Mayın 31-də  Milli Məclisin 2016-cı ilin  yaz  sessiyasının  son iclası  keçirildi. İclası  parlamentin Sədri Oqtay Əsədov açdı. Gündəliyin  təsdiqindən  sonra  Oqtay Əsədov 1 iyun - Uşaqların Beynəlxalq Müdafiəsi  günü  münasibəti ilə   parlamentin iclasında  iştirak  edən  bir  qrup  uşağın timsalında bütün Azərbaycan uşaqlarını  təbrik etdi, onlara  gələcək  həyatlarında və  təhsildə uğurlar  arzuladı. 
Sonra  gündəlikdəki  məsələlərin müzakirəsinə  başlanıldı.
İclasda “Hümmət Qamuna oğlu Səlimovun Şəki Appelyasiya  Məhkəməsinin  hakimi  vəzifəsindən  azad  edilməsi”  barədə məsələ ilə əlaqədar  Hüquq  siyasəti  və  dövlət  quruculuğu  komitəsinin sədri  Əli Hüseynli məlumat  verdi.  Bildirildi ki, bu, Səlimovun vəzifəsinin dəyişdirilməsi ilə əlaqədardır.  Millət  vəkillərinin  razılığından  sonra  sənəd  təsdiq  edildi.
Sonra “Azərbaycan Respublikasının 2015-ci il dövlət  büdcəsinin  icrası  haqqında” qanun  layihəsi müzakirə  olundu.  Sənədi  ətraflı  şərh  edən İqtisadi siyasət, sənaye və  sahibkarlıq  komitəsinin sədri Ziyad Səmədzadə 2015-ci ilin Azərbaycan iqtisadiyyatı üçün uğurlu illərdən biri olduğunu bildirdi. Qeyd  edildi ki, qanuna uyğun olaraq hər ilin may ayında dövlət büdcəsinin icrası haqqında  sənəd  Milli Məclisə təqdim olunaraq müzakirə edilir. Daxil olan sənəddən görünür ki, bu il də iqtisadi çətinliklərə baxmayaraq sosial proqramların icrası dayandırılmayıb. Xarici öhdəliklər vaxtında yerinə yetirilib. Hökumətin 2015-ci ildə aparılan siyasəti yüksək qiymətləndirilməlidir. Qeyd  olundu ki, müzakirəyə  təqdim  edilən qanun  layihəsində dövlət büdcəsinin icra vəziyyəti ilə bağlı göstəricilər tam  əks olunub. Komitə  sədri çıxışında  onu da  vurğuladı ki,  2015-ci ilin ortalarından etibarən dövlət büdcəsinin xərcləri ilə bağlı qənaətə başlanılıb, əsasən sosial xərclərin icra edilməsinə üstünlük verilib.
İclasda çıxış edən Hesablama Palatasının sədri Vüqar Gülməmmədov vurğuladı ki, ötən il dünya iqtisadiyyatında sistemli böhranın davam etdiyi bir şəraitdə ölkəmiz davamlı iqtisadi inkişaf tempini qoruyub saxlaya bilib. Onun sözlərinə görə, ötən il dünya bazarında enerji resurslarının qiymətinin aşağı düşməsi tədiyyə balansında kəsirə səbəb olub və əvvəlki illərlə müqayisədə orta illik inflyasiya səviyyəsinin artmasına gətirib çıxarıb. Düşünülmüş iqtisadi siyasət, qeyri-neft sektorunun inkişafının diqqətdə saxlanılması ilə dövlət büdcəsində nəzərdə tutulan gəlir və xərclər tam reallaşdırılıb. Əvvəlki illərlə müqayisədə debitor borcların həcmi azalıb. Vüqar Gülməmmədov dövlət büdcəsinin əsas parametrləri haqqında da məlumat verib.
Müzakirələr zamanı çıxış edən millət  vəkilləri Zahid  Oruc, Əli Məsimli, Elmira  Axundova, Fazil Mustafa, Astan Şahverdiyev, Qənirə  Paşayeva, Tahir  Kərimli,  Əflatun Amaşov,  Fərəc  Quliyev, Ağalar Vəliyev, Şəmsəddin Hacıyev, Aydın Hüseynov “Azərbaycan Respublikasının 2015-ci il dövlət büdcəsinin icrası haqqında” qanun layihəsinin qanunvericiliyə uyğun hazırlandığını söylədilər, onları  maraqlandıran sualları  səsləndirdilər. 
Sonra Maliyyə naziri Samir Şərifov çıxış  edərək məqsədyönlü iqtisadi siyasət nəticəsində 2015-ci ildə də makroiqtisadi sabitliyə, qeyri-neft sektorunun artım sürətinə nail olunduğunu  vurğuladı. Bildirildi ki, əhalinin yaşayış səviyyəsi və pul gəlirləri, ölkənin beynəlxalq aləmdə reytinqi artıb, Azərbaycanın regionda iqtisadi mövqeyi daha da möhkəmlənib. Bu nailiyyətlər dünya iqtisadiyyatında mövcud olan qeyri-sabitlik şəraitində qazanılmışdır. Nazir  millət  vəkillərini  maraqlandıran  suallara  aydınlıq  gətirdi.  Sənəd  səsvermə  yolu ilə  təsdiqləndi.
Sonra  Ziyad  Səmədzadə  “Antidempinq, kompensasiya və mühafizə  tədbirləri  haqqında”  qanun  layihəsi   barədə    məlumat  verdi. Üçüncü  oxunuşda  müzakirəsi  keçirilən  sənədin  əvvəlki  müzakirəsi  zamanı  millət  vəkillərinin  səsləndirdiyi  təkliflərə yenidən  baxıldığı,   bir  sıra  təkliflərin  sənəddə  öz  əksini  tapdığı  vurğulandı. Sənəd  səsə  qoyularaq  qəbul  edildi.
Müdafiə, təhlükəsizlik və korrupsiya ilə mübarizə  komitəsinin sədri müavini Aydın Mirzəzadə “Hərbi vəzifə və hərbi xidmət haqqında” qanunda dəyişiklik edilməsi barədə sənəd  haqqında  məlumat verdi. Bildirildi ki, qanun  layihəsinin müvafiq maddəsində “Xarici ölkələrin siyahısı müvafiq icra hakimiyyəti orqanı tərəfindən təsdiq edilmiş təhsil müəssisələrində” sözləri “xarici ölkələrdə” sözləri ilə əvəz ediləcək.
Hüquq   siyasəti  və dövlət  quruculuğu  komitəsinin  sədri  Əli  Hüseynli  Cəzaların İcrası və Cinayət məcəllələrinə təklif olunan redaktə xarakterli dəyişiklikləri diqqətə çatdırdı.  Hər  iki  sənəddə  edilən  dəyişikliklər  məqbul  hesab  edildi.
İclasda “Məlumat azadlığı haqqında” qanunda dəyişikliklər edilməsi barədə sənəd müzakirə edildi.  Sənədə təklif olunan dəyişikliyə əsasən, qanunun “Alınması məhdudlaşdırılan məlumat” adlı 10-cu maddəsinin birinci və ikinci hissələrində “terror aksiyalarına” sözləri “terror aktlarına” sözləri ilə əvəz edilir. Dəyişiklik “Məlumat azadlığı haqqında” qanunu “Cinayət Məcəlləsində dəyişikliklər edilməsi haqqında” 2015-ci il 20 oktyabr tarixli qanuna uyğunlaşdırmaq məqsədi ilə edilir. Sənəd  səsə  qoyularaq  qəbul  edildi.
“Terrorçuluğa qarşı mübarizə haqqında” qanunda dəyişikliklər edilməsi barədə” məsələnin  müzakirəsində  bildirildi ki  sənədə  edilən  dəyişikliklər  texniki  xarakterlidir. Belə ki, qanunvericilik aktlarında hüquqi terminləri daha da konkretləşdirmək məqsədilə “Terrorçuluğa qarşı mübarizə haqqında” qüvvədə olan qanunun bir sıra maddələrində “terror aksiyaları” sözləri “terror aktları” sözləri ilə əvəz olunur.
Sənəd  yekdilliklə  səsə  qoyularaq  qəbul  edildi.
Sonra “Dövlət qulluğu haqqında” qanuna təklif olunan dəyişikliklər barədə məlumat verən  Əli  Hüseynli  bildirdi ki,  sənədin  əvvəlki oxunuşda  müzakirəsindən sonra deputatların bir sıra təklifləri nəzərə alınmışdır. Belə ki, “Dövlət qulluqçusunun əlavə təhsili”, “Dövlət qulluğuna qəbul”, “İnzibati vəzifələrin tutulması”, “Dövlət qulluqçularının fəaliyyətinin qiymətləndirilməsi”, “Dövlət qulluğuna xitam verilməsi” adlı maddələr yeni redaksiyada verilir, bəzi maddələr ləğv olunur və “Dövlət qulluğunda fəaliyyətin davam etdirilməsi” adlı 28-1 saylı yeni maddə əlavə edilir. Qeyd olundu ki, təklif olunan bu dəyişikliklərin məqsədi dövlət qulluğu sahəsində qanunvericiliyin təkmilləşdirilməsindən, dövlət qulluğuna qəbulun və dövlət qulluğunda fəaliyyətin davam etdirilməsinin səmərəliliyinin artırılmasından ibarətdir.  Sənəd  səsə  qoyularaq  qəbul  edildi.
Sonra  iclasda “Kənd  təsərrüfatının  kooperasiyası  haqqında”  qanun  layihəsi ikinci  oxunuşda  müzakirə edildi. Sənəd  haqqında məlumat  verən Aqrar  siyasət  komitəsinin sədri Eldar  İbrahimov  bildirdi ki, qanunun  birinci  oxunuşda  müzakirəsindən  sonra  sənəd xeyli   təkmilləşdirilib,  qanun  layihəsinə 6  yeni  bənd, 50-dən  artıq  yeni  müddəa daxil edilib. Qeyd  olundu ki, sənəd  kənd təsərrüfatı kooperasiyasının formalaşması və inkişafının,  kooperativlərin təşkilinin və fəaliyyyətinin  hüquqi  və iqtisadi  əsaslarını  müəyyənləşdirmək məqsədilə  hazırlanıb. Bu kooperativlər kənd təsərrüfatı məhsullarının istehsalı, tədarükü, emalı və satışı ilə bağlı birgə təsərrüfat fəaliyyətini həyata keçirmək, üzvləri istehsal vasitələri və maddi-texniki resurslarla təmin etmək, onların iqtisadi, sosial və digər tələblərini ödəmək məqsədi ilə xidmət göstərmək üçün yaradılır. Bildirildi ki, sənədə əsasən dövlət və bələdiyyə orqanlarının kənd təsərrüfatı kooperasiyası sahəsində vəzifələri də artırılıb.  Sənəd  səsə qoyularaq  qəbul  edildi.
İclasdakı  son iki məsələ - “Məhkəmələr  və  hakimlər  haqqında” qanunda və Mülki Məcəllədə  edilən  dəyişikliklərlə əlaqədar   Hüquq  siyasəti  və  dövlət  quruculuğu  komitəsinin sədri Əli Hüseynli  məlumat  verdi. Qeyd  edildi ki,  hər iki sənəd  Ali Məhkəmə tərəfindən   qanunvericilik təşəbbüsü ilə Milli Məclisə  təqdim edilib.  “Məhkəmələr  və hakimlər  haqqında” qanuna  edilən dəyişiklik 86-cı maddədə  hakimin  səlahiyyəti  bitdikdə onun müavinləri  tərəfindən  əvəz  edilə  bilməsi ilə bağlıdır. Maddəyə həmçinin, “Hakim  öz  vəzifəsini yerinə  yetirə  bilmədikdə”  və ya  “hakim  vəzifəsi vakant  olduqda” sözləri əlavə  edilir. Mülki Məcəllədə  edilən dəyişikliklərə  əsasən sənədin 218.3-cü maddəsində “satıcının” sözü “alıcının” sözü ilə əvəzlənəcək. 740-cı maddə isə “3000 manatdan yuxarı məbləğdə bağlanan borc müqaviləsi yazılı formada olmalıdır” məzmunlu redaksıyada veriləcək.  Hər  iki  sənəd  səsvermə  yolu  ilə  təsdiqləndi.
Milli Məclis  Sədri  Oqtay  Əsədov   76  nəfər millət  vəkilinin  müraciəti əsasında parlamentin növbədənkənar sessiyanın  çağırılacağını  söylədi və Milli  Məclisin yaz sessiyasını bağlı  elan  etdi. Sonra Azərbaycan  Respublikasının  Dövlət  himni  səsləndirildi  və   Milli  Məclisin yaz  sessiyası  öz  işini  başa  çatdırdı.

Milli Məclisin
Mətbuat  xidməti