və Milli Məclis  yanında Toponimiya  Komissiyasının  tərkibi  formalaşdırıldı və bu  barədə qərar  qəbul olundu.
Bununla  da  Milli Məclisin  bugünkü iclası öz işini başa  çatdırdı. 

Milli  Məclisin
Mətbuat  xidməti