Aprelin 29-da  Milli Məclisin növbəti plenar iclası  keçirildi. İclası  parlamentin Sədri  Oqtay Əsədov açdı. Əvvəlcə  iclasda cari məsələlər ətrafında müzakirələr  aparıldı.  Millət vəkilləri Zahid Oruc, Fərəc Quliyev, Əli Məsimli, Fəzail Ağamalı, Aydın Mirzəzadə, Elşən Musayev, Fazil Mustafa, Sahib Alıyev, Elman Nəsirov  ölkə gündəmi ilə əlaqədar vacib məsələlərdən, cəbhə zonasında baş verən hadisələrdən, Ermənistan  dövlətinin riyakarlığından, Azərbaycan  ordusunun əsgər  və  zabitlərinin şücaətindən   danışdılar. Milli Məclis  Sədrinin müavini, İnsan  hüquqları komitəsinin sədri Bahar Muradova Azərbaycan  dövlətinin  BMT-nin  və digər  beynəlxalq  qurumlar  qarşısında  götürdüyü  öhdəlikləri  layiqincə  yerinə  yetirməsindən ətraflı söhbət  açdı. Bu qurumların Azərbaycana  münasibətinin artıq ürəkaçan səviyyədə olduğunu vurğuladı.  Son  zamanlar Dağlıq Qarabağ həqiqətlərinin dünya  ictimaiyyətinə layiqincə çatdırılmasını,  xarici  təşkilatlarda  ölkəmizə qarşı  münasibətin  dəyişdiyini,  dövlətimizin  gücünün  doğurduğu  əminliyi diqqətə  çatdırdı.
Sonra iclasda İnsan Alverinə Qarşı Mübarizə üzrə Milli Koordinatorun illik məlumatı dinlənildi. Milli koordinator, Azərbaycan Respublikası daxili işlər nazirinin müavini, general-leytenant Vilayət Eyvazov ötən dövrdə ölkəmizdə insan alveri ilə mübarizə sahəsində görülən işləri  diqqətə  çatdırdı. Qeyd  olundu ki, müasir  dünyada  ictimai  asayişin yüksək səviyyədə qorunduğu  dövlət kimi tanınan Azərbaycanda aparılan demokratik-hüquqi  islahatlar  nəticəsində, transmilli mütəşəkkil cinayətkarlığın  təhlükəli  növlərindən  olan insan  alverinə  qarşı mübarizə işinin son 12  ildə  möhkəm  təməli  yaradılmışdır.
Ötən  dövrdə  insan  alverinə  qarşı  mübarizənin  iştirakçısı  olan  bütün  dövlət  orqanları,  vətəndaş  cəmiyyətinin nümayəndələri və beynəlxalq tərəfdaşlar Milli Fəaliyyət  Planına  uyğun olaraq  sözügedən  cinayətlərin  qarşısının alınması, qanunvericiliyin  təkmilləşdirilməsi, təhlükəsizliyin, maarifləndirmənin və beynəlxalq  əməkdaşlığın  gücləndirilməsi  sahəsində  qarşıya  qoyulmuş  vəzifələri  ardıcıllıqla  yerinə  yetirmişlər.
 Qeyd  olundu ki, hesabat  dövründə  108 insan alveri, 8 məcburi əmək, insan alveri məqsədi ilə sənədlərlə  qanunsuz  hərəkətlərə  dair  11  fakt qeydə alınıb.  Bu əməllərə  görə 38  şəxs  cinayət  məsuliyyətinə  cəlb olunub, insan  alveri ilə məşğul olan  13 cinayətkar qrup və 1 mütəşəkkil  dəstə zərərsizləşdirilib. Keçirilmiş əməliyyat nəticəsində həmin cinayətləri törətmiş 27 şəxsdən 9-u  tutularaq  istintaq  və məhkəmə  orqanlarına  təqdim  edilmiş,  insan alverinin qurbanı olan 63 nəfər müəyyən olunmuşdur.
Nazir müavini onu da qeyd etdi ki, hesabat dövründə “Qaynar xətt” telefon xidmətinə daxil olan 13 minə yaxın müraciət araşdırılmış və hər biri  üzrə qanunla  müəyyən  edilmiş  tədbirlər  görülmüşdür. Əmək  və  Əhalinin  Sosial  Müdafiəsi  Nazirliyi yanında  İnsan  alveri  qurbanları  üçün  Yardım Mərkəzi tərəfindən 56  qurbana  hüquqi psixoloji yardım, həmçinin  Səhiyyə  Nazirliyinin  xüsusi  tibb   müəssisələri  tərəfindən  16  qurbana  tibbi  xidmət  göstərilmiş, 13 nəfər  şəxsiyyəti  təsdiq  edən  sənədlə təmin  olunmuşdur.  Ərazi polis  orqanları  tərəfindən  keçirilən  reydlər  zamanı  ötən il küçə  həyatına  məruz  qalan,  dilənçilik  edən və qeyri-qanuni  qulluğa  cəlb  olunan  450  azyaşlı  müəyyən  edilmişdir.  Onların insan  alverinin və məcburi  əməyin  qurbanı  olmaları  təsdiqlənməsə  də 200-dən artıq  valideyn  barəsində  inzibati  məsuliyyət  tədbirləri  görülmüşdür.  Dövlət  Miqrasiya  Xidməti  tərəfindən  aparılmış yoxlamalarda  əcnəbilərin  və vətəndaşlığı  olmayan  şəxslərin  işə götürülməsi qaydalarının  pozulması  ilə əlaqədar  159  inzibati  xəta  aşkarlanmışdır. 
General-leytenant Vilayət Eyvazov bildirdi ki, hesabat dövründə Daxili İşlər, Təhsil, Mədəniyyət və Turizm, Gənclər və İdman, İqtisadiyyat və Sənaye nazirliklərinin, Dövlət Miqrasiya Xidmətinin, Ailə, Qadın  və Uşaq  Problemləri  üzrə  Dövlət Komitəsinin və QHT-lərin  birbaşa  təşkilatçılığı  və iştirakı  ilə  Bakı  şəhərinin ən müxtəlif  yerlərində, ayrı-ayrı rayonlarda, qəsəbələrdə, müxtəlif  şirkət  və müəssisələrdə məcburi əməyə məruz qalma hallarının müəyyən edilməsi üçün monitorinqlər aparılıb. İnsan  alveri  və məcburi əmək  qurbanlarının  müəyyən  edilməsi  qaydaları ayrıca  proqram  əsasında Dövlət  Miqrasiya  Xidmətinin  təlim-tədris  mərkəzində  tədris  olunur.  Bildirildi ki, belə tədbirlərdə Dövlət  Sərhəd  Xidmətinin, Dövlət Gömrük Komitəsinin  əməkdaşları  da  fəal  iştirak  ediblər. 
Sonda  natiq  onu  da  vurğuladı ki, insan  alverinə  qarşı  mübarizədə  Azərbaycan  təcrübəsi  bir  çox  dövlətlərin əlaqədar  qurumlarının  diqqət  mərkəzindədir  və  görülən işlər  əksər  nüfuzlu  beynəlxalq  təşkilatlar  tərəfindən  hazırlanmış  hesabatlarda  yüksək  dəyərləndirilir.
Sonra insan alverinə qarşı mübarizə üzrə milli koordinatorun illik hesabatı ilə bağlı müzakirələr aparıldı. Deputatlardan Fazil Mustafa, Siyavuş Novruzov, Zahid Oruc, Fəzail Ağamalı, Elmira Axundova, Qüdrət Həsənquliyev, Çingiz Qənizadə sənədlə bağlı fikirlərini  bildirdilər. Müzakirələrdən sonra hesabat nəzərə alındı. 
 Sonra gündəlikdəki  digər məsələlərin  müzakirəsinə başlanıldı. Əvvəlcə Ailə, Qadın  və Uşaq  məsələləri komitəsinin  sədri  Aqiyə  Naxçıvanlı “Uşaq hüquqları haqqında” və “Telekommunikasiya haqqında” qanunlara təklif edilən dəyişiklikləri şərh etdi. Komitə  sədri bildirdi ki, qüvvədə olan “Uşaq hüquqları haqqında” qanunun 15-ci maddəsinə əsasən, ölkəmizdə hər bir uşağın əqli və fiziki inkişafı üçün zəruri olan istənilən məlumatı axtarmaq, əldə etmək, ötürmək və yaymaq hüququ, yəni məlumat azadlığı hüququ var. Hazırda müzakirəyə təqdim olunmuş qanun layihəsinə görə, həmin maddəyə “uşaqların sağlamlığına və inkişafına ziyan vuran informasiyadan qorunması müvafiq qanunla tənzimlənir” cümləsi əlavə edilib.
Deputatların nəzərinə çatdırıldı ki, həmin məsələ ilə əlaqədar “Telekommunikasiya haqqında” qanunun 33-cü, 34-cü və 40-cı maddələrinə də müvafiq dəyişikliklər edilib. Belə ki, yeni layihədə abunəçinin müraciəti əsasında telekommunikasiya operatorlarından və provayderlərdən uşaqların sağlamlığına və inkişafına ziyan vuran informasiyadan qorunması üçün internet informasiya ehtiyatlarından təhlükəsiz istifadə imkanlarını təmin etmək, bu məqsədlə tədbirlər görülməsini tələb etmək hüquqları nəzərdə tutulur. Qeyd olundu ki, müzakirəyə çıxarılmış bu məsələlər cəmiyyətin sosial sifarişi və günümüzün vacib məsələsidir. Qanun  layihələri ayrı-ayrılıqda səsə  qoyularaq  qəbul  edildi.
 “Kütləvi informasiya vasitələri haqqında” qanuna təklif olunan dəyişikliklərlə bağlı Mədəniyyət  komitəsinin  sədri Rəfael  Hüseynov məlumat verdi. Qeyd olundu ki, sənəddə aparılan dəyişikliklər ölkəmizdə insan haqlarına hörmətin çərçivəsinin daha da genişləndirilməsini nəzərdə tutur. Bildirildi ki, qanunun 11-ci maddəsinə (İnformasiyanın yayılmasına, informasiya mənbəyinin açıqlanmasına yol verilməyən xüsusi hallar) əlavə olunan bəndə görə, KİV redaksiyası və ya jurnalistin “Azərbaycan Respublikasının Cinayət-Prosessual Məcəlləsində nəzərdə tutulmuş qaydada tərtib edilən və “İnformasiya əldə etmək haqqında” qanuna uyğun olaraq sənədləşdirilmiş informasiya hesab edilən cinayət təqibi üzrə icraat materiallarının surətlərini olduğu kimi yaymasına yol verilməyəcək. Maddənin 4-cü bəndi isə dəyişdirilərək belə verilir: “yetkinlik yaşına çatmayan şübhəli, təqsirləndirilən və ya zərər çəkmiş şəxslərin şəxsiyyəti barədə hər hansı məlumatların həmin şəxslərin və onların qanuni nümayəndələrinin razılığı olmadan yaymasına yol verilmir”. Sənəd   deputatların  yekdil  razılığı  ilə qəbul  edildi.
Gündəlikdə  olan  digər  3 məsələ - “Polis  haqqında”. “Cinayət işlərinə  dair hüquqi  yardım  haqqında”  və “Cinayət törətmiş  şəxslərin verilməsi (ekstradisiya) haqqında”  qanunlara  dəyişikliklər  edilməsi barədə  sənədlərlə  bağlı Hüquq  siyasəti  və  dövlət  quruculuğu  komitəsinin sədri Əli  Hüseynli  məlumat  verdi. Qeyd  olundu ki,  bu qanun layihələrində  edilən  texniki  xarakterli  dəyişikliklər  sənədlərin  “Azərbaycan Respublikasının Cinayət-Prosessual Məcəlləsində  dəyişikliklər  edilməsi  haqqında” 2015-ci il 20  oktyabr  tarixli 1395-IVQD nömrəli  qanuna  uyğunlaşdırma  məqsədi ilə  aparılıb.  Hər 3 sənəd ayrı-ayrılıqda səsvermə  yolu ilə  qəbul  edildi.
Bununla  da  Milli Məclis  bugünkü  işini  başa  çatdırdı.

Milli Məclisin
Mətbuat  xidməti