Sentyabrın 16-da Milli Məclisin Əmək və sosial siyasət  komitəsinin 2016-cı ilin payız sessiyasında ilk iclası keçirildi. Komitə  sədri Hadi  Rəcəbli  deputatları  yeni  sessiyanın  başlanması  münasibəti ilə  təbrik  etdikdən  sonra gündəlikdəki Əmək  Məcəlləsinə dəyişikliklər  edilməsi  barədə  qanun  layihəsini şərh etdi.
Bildirildi ki, Əmək Məcəlləsinin 211-ci maddəsinin 1-ci hissəsində müvafiq ixtisar aparılıb. Belə ki, layihəyə əsasən qeyd olunan hissədə əməyin mühafizəsi qaydalarının hər yerdə eyni cür yerinə yetirilməsini, bu Məcəllə ilə müəyyən edilmiş hallarda əmək şəraiti xüsusiyyətlərinin, əlavə məzuniyyət hüququnun və digər normaların tətbiqini təmin etmək məqsədilə müvafiq icra hakimiyyəti orqanının yoxlayaraq təsdiq edəcəyi siyahıdan “peşə və vəzifələri” sözləri çıxarılır.  Hadi Rəcəbli vurğuladı ki, ixtisarın aparılmasına səbəb  bu  sahədə mövcud  olan bürokratik əngəllərin aradan qaldırılmasına xidmət edir.
Sonra  komitədə “Şəhid adının  əbədiləşdirilməsi və şəhid  ailələrinə  edilən  güzəştlər  haqqında”, eləcə də “Valideynlərini  itirmiş və valideyn  himayəsindən  məhrum olmuş  uşaqların  sosial  müdafiəsi  haqqında”  qanunlarda  dəyişikliklər  edilməsi  barədə  məsələlərə  baxıldı. Komitə  sədri  qeyd  etdi ki, hər iki  sənəddə  aparılan  dəyişiklik mahiyyətcə eynidir. Sənədlərin müvafiq bəndlərində “təhsil  müəssisələrində”  sözlərindən  sonra “və müvafiq  icra  hakimiyyəti  orqanının  müəyyən etdiyi  elmi  təşkilatın  magistratura  səviyyəsində” sözləri əlavə  edilir.
Daha  sonra komitə  üzvləri yeni  hazırlanmış  “Turizm  haqqında”  qanun  layihəsini ilk oxunuşda müzakirə  etdilər. Hadi Rəcəbli  qeyd  etdi ki,  sənəd  Azərbaycanda  turizm  sahəsində  dövlət  tənzimlənməsi,  turizmin dövlət  idarəetməsi və nəzarəti,  bu  sahədə  təhlükəsizlik,  maliyyə mənbələrinin  təsnifatı,  turizm  fəaliyyətinin təşkili, sığorta  və məlumatlandırma  məsələləri  üzrə münasibətləri  tənzimləmək məqsədi  ilə hazırlanıb.  Bildirildi ki, əslində sənəd  ölkə başçısının turizm sahəsinin inkişafı ilə bağlı apardığı siyasəti dəstəkləyir. 8 fəsil, 93 maddədən ibarət olan qanun layihəsində turizm sahəsi ilə bağlı əsas anlayışlar, görüləcək tədbirlər  də öz əksini  tapıb.
Çıxış edən millət  vəkilləri  Rauf  Əliyev, Aytən Mustafayeva, İlham Məmmədov, Rafiq  Məmmədhəsənov, Araz Əlizadə, Mədəniyyət  və Turizm  Nazirliyinin nümayəndəsi Mahir Qəhrəmanov ölkədə  turizmin inkişafı ilə bağlı  görülən  işlərdən  danışdılar, təkliflərini  səsləndirdilər.
İclasda komitənin qarşıdakı sessiya üçün qanunvericilik işləri planı müzakirə  olundu. Komitə sədri bildirdi ki, payız sessiyasında “Turizm haqqında” qanunla  bərabər  digər qanun layihələrinin qəbulu da gözlənilir. O, qanun yaradıcılığı  subyekti  olaraq yeni təşəbbüslərlə çıxış  etməyin  vacibliyindən, bu sahədə deputatların üzərinə düşən vəzifələrdən danışdı.  Bugünkü reallıqlara əsaslanaraq bir sıra qanunlara əlavə və dəyişikliklərin edilməsi  zərurətinin yarandığını  vurğuladı.
Komitə  üzvləri yaz  sessiyasının  qanunvericilik işləri planını   razılıqla  qarşıladılar.
Müzakirə  edilən  qanun  layihələri  Milli Məclisin  plenar  iclasına  tövsiyə  olundu.

Milli Məclisin
Mətbuat  xidməti