Martın  3-də Milli Məclisin Gənclər və idman komitəsinin iclası  keçirildi.
Komitə sədri Fuad Muradov müzakirəyə təqdim edilən “Bədən  tərbiyəsi  və idman  haqqında” qanuna edilən dəyişiklikləri ətraflı şərh  etdi. Bildirildi ki, Prezident İlham Əliyevin qanunvericilik təşəbbüsü  qaydasında   komitəyə  daxil olan sənəddə iki əsas  dəyişiklik nəzərdə  tutulub. Belə ki, sənədə  əsasən ölkədə idman mərc oyunlarına nəzarət funksiyası yeni yaradılmış “Maliyyə Bazarlarına Nəzarət Palatası” publik hüquqi şəxsə verilir. Dəyişikliyə əsasən, Qanun  layihəsinin  53-cü  maddəsindəki “dövlət nəzarəti müvafiq icra hakimiyyəti orqanı” sözləri “maliyyə bazarlarına nəzarət orqanı” sözləri ilə əvəzlənir.
Sənəddə  əksini  tapan  digər  bir  dəyişikliyə əsasən  idman mərc oyunlarının təşkili və keçirilməsinə nəzarəti həyata keçirən maliyyə bazarına nəzarət orqanı həmin orqanın müəyyən etdiyi məbləğdə və qaydada idman mərc oyunlarından əldə olunan haqlar hesabına maliyyələşir.
 Çıxış  edən millət  vəkilləri Adil Əliyev, Rauf Əliyev,  Şahin İsmayılov, Naqif Həmzəyev sənədin əhəmiyyətindən, ölkədə  kütləvi  idmanın geniş vüsət almasından danışdılar,  bu sahəni əhatə  edən mövcud qanunvericilikdə müəyyən boşluqların  olmasından,  qanundan kənar mərc  oyunlarına  qadağalar  tətbiq edilməsinin zəruriliyindən söhbət  açdılar.
Ətraflı  müzakirələrdən  sonra  qanun  layihəsi Milli Məclisin  plenar  iclasında müzakirəyə   tövsiyə olundu.

Milli Məclisin
Mətbuat  xidməti