Mayın 20-də  Milli Məclisin  İqtisadi  siyasət, sənaye və  sahibkarlıq   komitəsinin  növbəti iclası keçirildi.
Əvvəlcə “Azərbaycan Respublikasının 2015-ci il dövlət  büdcəsinin  icrası haqqında”  qanun  layihəsinə  baxıldı. Komitə  sədri Ziyad Səmədzadə 2015-ci ilin Azərbaycan iqtisadiyyatı üçün uğurlu illərdən biri olduğunu bildirdi. Qeyd  edildi ki, qanuna uyğun olaraq hər ilin may ayında dövlət büdcəsinin icrası haqqında  sənəd  Milli Məclisə təqdim olunaraq müzakirə edilir. Daxil olan sənəddən görünür ki, bu il də iqtisadi çətinliklərə baxmayaraq sosial proqramların icrası dayandırılmayıb. Xarici öhdəliklər vaxtında yerinə yetirilib. Hökumətin 2015-ci ildə aparılan siyasəti yüksək qiymətləndirilməlidir.
Sonra Maliyyə naziri Samir Şərifov çıxış  edərək məqsədyönlü iqtisadi siyasət nəticəsində 2015-ci ildə də makroiqtisadi sabitliyə, qeyri-neft sektorunun artım sürətinə nail olunduğunu  vurğuladı. Bildirildi ki, əhalinin yaşayış səviyyəsi və pul gəlirləri, ölkənin beynəlxalq aləmdə reytinqi artıb, Azərbaycanın regionda iqtisadi mövqeyi daha da möhkəmlənib. Bu nailiyyətlər dünya iqtisadiyyatında mövcud olan qeyri-sabitlik şəraitində qazanılmışdır.
Qeyd  olundu ki, müzakirəyə  təqdim  edilən qanun  layihəsində dövlət büdcəsinin icra vəziyyəti ilə bağlı göstəricilər tam  əks olunub. Belə ki, ilkin olaraq büdcədə neftin qiyməti 90 dollar götürülsə də,  dünya  bazarında orta qiymət 53,6 dollar olduğundan dövlət büdcəsinin gəlirlərində azalmaya müşahidə olunub. “2015-ci il icmal büdcənin gəlirləri 20716,8 mln. manat proqnoza qarşı 18 mlrd. 416 mln. manat və ya 88,9%, xərcləri isə 25 mlrd. 911 mln. manat proqnoza qarşı 21014,7 mln. manat və ya 81,1% icra olunub. 2015-ci ildə dövlət büdcəsinin gəlirləri 19 mlrd. 438 mln. manat proqnoza qarşı 90% icra olunaraq 17 mlrd. 498 mln. manat olub. Bu göstərici 2014-cü illə müqayisədə 902,6 mln. manat və ya 4,9% azdır.
2015-ci ildə dövlət büdcəsi gəlirlərinin 8 mlrd. 130 mln. manatı və ya 46,5%-i Dövlət Neft Fondundan transfertin, 7 mlrd. 118,3 mln. manatı və ya 40,7%-i Vergilər Nazirliyinin xətti ilə daxilolmaların, 1 mlrd. 591,9 mln. manatı və ya 9,1%-i Dövlət Gömrük Komitəsinin xətti ilə daxilolmaların, 657,8 mln. manatı və ya 3,7%-i digər mənbələr üzrə daxilolmaların payına düşür. 2015-ci ildə Vergilər Nazirliyinin xətti ilə dövlət büdcəsinə daxilolmalar nəzərdə tutulduğundan 6,3 mln. manat və ya 0,1%, 2014-cü illə müqayisədə isə 4,6 mln. manat (0,1%) çox icra olunub. Dövlət Gömrük Komitəsinin xətti ilə dövlət büdcəsinə daxilolmalar 1 mlrd. 590 mln. manat proqnoza qarşı 1 mlrd. 591,9 mln. manat və ya 100,1% icra olunub ki, bu da 2014-cü illə müqayisədə 81,1 mln. manat (5,4%) çoxdur”.
Maliyyə  naziri çıxışında  onu da  vurğuladı ki,  2015-ci ilin ortalarından etibarən dövlət büdcəsinin xərcləri ilə bağlı qənaətə başlanılıb, əsasən sosial xərclərin icra edilməsinə üstünlük verilib. 2015-ci ildə ölkə iqtisadiyyatının məruz qaldığı xarici qiymət şoklarının qısa və ortamüddətli təsirlərinə cavab olaraq büdcə yığcamlaşdırılması siyasəti davam etdirilib. 2015-ci il dövlət büdcəsinin xərcləri 21 mlrd. 100 mln. manat proqnoza qarşı 17 mlrd. 784,5 mln. manat və ya 84,3% icra edilib.
İclasda Hesablama Palatası büdcənin icrasına rəy verdi. Palatanın sədri Vüqar Gülməmmədov vurğuladı ki, ötən il dünya iqtisadiyyatında sistemli böhranın davam etdiyi bir şəraitdə ölkəmiz davamlı iqtisadi inkişaf tempini qoruyub saxlaya bilib. Onun sözlərinə görə, ötən il dünya bazarında enerji resurslarının qiymətinin aşağı düşməsi tədiyyə balansında kəsirə səbəb olub və əvvəlki illərlə müqayisədə orta illik inflyasiya səviyyəsinin artmasına gətirib çıxarıb. Düşünülmüş iqtisadi siyasət, qeyri-neft sektorunun inkişafının diqqətdə saxlanılması ilə dövlət büdcəsində nəzərdə tutulan gəlir və xərclər tam reallaşdırılıb. Əvvəlki illərlə müqayisədə debitor borcların həcmi azalıb. Vüqar Gülməmmədov dövlət büdcəsinin əsas parametrləri haqqında da məlumat verib.
Müzakirələr zamanı çıxış edən millət  vəkilləri Vahid  Əhmədov, Əli Məsimli, Aydın Hüseynov, İqtisadiyyat  və  sənaye,  Əmək  və Əhalinin  Sosial  Müdafiəsi nazirliklərinin, Dövlət  Gömrük Komitəsinin  nümayəndələri “Azərbaycan Respublikasının 2015-ci il dövlət büdcəsinin icrası haqqında” qanun layihəsinin qanunvericiliyə uyğun hazırlandığını söylədilər.
Sonra  iclasda “Antidempinq, kompensasiya və mühafizə  tədbirləri  haqqında”  qanun  layihəsinin üçüncü  oxunuşda  müzakirəsi  keçirildi. Bildirildi ki,  sənədin  əvvəlki  müzakirəsi  zamanı  millət  vəkillərinin  səsləndirdiyi  təkliflərə yenidən  baxılıb,   bir  sıra  təkliflər  sənəddə  öz  əksini  tapıb.
Müzakirələrdən  sonra  hər  iki  sənəd  Milli Məclisin  plenar  iclasının  müzakirəsinə  tövsiyə  olundu. 

Milli Məclisin
Mətbuat  xidməti