Məsələ barədə məlumat verən Milli Məclis Aparatının İqtisadi qanunvericilik şöbəsinin sektor müdiri Rövşən Muradov diqqətə çatdırdı ki, qanuna təklif olunan bu dəyişiklik Azərbaycan Respublikası Prezidentinin Qaradağ Sənaye Parkının yaradılması haqqında 3 iyun 2015-ci il tarixli Sərəncamının icrasının təmin edilməsi məqsədilə hazırlanmışdır. Qanunun “Məcburi dövlət sosial sığortasına cəlb olunan şəxslər” adlı 12-ci maddəsinə ediləcək dəyişiklikdən sonra müvafiq icra hakimiyyəti orqanının qərarına əsasən yaradılmış sənaye parkında fəaliyyətə cəlb edilmiş   əcnəbilər məcburi dövlət sosial sığortasından azad ediləcəklər.

Çıxış edən deputatlar Aytən Mustafayeva, Rauf Əliyev, İlham Məmmədov, Araz Əlizadə, Milli Məclis Aparatının Sosial qanunvericilik şöbəsinin müdiri Adilə Abbasova təklif olunan dəyişikliyi yüksək qiymətləndirdilər.  Sonra sənəd Milli Məclisin plenar iclasında müzakirəyə tövsiyə olundu.

İclasda hazırda üzərində iş gedən “Turizm haqqında” Qanun layihəsi barədə də fikir mübadiləsi aparıldı, deputatların fikirləri dinlənildi. İclasın sonunda qanun layihəsi üzərində işin davam etdirilməsi qərara alındı.