Dekabrın 2-də Milli Məclisin Hüquq siyasəti və dövlət quruculuğu, İctimai birliklər və dini qurumlar komitələrinin birgə  iclası  keçirildi. 
Əvvəlcə İctimai birliklər və dini qurumlar komitəsinin sədri Siyavuş Novruzov yeni hazırlanan “Dini ekstremizmə qarşı mübarizə haqqında” qanun layihəsinin yaranma  zərurəti  barədə  ətraflı danışdı. Bildirildi ki, dünyada və Azərbaycan daxilində baş verən hadisələr dini ekstremizmlə bağlı məsələlərə xüsusi yanaşma tələb edir.  Son  vaxtlar müxtəlif adlar altında ölkələrə zərərli ideyalar ixrac olunur,  öz  təxribatçı ideyalarına din donu geyindirən hərəkatlar sürətlə  artır.  Komitə  sədri  məhz  bu  səbəbdən belə şəxslərə qarşı cəzaların  sərtləşdirilməli olduğunu  vurğuladı. Qeyd  olundu  ki, hər  iki komitənin birgə  hazırladığı  sənəd  3 fəsil 15 maddədən ibarətdir. Yeni qanun layihəsi ölkədə  dini  ekstremizmə  qarşı  mübarizənin  hüquqi və təşkilati əsaslarını  müəyyən edəcək, bu mübarizəni həyata  keçirən  orqan  və vətəndaşların hüquq və  vəzifələrini  tənzimləyəcək.
Layihəyə əsasən, dini ekstremizmə qarşı mübarizədə iştirak edən şəxs xüsusi əməliyyat zamanı vurulmuş ziyana görə məsuliyyət daşımır.
“Azərbaycan   Respublikasının  vətəndaşlığı  haqqında”  qanun  layihəsinə  edilən  dəyişikliklərlə  bağlı məlumat verən Milli Məclis  Aparatının əməkdaşı Sarvan  Sadıqov  bildirdi ki,  sənəddəki  yeniliklər  ölkə  vətəndaşları  tərəfindən  yol verilə bilən  terror  fəaliyyətinə,  Konstitusiya  quruluşu əleyhinə  hərəkətlərə, habelə  dini  ekstremist   fəaliyyətə  qarşı  mübarizənin  gücləndirilməsi ilə  bağlıdır. Bununla  əlaqədar qanuna  iki yeni maddə  əlavə  edilmişdir.
Sonra  iclasda  Hüquq  siyasəti  və  dövlət  quruculuğu  komitəsinin sədri  Əli  Hüseynli  ölkədə  dini ekstremizm meyllərinin qarşısının alınması  məqsədi  ilə “Polis  haqqında” qanuna, İnzibati  Xətalar Məcəlləsinə  edilən  dəyişikliklərlə  bağlı  danışdı.  Qeyd  olundu  ki, bu  sənədlərdəki   dəyişikliklər  ümumi orta  təhsildə  şagirdlərin dərsə  davamiyyətini təmin etmək,  onların  təhsil  müddətində  digər fəaliyyətlərə  cəlb  edilmələrinin  qarşısını  almaq  məqsədi ilə edilib.
Komitələrin  birgə  iclasında Cinayət  Məcəlləsində  aparılan dəyişiklik də müzakirə  edildi.  Qeyd  olundu ki,  əcnəbi və vətəndaşlığı olmayan şəxs tərəfindən dini təbliğat aparılarsa həmin şəxslər 1 ildən 2 ilədək müddətə azadlıqdan məhrumetmə ilə cəzalandırılacaq.
Sonra “Dini etiqad azadlığı haqqında” qanuna edilən  dəyişikliklə bağlı   məlumat  verildi.  Azərbaycanda bundan sonra ibadətgahlardan kənarda, ictimai yerlərdə dini şüarların və digər dini atributların (şəxsin üstündə gəzdirdiyi dini atributlar istisna olmaqla) nümayiş etdirilməsi qadağan olunur. Qanuna  bununla bağlı yeni maddə əlavə edildiyi  vurğulandı. Yeni əlavəyə görə, dini bayraqlar yalnız ibadətgahlar, dini mərkəz və idarələrin üzərində yerləşdirilə bilər. İslam dininə aid olan ayin və mərasimlər yalnız Azərbaycan vətəndaşları tərəfindən həyata keçirilə bilər. Xaricdə dini təhsil alan vətəndaşların belə mərasimləri aparması qadağan edilir. Bununla  əlaqədar  Cinayət Məcəlləsinə  168-1 maddəsi əlavə  edildiyi bildirildi. Düzəlişdə əsasən, bu  tələb  pozularsa  həmin şəxsə 1000 manatdan 5 000 manata qədər cərimə və ya 1 il azadlıqdan məhrumetmə cəzası tətbiq olunacaq.
İclasda  iştirak  edən  Dini  Qurumlarla  İş  üzrə  Dövlət  Komitəsinin  sədr  müavini Gündüz  İsmayılov, Qafqaz Müsəlmanları  İdarəsinin  nümayəndəsi  Simran Həsənov çıxış  edərək ölkədə  vüsət  almağa  başlayan dini  radikalizmlə mübarizə,  bu  sahədə aparılan  işlər  barədə  danışdılar.
Sonda  Hüquq  siyasəti  və  dövlət  quruculuğu  komitəsinin  sədri Əli Hüseynli “Azərbaycan  Respublikası  Fövqəladə  Hallar  Nazirliyinin on illiyi (2005-2015) yubiley  medalının  təsis  edilməsi ilə əlaqədar   “Orden  və medalların  təsis  edilməsi  haqqında”  qanuna  edilən  dəyişiklikləri  diqqətə  çatdırdı.  Bildirildi ki, fövqəladə  hallar  orqanlarının  fəaliyyətinin təşkilində,  inkişafında və  möhkəmləndirilməsində  xüsusi xidmətləri olan, mülki  müdafiə  işinin  təşkilində,  ərazilərin  fövqəladə  hallardan  qorunmasında, belə  halların  aradan qaldırılması  tədbirlərinin həyata keçirilməsində  fərqlənən  insanlar  bu medalla  təltif  olunacaqlar. 
Ətraflı  müzakirələrdən  sonra   sənədlərin  Milli Məclisin  plenar iclasına tövsiyə edilməsi  qərara  alındı.

Milli Məclisin
Mətbuat  xidməti