V Beynəlxalq Humanitar Forumun ölkələrarası münasibətlərin dərinləşməsinə münbit şərait yaratdığını deyən Ziyafət Əsgərov beynəlxalq təşkilatlarda Azərbaycana verdiyi dəstəyə və Kolumbiya Senatında Xocalı soyqırımı barədə qəbul olunmuş qərara görə Kolumbiya dövlətinə təşəkkürünü bildirdi. Qeyd etdi ki, Azərbaycan iqtisadi inkişafına görə və tolerantlıq baxımından regionda lider dövlətdir. Bu məsələlər Forumda geniş müzakirə olunacaq və iştirakçılar Azərbaycanı daha yaxından tanıyacaqlar. 

Qeyd olundu ki, iki ölkə arasında iqtisadi münasibətləri daha da inkişaf etdirmək və ticarət dövriyyəsini artırmaq üçün potensial kifayət qədərdir. 

Söhbət zamanı Ziyafət Əsgərov qonaqlara Ermənistan-Azərbaycan Dağlıq Qarabağ münaqişəsi və  Xocalı soyqırımı barədə məlumat verdi. 

Kolumbiya Senatının vitse-prezidenti Daira de Yezus Galvis Mendes öz növbəsində ölkəsinin V Beynəlxalq Humanitar Foruma dəvət olunmasına görə təşəkkürünü bildirdi. Diqqətə çatdırdı ki, Kolumbiyada Dağlıq Qarabağ münaqişəsi barədə məlumatlıdırlar, Azərbaycanı yaxşı başa düşürlər və onunla həmrəydirlər. Çünki Kolumbiya da münaqişələrdən və məcburi köçkün problemindən çox əziyyət çəkmiş ölkədir.

Sonra görüşdə qarşılıqlı maraq doğuran digər mövzularda da müzakirələr aparıldı.