Oktyabrın  28-də Milli Məclisin növbəti plenar iclası  keçirildi. İclası Milli Məclisin Sədri Oqtay Əsədov aparırdı.
Gündəliyin  təsdiqindən sonra “Birləşmiş Millətlər Təşkilatının İqlim Dəyişmələri üzrə Çərçivə Konvensiyasının 21-ci Tərəflər Konfransı zamanı qəbul edilmiş “Paris Sazişi”nin təsdiq edilməsi haqqında” qanun layihəsi  müzakirə  edildi.  Sənədlə bağlı məlumat  verən  Milli Məclis  Sədrinin müavini, Təbii  ehtiyatlar, energetika  və ekologiya  komitəsinin sədri Valeh Ələsgərov   Sazişin ölkələrarası  ekologiya  problemlərində olduqca  gərəkli  olduğundan  söz  açdı.  Bildirildi ki, Azərbaycan tərəfindən imzalanan  sənəd müvafiq qaydada Milli Məclisdə ratifikasiya edilməlidir. İqlim  dəyişikliklərinə  təsir  edə bilən  tullantıların  azaldılması  ilə əlaqədar   müvafiq  işlərin  görülməsində Sazişin çox  faydalı  olacağı  qeyd  olundu. Sənəd millət  vəkillərinin  yekdil  səsverməsi ilə qəbul  edildi.
 “Azərbaycan Respublikası Hökuməti ilə İran İslam Respublikası Hökuməti arasında bitki mühafizəsi və bitki karantini sahəsində əməkdaşlıq haqqında” Sazişin təsdiq edilməsi barədə sənədi Aqrar  siyasət  komitəsinin sədri Eldar  İbrahimov şərh etdi. Sazişə əsasən, tərəflər öz ərazisində karantin tətbiq edilən zərərli orqanizmlərin meydana gəlməsi, həmçinin onlara qarşı mübarizə və nəzarət metodları ilə bağlı məlumatları mübadilə edəcəklər. Bildirildi ki, Saziş 2016-cı il avqustun 7-də Bakı şəhərində imzalanmışdır və 12 maddədən ibarətdir. Bundan  sonra Azərbaycan və İran karantin tətbiq edilən zərərli orqanizmlərin digər tərəfin ərazisinə keçməsinin qarşısının alınması üçün təftiş zəruri olduqda laboratoriya müayinələri, bitki və bitkiçilik məhsullarının və onların nəqliyyat vasitələrinin işlənməsi kimi lazımi tədbirləri həyata keçirmək üçün bütün vasitələrdən istifadə edəcək. Tərəflər öz ərazisinə genetik modifikasiya olunmuş bitkilərin və zərərvericilərin bioloji mübarizə agentlərinin daxil olmasını məhdudlaşdırmaq və ya qarşısını almaq hüququna malikdirlər. Saziş millət  vəkilləri  tərəfindən  dəstəkləndi.
Sonra  Milli Məclisin deputatı Azər  Kərimlinin  təqdimatı ilə  “Azərbaycan Respublikası, İran İslam Respublikası və Rusiya Federasiyası Prezidentlərinin” Bəyannaməsinin təsdiq edilməsi haqqında qanun layihəsi müzakirə  edildi. Qeyd  olundu ki, sənəd bu  ilin avqustunda Bakıda  hər  üç ölkə  Prezidentlərinin Zirvə  toplantısında  imzalanıb. Millət  vəkili  vurğuladı  ki, sənəd mədəniyyət, turizm, iqtisadi  sahələrdə  əməkdaşlığın  inkişafı ilə yanaşı, Xəzər  dənizinin  hüquqi  statusuna  dair  konvensiyanın  qəbuluna, Şimal-cənub  nəqliyyat  dəhlizinin səmərəliliyinin  artırılmasına, terrorizmə  qarşı  mübarizə  sahəsində  səylərin  birləşdirilməsinə, Dağlıq Qarabağ münaqişəsinin beynəlxalq hüquq  normalarına  uyğun  şəkildə  ədalətli  həllinə  böyük  töhfə  verəcəkdir. Müzakirələrdən sonra  sənəd  səsvermə  yolu ilə  təsdiq  edildi. 
Cinayət  və İnzibati Xətalar Məcəllələrində dəyişikliklər edilməsi haqqında  sənədlərlə əlaqədar  məlumat  verən  Hüquq  siyasəti  və  dövlət  quruculuğu  komitəsinin  sədri  Əli  Hüseynli  bildirdi ki,  hər  iki  sənəddə edilən  dəyişikliklər  2015-ci il 4 dekabrında “Dini  ekstremizmə  qarşı mübarizə  haqqında”  qanuna  uyğunlaşdırılmaq  məqsədi ilə  aparılıb. Dəyişikliklər dini ekstremist fəaliyyətlə məşğul olan dini qurumun ləğvi, dini ekstremizm əleyhinə aparılan əməliyyatlar zamanı əməliyyat zonasının hüquqi rejimi ilə bağlı yeni tələblər, eyni zamanda dini fanatizm zəminində milli, irqi ayrı-seçkiliyin salınması, bunun maliyyələşdirilməsi ilə bağlı 5 ilədək azadlıqdan məhrumetmə sanksiyalarını əhatə edir. Komitə  sədri  onu  da  diqqətə çatdırdı ki, dəyişikliklərə  əsasən milli, irqi, dini nifrətin  yaradılması, Azərbaycanın  hüdudlarından  kənarda  dini silahlı qruplaşmalara  qoşulmaq  və ya  onu  yaratmaq, dini  radikalizm, dini  fanatizm  və  dini  ekstremizm  yönündə  cinayət  tərkibli  əməl törədilirsə  azadlıqdan  məhrumetmə  cəzalarının  müddəti 3 ildən ömürlük  həbsə qədər nəzərdə  tutulur. Hər  iki  sənəd  səsə  qoyularaq  təsdiqləndi.
“Dini etiqad azadlığı haqqında” qanunda dəyişikliklər edilməsi barədə  qanun  layihəsi ilə əlaqədar  çıxış  edən  İctimai  birliklər  və  dini  qurumlar  komitəsinin  sədri Siyavuş Novruzov bildirdi ki, dəyişiklik Azərbaycandan xarici ölkələrə gedib orada din adı altında ayr-ayrı qruplaşmalarda fəaliyyət göstərməyin  qarşısını alacaq. Müstəqillik dövründə Azərbaycandan 3 min nəfər xaricdə dini təhsil alıb. Ölkədə 2166 məscid fəaliyyət göstərir ki, bunun da 1600-ü daimi fəaliyyətdədir. Həmin şəxslərdən 200-ü bu məscidlərdə çalışır. Bu gün Azərbaycanda həm Bakı Dövlət Universitetində, həm də İslam Universitetində dini mütəxəssislər yetişdirilir.
Milli Məclis Sədrinin müavini, İnsan  hüquqları  komitəsinin  sədri  Bahar Muradova  qanun layihəsinin onun  rəhbərlik  etdiyi  komitədə  də  müzakirə  edildiyini  vurğuladı.  Bildirldi ki, “Dini ekstremizmə qarşı mübarizə haqqında” qanuna uyğunlaşdırılmaq məqsədi ilə  dəyişikliklər  aparılan sənədə əsasən dini ekstremist fəaliyyətlə məşğul olan dini qurumların fəaliyyəti qadağan ediləcək, dini ekstremizm əleyhinə xüsusi əməliyyatların aparıldığı zonalarda KİV işçilərinin fəaliyyəti və ictimaiyyətə çatdırılan məlumatların forma və həcmi əməliyyat aparan orqan tərəfindən müəyyən ediləcək. Sənəd  səsə  qoyularaq  qəbul  edildi.
Sonra  Mədəniyyət  komitəsinin  sədri Rafael Hüseynov  bildirdi ki,   qanunvericiliyin uyğunlaşdırılması baxımından “Kütləvi informasiya vasitələri haqqında”, “Televiziya və radio yayımı haqqında”, “İctimai televiziya və radio yayımı haqqında”, “Telekommunikasiya haqqında” qanun layihələrinə dəyişikliklər edilməsi zərurəti meydana çıxıb. Bu zərurət “Dini ekstremizmə qarşı mübarizə haqqında” qanuna edilmiş dəyişikliklərdən irəli gəlir. Rafael Hüseynov qeyd etdi ki, müzakirəyə çıxarılmış qanun layihələrinə görə, dini ekstremizm əleyhinə əməliyyat aparılan zonada kütləvi informasiya vasitələri işçilərinin fəaliyyəti əməliyyat aparan orqan tərəfindən müəyyənləşdiriləcək. Həmçinin aparılan xüsusi əməliyyat barədə ictimaiyyətə ötürüləcək məlumatlar da həmin orqanın müəyyən etdiyi formada və həcmdə veriləcək. Dini ekstremizm əleyhinə xüsusi əməliyyat aparılan zonada fiziki və hüquqi şəxslərə rabitə xidmətləri müvəqqəti dayandırıla bilər. Sənədlər  ayrı-ayrılıqda  səsə  qoyularaq  qəbul  edildi.
Gündəlikdəki  növbəti 3 məsələ  -  “Elektroenergetika haqqında”, “Qaz təchizatı haqqında” və “Su təchizatı və tullantı suları haqqında”  qanunlarda  edilən dəyişikliklər  barədə  Valeh  Ələsgərov məlumat  verdi. Qeyd  olundu ki, hər  üç sənəddə  aparılan  dəyişikliklər “Dini ekstremizmə qarşı mübarizə haqqında” qanuna uyğunlaşdırılmaq məqsədi ilə  aparılıb.  Sənədlər  ayrı-ayrılıqda səsvermə  yolu  ilə  təsdiqləndi.
Hüquq  siyasəti  və  dövlət  quruculuğu  komitəsinin  sədri Əli  Hüseynli bildirdi ki, “Yol hərəkəti haqqında” qanunda  aparılan dəyişikliklər də bu  qəbildəndir. Bildirildi ki, sənəddə “Dini ekstremizmə qarşı mübarizə haqqında” qanuna uyğunlaşdırılmaq məqsədi ilə düzəlişlər edilib. Qanunun 12-ci  maddəsinin 1-ci bəndinə “dini ekstremizm əleyhinə xüsusi əməliyyat  aparıldıqda” sözləri  əlavə  edilir. Sənəd  səsə  qoyularaq  qəbul  edildi.
Sonra “Avtomobil yolları haqqında” qanunda aparılan dəyişikliklərlə  bağlı İqtisadi  siyasət, sənaye  və sahibkarlıq  komitəsinin sədri Ziyad  Səmədzadə  məlumat  verdi.   Sənəddə  edilən texniki  dəyişikliyin “Dini ekstremizmə qarşı mübarizə haqqında” qanuna uyğunlaşdırılmaq məqsədi ilə edildiyi  vurğulandı.  Sənəd  səsə  qoyularaq  qəbul  edildi. 
Fasilədən  sonra  Əli  Hüseynli  “Məhkəmələr və hakimlər haqqında” qanunda dəyişikliklər edilməsi barədə sənədi  şərh etdi. Bildirldi ki, dəyişikliklərin əsas  məqsədi məhkəmələrin ərazi  yurisdiksalarının, eləcə  də hakimlərin  intizam  qaydasında işdən çıxma  qaydalarının  müəyyənləşdirilməsindən  ibarətdir.  Sənəd bötövlükdə  məhkəmə islahatlarına dəstək  xarakteri  daşıyır. Qanun layihəsinə bir  neçə  yeni  maddə əlavə  edilib. Sənəd  səsə  qoyularaq  qəbul  edildi.
 “Avtomobil yolları haqqında” qanunda dəyişikliklər edilməsi barədə Ziyad  Səmədzadə  məlumat  verdi. Bildirildi ki,  qanun  layihəsi “Azərbaycan  Respublikasının  nəqliyyat-yol kompleksində  idarəetmənin  təkmilləşdirilməsi tədbirləri  haqqında” Prezidentin  22 fevral 2007-ci il tarixli 1992  nömrəli  sərəncamında  dəyişikliklər  edilməsi  barədə”  ölkə  başçısının  2015-ci il  28 dekabr  tarixli  Sərəncamının  və “Azəravtoyol” ASC haqqında” 2016-cı il  9 mart tarixli 826 nömrəli  fərmanının  tətbiqi ilə əlaqədar  hazırlanmışdır.  Sənəd  avtomobil yollarının qorunmasına, yol əmlakının qurulması və yeniləşməsinə, yol-nəqliyyat  kompleksinin  mühafizəsinə  xidmət  edir. Sənəd  millət  vəkilləri  tərəfindən  dəstəkləndi.
Ziyad  Səmədzadə   sonra “Dövlət rüsumu haqqında” qanunda dəyişiklik edilməsi barədə  məlumat verdi. Komitə  sədri qanun  layihəsindəki  dəyişikliklərin  mahiyyətini izah  edərək bildirdi ki,  əvvəllər Avropa Nəqliyyat Nazirləri  Konfransının  təlimat və  tövsiyələrinə  görə dövlət  rüsumunun məbləği 500 ABŞ dolları  idisə, indi  avrostandartların pilləsindən  asılı olaraq  bu  güzəştli  (500 dollar, 300 dollar  və 100 dollar) müəyyən olunur.  Sənəd  səsə  qoyularaq  qəbul  edildi.
Ziyad  Səmədzadə  daha sonra  Gömrük Məcəlləsində edilən dəyişiklikləri şərh  edərək bildirdi ki, Azərbaycanda malların və nəqliyyat vasitələrinin gömrük sərhədindən keçirilməsi ilə bağlı qanunvericilikdə yeni sistemin tətbiqi təsbit olunur. Qanun  layihəsinə yeni təklif olunan 13.1 maddəsinə görə, gömrük sərhəd buraxılış məntəqələrindən keçirilən malların və nəqliyyat vasitələrinin gömrük rəsmiləşdirilməsinin sadələşdirilməsi məqsədilə qısa idxal bəyannaməsi əsasında malların və nəqliyyat vasitələrinin gömrük ərazisinə buraxılmasında  “yaşıl, mavi, sarı və qırmızı dəhliz” buraxılış sistemləri tətbiq olunur. Malların və nəqliyyat vasitələrinin gömrük sərhədindən keçirilməsi üçün bu buraxılış sistemlərindən istifadə qaydaları müvafiq icra hakimiyyəti orqanı tərəfindən müəyyən edilir.
Təklif olunan 93.4-cü maddədə bildirilir ki, gömrük sərhəd buraxılış məntəqələrində “Yaşıl dəhliz” və digər buraxılış sistemlərinin tətbiqi ilə əlaqədar müvafiq infrastruktur yaradılır və xüsusi ayrılmış hərəkət zolaqları müəyyən edilir. Maddə 101.5-də isə bildirilir ki, “Yaşıl dəhliz” və digər buraxılış sistemlərindən istifadə olunmaqla malların və nəqliyyat vasitələrinin gömrük sərhədindən keçirilməsi üçün xarici ticarət iştirakçılarının risk qruplarının müəyyənləşdirilməsi meyarları müvafiq icra hakimiyyəti orqanı tərəfindən müəyyən edilir. Sənəd  səsvermə  yolu  ilə  təsdiq  edildi.
Sonra Ziyad  Səmədzadə  Vergi Məcəlləsinə və “Reklam haqqında” qanuna edilən dəyişikliklər barədə danişdi.  Qeyd  olundu ki, Vergi Məcəlləsinin 102.1.13-cü maddəsində və “Reklam haqqında” qanunun 32.1-ci maddəsində “müvafiq icra hakimiyyəti orqanı” sözü “maliyyə bazarlarına nəzarət orqanı” sözü ilə əvəz edilir. Layihələr  ayrı-ayrılıqda  səsə  qoyularaq  qəbul  edildi. 
İclasda Gənslər  və  idman komitəsinin sədri Fuad Muradov “İdmanda dopinq vasitələrindən və üsullarından istifadəyə qarşı mübarizə haqqında”  yeni qanun layihəsini ilk oxunuşda  təqdim etdi.  Bildirildi ki, bu gün bütün dünyada dopinqə qarşı tədbirlər sərtləşdirilir. İndiyədək Azərbaycanda dopinqlə mübarizə haqqında ayrıca qanun layihəsinin olmadığını deyən komitə sədri bildirdi ki, müvafiq dövlət qurumlarının mütəxəssisləri cəlb edilməklə hazırlanan yeni sənəd  8 fəsil, 42 maddədən ibarətdir. Qanun layihəsində dopinq nəzarətinin həyata keçirilməsi qaydaları, bu zaman aşkarlanmış pozuntular, idmançılara tibbi xidmətin göstərilməsi qaydaları və digər məsələlər öz əksini tapıb. Milli Antidopinq Agentliyinin təsis edilməsi nəzərdə tutulur. Eyni zamanda, bu agentlik nəzdində Apellyasiya Komissiyasının, İdman Arbitrajının yaradılması təklif edilir. Bu, problemli hallarda idmançılara öz hüquqlarını qorumağa yardım edə bilər. Millət  vəkilləri Azər  Badamov, Qüdrət  Həsənquliyev, Aqil  Abbas  sənədlə  bağlı  fikirlərini  bildirdilər. Layihə  birinci  oxunuşda  qəbul  edildi.
Sonra Ziyad  Səmədzadə  “Kredit büroları haqqında” qanun layihəsini  ikinci  oxunuşda  təqdim  etdi. Ölkədə  pul kredit  və  maliyyə  sisteminin təkmilləşməsinə,  kredit  tarixçələrinin  formalaşdırılması və  məlumatdan  istifadə  prinsiplərinin  nəzarəti  məsələlərinə  xidmət  edəcək  sənədin parlamentdə ilk oxunuşda  müzakirəsindən  sonra  xeyli  təkmilləşdirildiyi bəzi  qəliz  texniki  ifadələrin  dilimizdəki  daha  anlaşıqlı  sözlərlə  əvəzləndiyi  vurğulandı.    Sənəd  səsə qoyularaq qəbul  edildi. 
İclasin sonunda  “Məktəbəqədər təhsil haqqında” yeni qanun layihəsi də müzakirə  edildi. Sənədlə bağlı məlumat verən Elm və təhsil komitəsinin sədri İsa  Həbibbəyli  bildirdi ki, bir il əvvəl bu qanun layihəsinin hazırlanması üçün mütəxəssislərin və deputatların  iştirakı ilə işçi qrupu yaradılmışdı. Qanun layihəsi 5 fəsil 24 maddədən ibarətdir və onun hazırlanmasında müasir dünya təcrübəsi nəzərə alınıb. Qanuna görə, məktəbəqədər təhsil müəssisəsinin təsisçisi dövlət, bələdiyyələr, Azərbaycanın hüquqi şəxsləri və vətəndaşları ola bilərlər. Qeyd  olundu ki, məktəbəqədər təhsil müəssisəsinə lisenziya müddətsiz verilir. Bu təhsil müəssisələrinə yalnız ali təhsilli və bu sahədə ən azı 5 il təcrübəsi olan şəxslər rəhbər təyin oluna bilərlər. Müzakirəyə təqdim olunmuş qanun layihəsi məktəbəqədər təhsilin təmin olunması sahəsində dövlət siyasətinin prinsiplərini, məktəbəqədər təhsilin təşkilati-hüquqi və iqtisadi əsaslarını müəyyən edəcəkdir. Çıxış edən millət  vəkilləri Vahid  Əhmədov, Elmira  Axundova,  Fazil Mustafa, Qüdrət  Həsənquliyev müzakirəyə çıxarılmış qanun layihəsinin vacibliyini diqqətə çatdırdılar. Sənəd  səsə  qoyularaq  birinci  oxunuşda  qəbul  edildi.
Bununla  da  Milli Məclis  öz işini başa  çatdırdı.

Milli Məclisin
Mətbuat xidməti