AQRAR SİYASƏT KOMİTƏSİNİN İCLASINDA
![](https://meclis.gov.az/photos/blank.jpg)
Dekabrın 4-də Milli Məclisin Aqrar siyasət komitəsinin yeni tərkibdə ilk iclası keçirildi. Komitə sədri Eldar İbrahimov komitə üzvlərini noyabrın 1-də keçirilən parlament seçkilərində qazandıqları qələbə münasibəti ilə təbrik etdi, qarşıdakı beşillik fəaliyyətlərində onlara uğurlar arzuladı.
İclasda əvvəlcə “Kənd təsərrüfatının kooperasiyası haqqında” qanun layihəsi müzakirə edildi. Eldar İbrahimov qeyd etdi ki, sənəd Azərbaycan Prezidenti İlham Əliyevin qanunvericilik təşəbbüsü qaydasinda parlamentə daxil olub. Bildirildi ki, Prezident tərəfindən son illərdə kənd təsərrüfatı sahəsi ilə bağlı imzalanan fərman və sərəncamlar, bu sahədə əmək məhsuldarlığının, bitkiçilik və heyvandarlığın inkişafına xidmət edən dövlət proqramlarının qəbulu qanunun məqsəd və vəzifələri ilə üst-üstə düşür. Sənəd kənd təsərrüfatında kooperasiya hərəkatını gücləndirməyi, kooperativlərin yaranması və fəaliyyətinə aid münasibətləri tənzimləyəcək. Bunun üçün ölkəmizdə kifayət qədər geniş imkanlar var.
Layihə ilə bağlı fikirlərini bildirən millət vəkilləri Eldar Quliyev, Tahir Süleymanov, Hüseynbala Mirələmov, Novruzəli Aslanov, kənd təsərrüfatı nazirinin müavini Seyfəddin Talıbov qanun layihəsinin əhəmiyyətindən danışdılar, sənədin tətbiq dairəsi, kooperativlərin yaradılması, əmlakı, mənfəəti, pay fondu, əmlak məsuliyyəti barədə təkliflərini bildirdilər.
“Torpaqların dövlət ehtiyacları üçün alınması haqqında” qanunda dəyişiklik edilməsi barədə sənədlə bağlı verilən şərhdə qeyd olunurdu ki, bu “Dəniz limanları haqqında” qanunda və ölkə Prezidentinin 2006-cı il 20 aprel tarixli Fərmanı ilə təsdiq edilmiş “Azərbaycan Dövlət Dəniz Administrasiyası haqqında” Əsasnamədə dəyişikliklər edilməsi barədə sənədlərin icrasını təmin etmək məqsədilə aparılıb.
İclasda Torpaq Məcəlləsinə və İnzibati Xətalar Məcəlləsinə edilən dəyişikliklərlə bağlı məlumat verən Milli Məclis Aparatının əməkdaşı Vilayət Əlizadə bildirdi ki, hər iki sənədin hazırlanması Xəzər dənizinin Azərbaycana mənsub olan bölməsində dövlət sərhəddinin mühafizəsini daha səmərəli həyata keçirmək məqsədi daşıyır.
Sonra komitədə “Tütün və tütün məhsulları haqqında”, “Üzümçülük və şərabçılıq haqqında”, “Pambıqçılıq haqqında” sənədlərdə edilən dəyişikliklərə bağlı məlumat verildi. Qeyd olundu ki, bu sənədlərə edilən əlavə və dəyişikliklər 2015-ci ilin 28 aprel tarixində İnzibati Xətalar Məcəlləsinə edilən dəyişikliklərin tətbiqi ilə bağlıdır. Sənədə görə genetik modifikasiya olunmuş bitkilərin, gen mühəndisliyi metodları və ya biotexnoloji üsullarla əldə olunan kənd təsərrüfatı bitkilərinin bilərəkdən ölkəmizə idxal edilməsinə və satışına görə məsuliyyət müəyyən edilmişdir.
İclasın sonunda Torpaq Məcəlləsinə edilən dəyişikliklərə baxıldı. Bildirildi ki, sənəd Məcəlləni təkmilləşdirmək məqsədi ilə işlənib. Sənədin 50-ci maddəsinin aşağıdakı redaksiyada təklif olunduğu bildirildi: “Torpaqdan istifadə qısamüddətli və uzunmüddətli olur. Qısamüddətli istifadə on beş ilədək müəyyən oluna bilər, uzunmüddətli istifadə isə xüsusi mülkiyyət olan torpaqlar üçün 99 il, dövlət və bələdiyyə mülkiyyətində olan torpaqlar üçün isə on beş ildən 49 ilədək müəyyən oluna bilər.”
Sonda müzakirə edilən bütün sənədlər Milli Məclisin plenar iclasına tövsiyə edildi.
Milli Məclisin
Mətbuat xidməti