Sentyabrın 22-də Milli Məclisdə  “Şərq  nağılı” – Əlil gənclərin  birinci Beynəlxalq  Yaradıcılıq Festivalı  çərçivəsində görüş  keçirildi.
 Tədbiri  açan Milli Məclisin Sosial  siyasət  komitəsinin sədri  Hadi  Rəcəbli bildirdi ki, bu gün fiziki  qüsurlu  insanların cəmiyyətə inteqrasiyasını sürətləndirmək, onların iş imkanlarını genişləndirmək məqsədilə Azərbaycanda çox  işlər  görülür. Komitə sədri  ölkədə parolimpiya idman növlərinin geniş vüsət aldığını, bir neçə ildir ki, Sumqayıt şəhərində məxsusi olaraq  bu idman  növləri ilə  məşğul olmaq  üçün  geniş idman kompleksinin fəaliyyət göstərdiyini dedi.  O, Milli Məclis tərəfindən qəbul edilən bütün qanunlarda fiziki qüsurlu  insanların  hüquqları ilə bağlı maddələrin  yer  aldığını  vurğuladı.  Qeyd olundu ki,  Bakı şəhərində yeni  tikilən bütün yeraltı keçidlərdə və metro stansiyalarında əlillərin rahat hərəkəti üçün  lazımi şərait yaradılıb. 
Tədbirdə  çıxış edən  Milli Məclisin Ailə, qadın və uşaq  məsələləri komitəsinin sədri Aqiyə Naxçıvanlı ölkəmizdə inklüziv təhsilin inkişafı  sahəsində  görülən işlərdən,  əlilliyi olan  və fiziki  qüsurlu  insanların  iş  fəaliyyəti  üçün həyata  keçirilən dövlət  proqramlarından  söhbət  açdı.  Bu  sahədə Belorus, Qazaxıstan, Qırğızıstan kimi ölkələrin  təcrübəsinin öyrənilməsinin əhəmiyyətini  vurğuladı.
 Parlamentin Gənclər  və İdman komitəsinin  sədri Fuad  Muradov çıxışında bildirdi ki, 20 ilə yaxındır ki, dünya parolimpiya çempionatlarında bizim  gənclər  də iştirak edir, müxtəlif yerlər tutur və Azərbaycan  bayrağını göylərə qaldırır, himnimizin  səsləndirilməsinə nail olurlar. O, Heydər  Əliyev  Fondunun prezidenti, millət  vəkili  Mehriban Əliyevanın   əlilliyi   olan  və  fiziki  qüsurlu  insanların  təhsili, həyat  şəraiti  və  fəaliyyətləri  üçün ölkədə  həyata  keçirdiyi təmənnasız  xidmətləri  yüksək  dəyərləndirdi.
Tədbirdə  Milli Məclisin  deputatı Çingiz  Qənizadə, MDB  üzrə  Dövlətlərarası  Humanitar Əməkdaşlıq  Fondunun   İcraçı  direktorunun müavini Elvira Dolya, Moskva Dövlət Humanitar İqtisad  Universitetnin rektoru  Vaqif  Bayramov, Azərbaycan Universitetinin rektoru Fərid  Əhmədov, Azərbaycan Diplomatiya  Akademiyasının prorektoru  Fariz  İsmayılzadə BMT-in Əlillərin hüquqları haqqında Konvensiyasının 142 ölkə tərəfindən təsdiqləndiyini qeyd  etdilər. Bildirildi ki, bu gün dünyada 1 milyard 180 milyon fiziki qüsurlu insan var. Əlillər cəmiyyətin ən  həssas  təbəqəsidir  və  bu sahə  bütün dünyada dövlətin, ali məktəblərin, sivil cəmiyyətlərin marağında olmalıdırlar. Qeyri-hökumət  təşkilatlarının bu məsələdəki rolu xüsusilə  vurğulandı. Çıxışlarda mövcud problemlərdən də söhbət açıldı.
Daha sonra toplantıda QHT nümayəndələri, Gürcüstan, Litva, Belarus, Moldova respublikalarından  gələn qonaqlar çıxış edərək əlilliyi olan gənclərin sosial inteqrasiyası, cəmiyyətə tam adaptasiyasının təşviqi, fiziki qüsurlu insanların hüquqlarının qorunması ilə bağlı problemlər, əlil insanların fəaliyyəti üçün imkanların artırılması  barədə fikirlərini bildirdilər.
Sonda  iştirakçıları  maraqlandıran suallara Milli Məclisin  deputatları  tərəfindən aydınlıq  gətirildi.

Milli Məclisin

Mətbuat  xidməti