Martın 30-da  Milli Məclisin Aqrar  siyasət  komitəsinin növbəti  iclası  keçirildi.
Komitə  sədri Eldar  İbrahimov  bildirdi ki, iclasın gündəliyinə Torpaq Məcəlləsinə edilən dəyişiklik daxil edilib. Qeyd  olundu ki, sənəd Azərbaycan Prezidenti İlham Əliyev  tərəfindən  qanunvericilik  təşəbbüsü  qaydasında  Milli Məclisə  təqdim edilib. Layihə torpaq  qanunvericiliyini  təkmilləşdirmək, bu  sahədə  qanun  pozuntularına  görə cəzaları sərtləşdirmək  məqsədilə  hazırlanıb. 
Milli Məclis Aparatının İqtisadi  qanunvericilik şöbəsinin müdir müavini - Aqrar qanunvericilik sektorunun müdiri Vilayət Əlizadə dəyişikliyi ətraflı şərh  etdi. Qeyd  olundu ki,  hələ də ölkəmizdə  torpaqların qanunsuz  zəbt  edilməsi,  qeyri-qanuni  yollarla  kənd  təsərrüfatı  təyinatlı  torpaqların təyinatının dəyişdirilməsi hallarına rast  gəlinir. Ona  görə  də Torpaq  Məcəlləsinin 110-cu  - “Bu Məcəllənin pozulmasına görə məsuliyyət” adlı maddəsi aşağıdakı  redaksiyada  təklif  olunur: “Bu Məcəllənin tələblərini pozmuş şəxslər Azərbaycan Respublikasının Mülki, İnzibati Xətalar və Cinayət məcəllələrinə uyğun olaraq məsuliyyət daşıyırlar.” Qanun  layihəsinin “Cinayət  Məcəlləsində  dəyişikliklər  edilməsi  haqqında”  2015-ci il 30  sentyabr  tarixli 1336-İVQD nömrəli  qanunun  tətbiqi  barədə Azərbaycan  Prezidentinin  2015-ci il  23 noyabr  tarixli 1557 nömrəli  sərəncamının  müvafiq  bəndinin icrası ilə əlaqədar hazırlandığı  da  vurğulandı. 
 Çıxış  edən  millət  vəkilləri Eldar  Quliyev, Tahir  Süleymanov, Hüseynbala  Mirələmov, Novruzəli Aslanov, Aydın Hüseynov, İqbal Məmmədov bu   sahədə  qanun  pozuntularının  aradan  qaldırılması  istiqamətində  sənədin  əhəmiyyətli olacağını  bildirdilər.
Müzakirələrdən  sonra  qanun layihəsi  Milli Məclisin plenar iclasına  tövsiyə olundu.

Milli Məclisin
Mətbuat  xidməti