Komitənin sədri Fuad Muradov bildirdi ki, yeni qanun layihəsinin hazırlanmasında məqsəd bu sahədə qanunvericilik bazasının zənginləşdirilməsidir. Beynəlxalq Antidopinq Təşkilatının tövsiyəsini nəzərə alaraq Azərbaycan qanunvericiliyində də bu istiqamətdə mühüm addımlar atılacaq. Belə ki, Beynəlxalq Antidopinq Təşkilatı idmançıların 7 mindən artıq dərmandan istifadə etməsinə qadağa qoyub. Bu dərmanlardan istifadə edən idmançılara, federasiyalara sanksiyalar tətbiq olunur. Bu, idmanın inkişafı baxımından dünyada müsbət qiymətləndirilir. Azərbaycanda da bu məsələ diqqət mərkəzində saxlanılır. Gənclər və İdman Nazirliyi nəzdində bununla bağlı müvafiq qurum yaradılıb. Ölkəmiz bu sahədə bir sıra beynəlxalq sənədlərə qoşulub. 2004-cü ildən Dünya Antidopinq Agentliyi də fəaliyyət göstərir.

İclasda çıxış edən gənclər və idman nazirinin müavini İsmayıl İsmayılov dopinq probleminin bütün dünyada mövcud olduğunu söylədi. O, bu problemə qarşı mübarizənin vacib olduğunu, lakin bu mübarizənin ədalətli şəkildə bütün ölkələrə qarşı eyni səviyyədə aparılmalı olduğunu diqqətə çatdırdı. Qeyd etdi ki, bu gün insanların kütləvi şəkildə gündəlik həyatda istifadə etdikləri dərmanlar, ağrıkəsicilər var ki, onların tərkibində də dopinq mövcuddur. Bütün bunlara aydınlıq gətirilməli, mübarizə sonadək aparılmalı və həmin dərmanların satışına nəzarət gücləndirilməlidir. Nazir müavini qeyd etdi ki, xüsusən yeniyetmələrin dopinqdən istifadə etmələri onların inkişaf dövründə problemlərlə qarşılaşmasına səbəb olur və gələcəkdə genofondumuza böyük zərər vura bilər.

Sonra çıxış edən deputatlar Ülvi Quliyev, Adil Əliyev, Rauf Əliyev, Şahin İsmayılov, müvafiq nazirliklərin nümayəndələri və peşəkar idmançılar yeni hazırlanacaq qanun layihəsi ilə bağlı qeyd və təkliflərini bildirdilər.

Bununla da işçi qrupunun iclası başa çatdı.