Noyabrın 1-də Milli Məclisin  Mədəniyyət  komitəsinin  növbəti  iclası  keçirildi.
İclası açan komitə sədri Rəfael Hüseynov əvvəlcə “Kinematoqrafiya haqqında”  yeni hazırlanan  qanun  layihəsini  təqdim etdi. Bildirildi ki, sənəd filmlərin istehsalı, yayımlanması,  milli kinematoqrafiyanın təbliği və qorunması  sahəsində  yaranan  münasibətləri  tənzimləyir.  12 fəsil 40 maddədən  ibarət  olan  sənəddə  kino  sənəti  barədə  əsas  müddəalar,  bu  sahədə fəaliyyət  subyektləri,   dövlət  dəstəyinin formaları, qadağalar, milli film istehsalı, maliyyə  mənbələri və  digər  anlayışlar  öz əksini tapıb. Komitə sədri  kino  sənətinin  xalqların mədəniyyət sferasında  çox önəmli  yer  tutduğunu  vurğuladı. Qeyd  olundu ki, Azərbaycan  kinematoqrafçıları 1916-cı ildə  “Neft  və milyonlar  səltənətində”  adlı  ilk bədii filmin   çəkilməsindən keçən zaman ərzində unudulmaz  kino inciləri  yaradıblar.  Bu  gün  müəyyən səbəblərdən bu  sahədə  boşluqlar  yaransa  da, kino  sənətinin inkişafı, yaradıcılıq  imkanlarının  genişləndirilməsi  üçün  böyük  potensial var.  Bu  sahədə qanunvericilik  bazasının  təkmilləşdirilıməsi  üçün  sənəd çox  əhəmiyyətli olacaq.
 İclasda  iştirak  edən Mədəniyyət və turizm nazirinin müavini Ədalət Vəliyev bildirdi ki, bu gün Azərbaycanda film istehsalı üçün avadanlıqların gətirilməsində maraqlı olan qurumlar yoxdur. Nazir  müavini bunun əsas səbəbini bu avadanlıqların çox bahalı olması, sahibkarların isə tez gəlir əldə edən layihələrə daha çox maraq göstərməsi ilə izah etdi. Buna görə də kino texnikası, kino istehsalı üçün avadanlıq gətirənlərə vergi güzəştləri tətbiq oluna bilər. Çünki istənilən film kommersiya xarakteri daşıyır və gəlir gətirməlidir. Bunun üçün bizim studiyalar davamlı, dayanıqlı avadanlıqlara malik olmalıdır.
Ədalət  Vəliyev onu  da  diqqətə  çatdırdı ki, Azərbaycanda 40-a yaxın prodüsser mərkəzi fəaliyyət göstərir. Onların heç birinin film istehsal etmək və onun istismarı ilə məşğul olmaq üçün maddi-texniki bazası yoxdur. Ancaq buna  baxmayaraq  kinematoqrafçılarımız son illərdə bir  neçə filmimizin dünya kino bazarında uğur qazanmasına nail ola biliblər.  Cəfər  Cabbarlı  adına “Azərbaycanfilm” kinostudiyası da dövlət sifarişli filmlərin çəkilməsi üçün xarici ölkələrdən yüksək səviyyəli texniki avadanlıqlar icarəyə götürür. Çünki  studiyanın  özünün  malik olduğu  texnika  sovet  dövründən  qalmadır.
Millət  vəkilləri  Novruzəli Aslanov, Gövhər  Baxşəliyeva, Fəzail İbrahimli, Elmira  Axundova, Əflatun Amaşov, Ülviyyə Həmzəyeva, Ülviyyə Ağayeva, Cəfər Cabbarlı adına “Azərbaycanfilm”  kinostudiyasının direktoru Müşfiq Hətəmov, dəvət olunmuş  mütəxəssislər sənədlə bağlı fikirlərini bildirdilər, təkliflərini  səsləndirdilər.
Sonra  iclasda “Gömrük  tarifi  haqqında” qanuna və Vergi Məcəlləsinə  dəyişikliklər   müzakirə olundu. Qeyd  olundu  ki,  hər  iki  sənəddə  edilən texniki  dəyişiklik  milli  film  istehsalı ilə  bağlı bəndlərdə aparılıb.
Ətraflı  müzakirələrdən  sonra  müzakirə edilən sənədlərin Milli Məclisin  plenar  iclasının  müzakirəsinə  çıxarılması  qərara  alındı.

Milli Məclisin
Mətbuat  xidməti