Fevralın 1-də  Milli Məclisin  2016-ci il yaz  sessiyasında ilk plenar iclası  keçirildi. Parlamentin spikeri  Oqtay Əsədov  iclası  açıq  elan  etdikdən  sonra Azərbaycanın  Dövlət  himni  səsləndirildi.
Sonra millət vəkilləri sabiq  deputat, görkəmli ictimai-siyasi xadim,  akademik Cəlal Əliyevin  əziz  xatirəsini  bir  dəqiqəlik  sükutla  yad  etdilər.
Gündəliyin  təsdiqindən sonra  müzakirələrə  başlanıldı. Əvvəlcə Milli Məclisin İntizam Komissiyasının yenidən təşkil  edilməsi haqqında  sənədə  baxıldı. Deputatlar Ağacan Abıyev, Xanlar Fətiyev, Məlahət İbrahimqızı, Mirkazım Kazımov, Səttar Mehbalıyev, Fazil Mustafa və Kamran Nəbizadə komissiyanın yeni  tərkibinə daxil edildi.
İclasda Milli Məclisin Hesablayıcı Komissiyasının yeni tərkibi  formalaşdırıldı.  Komissiyanın  yeni  tərkibi Fəttah Heydərov, Qüdrət Həsənquliyev, Rafael Hüseynov, Xanhüseyn Kazımlı, Zahid Oruc, Sədaqət Vəliyeva və Mixail Zabelindən ibarət  oldu.  Hər  iki qərar qəbul olundu.
Gündəlikdə  duran 3-cü  məsələ  Milli Məclis komitələrinin  yenidən formalaşdırılması  barədə  qərar  layihəsi  idi.  Milli Məclisin Sədri  Oqtay Əsədov  bildirdi ki,  dünya  təcrübəsində   bir komitədə təmsil olunan deputat  digər komitələrdə də təmsil olunmaq üçün  şəxsi  arzusu ilə  müraciət  edə bilər.  Bununla  əlaqədar Milli Məclisin Daxili Nizamnaməsində müvafiq  dəyişikliklər  edilib. Millət  vəkillərindən bu cür istəklə müraciət  edənlər  olduğu  üçün komitələrin  tərkibinə  yenidən  baxılıb. Öz  müraciətlərinə  əsasən Məlahət İbrahimqızı və Tahir Kərimli Milli Məclisin Hüquq siyasəti və dövlət quruculuğu komitəsinin, Xanlar Fətiyev və Vüsal Hüseynov Müdafiə, təhlükəsizlik və korrupsiya ilə mübarizə komitəsinin, Mirzəcan Xəlilov İqtisadi siyasət, sənaye və sahibkarlıq komitəsinin, Fuad Muradov Təbii ehtiyatlar, energetika və ekologiya komitəsinin, Cavanşir Paşazadə Aqrar siyasət komitəsinin, Sevinc Hüseynova və Musa Quliyev Əmək və sosial siyasət komitəsinin üzvü oldular. Bundan başqa, Ülviyyə Ağayeva, Sona Əliyeva, Elşad Həsənov və Asim Mollazadə Elm və təhsil komitəsinin, Aqil Abbas, Əflatun Amaşov, Novruzəli Aslanov, Cavanşir Feyziyev, Ziyad Səmədzadə və Mixail Zabelin Mədəniyyət komitəsinin, Bəxtiyar Əliyev, Araz Əlizadə, Sahibə Qafarova, Tahir Mirkişili və Elman Nəsirov Beynəlxalq münasibətlər və parlamentlərarası əlaqələr komitəsinin, Kamilə Əliyeva, İlham Məmmədov və Sədaqət Vəliyeva  Səhiyyə komitəsinin, Ağacan Abıyev, Tahir  Rzayev, Astan Şahverdiyev Ailə, qadın və uşaq  məsələləri komitəsinin, Rauf Əliyev, Sevinc  Fətəliyeva, Mirkazım Kazımov, Fazil Mustafa İctimai birliklər və dini qurumlar komitəsinin, Mahir Abbaszadə, Adil Əliyev, Əli Hüseynli, Rövşən Rzayev  isə Gənclər  və idman  komitəsinin tərkibinə daxil edildilər. Qərar  layihəsi  deputatlar  tərəfindən  müsbət  qəbul olundu.
Sonra  Milli Məclisin 2016-cı il yaz sessiyasının qanunvericilik işləri  planı  haqqında məsələ  müzakirə  edildi. Millət  vəkilləri çıxış  edərək sənədlə əlaqədar  fikirlərini bildirdilər,  təkliflər  irəli  sürüldü.  Sənəd  səsvermə yolu ilə  təsdiqləndi.  
İclasda “Azərbaycan Respublikası Prezidenti və Gürcüstan  Prezidentinin  Birgə Bəyannaməsi”nin  təsdiq  edilməsi haqqında  qanun layihəsi ilə əlaqədar Beynəlxalq münasibətlər və parlamentlərarası əlaqələr komitəsinin sədri Səməd Seyidov məlumat verdi.  Qeyd  olundu ki, sənəd iki qonşu dövlət arasında dostluq, suveren bərabərlik,  qarşılıqlı etimad  və  strateji  tərəfdaşlıq prinsiplərinə söykənib.  Uzunmüddətli  əməkdaşlığı  möhkəmləndirmək naminə  hər  iki dövlət  üçün çox  faydalı olacaq.  Sənəd  səsvermə  yolu ilə qəbul  edildi.  
“Azərbaycan Respublikası və Çin Xalq  Respublikasının  dostluq və əməkdaşlıq  münasibətlərinin daha da inkişaf  və dərinləşməsi  haqqında Birgə Bəyannamə”nin təsdiq  edilməsi barədə  qanun layihəsini   də Səməd  Seyidov  şərh  etdi.  Sənəd deputatlar tərəfindən  qəbul  edildi.
“Azərbaycan Respublikası  və Çin Xalq  Respublikası hökuməti  arasında mülki hava  nəqliyyatına dair  Saziş”in təsdiq  edilməsi  haqqında  qanun layihəsi  ilə bağlı  məlumat  verən İqtisadi  siyasət  komitəsinin  sədri Ziyad  Səmədzadə bildirdi ki, sənəd  ölkələrimiz  arasında  iqtisadi əlaqələrin möhkəmlənməsinə öz  töhfəsini verəcək. Sənəd  səsə  qoyularaq  təsdiq  edildi.
 “Azərbaycan Respublikası  və Çin Xalq  Respublikası arasında  məhkumların  verilməsi haqqında” müqavilənin  təsdiqi  haqqında  sənədi Hüquq  siyasəti  və  dövlət  quruculuğu  komitəsinin sədri Əli  Hüseynli  şərh etdi. O, vurğuladı ki,  məsələ  kifayət  qədər  əhəmiyyətlidir. Məhkumların cəmiyyətə  inteqrasiyasını  asanlaşdırmaq  və insan  hüquqlarının  daha  etibarlı  təminatı  üçün  başqa  dövlətin ərazisində  həbsə  alınan  məhkumun  öz  ölkəsində, öz  doğmalarının  yaxınında  olması, öz  ölkəsinə  təhvil  verilməsi  daha  əhəmiyyətlidir. Millət  vəkilləri  layihəni yekdilliklə dəstəklədilər. 
Sonra “Birləşmiş Millətlər Təşkilatının Malların beynəlxalq alqı-satqısı  üzrə  müqavilələrə  dair  Konvensiyası”na  qoşulmaq  barədə sənədlə əlaqədar  Ziyad  Səmədzadə  danışdı.  O, dedi ki, Azərbaycanın bu  Konvensiyaya  qoşulması  sahibkarlıq  subyektləri ilə  alqı-satqı  münasibətlərini  tənzimləyəcək. Sənəd  səsə  qoyularaq  qəbul  edildi.
Müzakirəyə  təqdim  edilən “Azərbaycan Respublikası Hökuməti ilə Monteneqro Hökuməti  arasında gömrük işi sahəsində əməkdaşlıq və qarşılıqlı yardım  haqqında Saziş”in  təsdiq  edilməsi  barədə  sənəd də  səsvermə yolu ilə   qəbul  edildi. 
Miqrasiya  Məcəlləsində  dəyişiklik  edilməsi  haqqında qanun  layihəsində  edilən  dəyişiklik  turistlərə  elektron viza  üçün  verilən  müddətin  10 gündən, 5  iş  gününə qədər  azaldılması ilə  bağlıdır. Bu  sənədə  də müsbət  münasibət  bildirildi. 
Şəhərsalma  və Tikinti  Məcəlləsinin  təsdiq  edilməsi, qüvvəyə  minməsi və bununla  bağlı  hüquqi  tənzimləmə  haqqında qanunda  dəyişiklik  edilməsi  barədə  məlumat  verən Əli  Hüseynli  bildirdi ki,  bir  neçə il öncə parlamentdə   Məcəllənin hazırlanması ilə bağlı yaranan  işçi qrupu qanun layihəsini hazırladı. Qrupun  tərkibinə hökumət  nümayəndələri, tikinti  müəssisələrinin rəhbərləri, Almaniyalı ekspertlər də  cəlb  edilmiş və  səmərəli əməkdaşlıq  edilmişdir. Birmənalı şəkildə demək olar ki, sənəd  tam müasir standartlara  uyğun hazırlanıb.   Sadəcə Məcəllənin 19-cu maddəsinə uyğun olaraq ərazi planlaşdırılması  növlərindən biri olan – müfəssəl planın  hazırlanması  üçün tələb edilən vaxt  azlıq  edir.  Bütün şəhər  və qəsəbə yaşayış  müəəsisələrinin müfəssəl planının  hazırlanması  üçün  verilən 3 il vaxt  2016-cı il  yanvarın 1-də tamam oldu. Qanun  layihəsinə  edilən  dəyişiklik Müfəssəl planın hazırlanması üçün  tələb edilən zamanın daha bir il müddətinə uzadılmasıdır. Əli Hüseynli əlavə bir il ərzində planın başa  çatdırılacağına   əminliyini bildirdi.  Sənəd  səsvermə  yolu ilə qəbul  edildi.
Gündəlikdəki  digər  3  məsələnin   - “Polis  haqqında”, “Əməliyyat-axtarış fəaliyyəti haqqında” qanun layihələrinə və Cinayət-Prosessual Məcəlləsinə edilən  dəyişikliklərin  bir-biri ilə üzvi  surətdə bağlı olduğu bildirildi.  Hər  üç  qanuna  təklif  edilən  dəyişiklik polis  əməkdaşlarının qanunsuz olaraq, şəxsin razılığı olmadan onun  yaşayış yerinə, müvəqqəti  qalma yerlərinə  daxil olmasının qarşısını  almaq  məqsədi  daşıyır.  Qanun  layihələri  ayrı-ayrılıqda  səsə  qoyularaq  qəbul  edildi.
Sonda millət vəkilləri İnzibati Xətalar Məcəlləsində dəyişikliklər edilməsi haqqında  sənədi  müzakirə  etdilər.  Bildirildi ki,  sənədə  edilən  dəyişiklik “Ümumi  istifadədə olan ölkə əhəmiyyətli  avtomobil  yollarının  qorunması  haqqında”  ölkə Prezidentinin  18 mart 2015-ci il  1114 nömrəli  sərəncamının icrası  məqsədi  ilə edilir. Bu  sərəncam yolların qorunması ilə bağlı iri qabaritli və  ağır  çəkili nəqliyyat  vasitələrinin  hərəkətinin tənzimlənməsi ilə bağlıdır. Qeyd  edildi ki, bu vaxta  qədər qanunvericilikdə  inzibati  xəta  hadisəsinin  foto  və video qeydiyyat funksiyalarına  malik xüsusi  texniki  vasitələrin  köməyi ilə  aşkar  edildiyi zaman inzibati  icraatın  aparılması mövcud olmadığı  üçün İnzibati Xətalar Məcəlləsinin  429-3 maddəsinə  müvafiq  dəyişikliklər aparılır.  Sənəd  səsvermə  yolu ilə qəbul  edildi.
Bununla  da  Milli Məclisin bugünkü  iclası öz  işini başa  çatdırdı.

Milli Məclisin
Mətbuat xidməti