Noyabrın 24-də Milli Məclisdə TürkPA-nın Ətraf mühit və  təbii  ehtiyatlar   komissiyanın 2-ci  iclası  keçirildi. 
İclası komissiyanın sədri, Milli Məclisin  Səhiyyə komitəsinin sədri Əhliman Əmiraslanov açdı. Tədbir iştirakçılarına  parlament rəhbərliyinin  salamlarını  çatdıran komissiya  sədri Ətraf  mühit  və  təbii  ehtiyatlar  komissiyasının TürkPA-nın ən  gənc  komissiyası olduğunu, buna  baxmayaraq  hər  zaman  qlobal mahiyyəti olan məsələlərin  müzakirəsini  önə çəkdiyini qeyd  etdi.   Bildirildi ki,  cəmiyyəti  gələcək qlobal təhlükələrdən qorumaq, insanları bu yöndə  maarifləndirmək komissiyanın əsas  fəaliyyət istiqamətlərindəndir.  Bu  gün  dünyada   qlobal iqlim  dəyişikliyi, atmosferin ozon qatının aşınması,  havanın, suyun, ətraf  mühitin çirklənməsi  böyük  təşviş  yaradır.  Bəzi Avropa  ölkələrində, Amerika qitəsində   yaşayan hər  bir  insan   il ərzində ətraf  mühitə 800 kiloqrama  yaxın  tuullantı  atırlar.  Orada  yaşayan əhalinin  sayını nəzərə alsaq  nə  qədər  böyük  təhlükə  qarşısında  olduğumuzu hiss  edərik. 
Bu  gün   dünyada  içməli  su ilə bağlı böyük   narahatlıq  hiss olunmaqdadır.  1,5  milyard  insan  çirklənmiş  sudan istifadə  edir,  3,5  milyard  insan  isə içməli sudan  hər  hansı bir  şəkildə  qıtlıq  və əziyyət  çəkir.  Hər  il dünyada  7 milyon hektar  torpaq korroziyaya    uğrayaraq  məhsuldarlığını  itirir.  Son yüz  ildə  mövcud 20 milyon hektar flora  və fauna örtüyünün 900 min hektarı  müxtəlif  səbəblərdən məhv olmuşdur.  Əhliman Əmiraslanov   rəhbərlik  etdiyi  komissiyanın  bu  məsələlərin  qarşısının  alınmasında,   maariflənmə prosesinin sürətləndirilməsində mühüm  işlər  gördüyünü diqqətə çatdırdı.
İclasda komissiyanın  sədr  müavini, Türkiyənin  TürkPA-dakı   nümayəndə heyətinin üzvü Feyzullah Kıyıklık “Qlobal iqlim  dəyişikliyi: üzv ölkələr  üçün  səbəbləri  və  nəticələrinə  dair  hesabat”   məruzəsini  təqdim  etdi. O,  mövcud  problemlə  əlaqədar  türkdilli  dövlətlər  arasında əməkdaşlığın  gücləndirilməsinin   önəmini  qeyd  etdi. Ətraf  mühitin  qorunması  üçün  təbii  qaynaqların  mühfizəsinin vacibliyinə  diqqət  çəkdi. İclasda  hesabat təsdiqləndi  və  səsvermə  yolu ilə Feyzullah Kıyıklık bu məsələ üzrə qurumun plenar  sessiyasında  məruzəçi təyin  edildi.
Toplantıda iştirak  edən Ekologiya  və Təbii  sərvətlər  nazirinin birinci  müavini Firdövsi Əliyev ölkəmizdə  son illər   ekologiya  və ətraf  mühitin  qorunması  sahəsində  görülən işlərdən, həyata  keçirilən layihələrdən danışdı. Ölkə başçısının sərəncamı ilə 2010-cu ilin Azərbaycanda “Ekologiya ili”  elan olunmasını bu sahəyə ən böyük  diqqət  kimi  qiymətləndirdi. Ekologiyanın və təbiətin mühafizəsinin  bütün bəşəriyyət  üçün  əsl töhfə olduğunu dedi.
Komissiyada Milli Məclisin deputatı Muxtar Babayev,  Qazaxıstan  parlamentinin nümayəndəsi Aliyə Saparova, Qırğızıstan  parlamentinin nümayəndəsi Müzeffer İsakov mövzu ilə əlaqədar fikirlərini  bildirdilər. Qeyd olundu ki, qloballaşan dünyada  türk  dövlətləri  arasında bütün sahələrdə əlaqələrin gücləndirilməsi   olduqca  vacib  və əhəmiyyətlidir.
Sonra Əhliman Əmiraslanov “Qlobal  iqlim  dəyişikliyi:  üzv ölkələr  üçün  səbəbləri  və  nəticələrinə  dair  tövsiyə  qərarı”nının  layihəsini  təqdim etdi.  Sənəd  təsdiq  edildi.
İclasın sonunda qurumun  prosedur qaydalarına uyğun olaraq “Türkdilli ölkələrdə səhralaşma  ilə mübarizə  üzrə  ekspert  toplantısının hesabat  layihəsi” qəbul edildi. Komissiyanın 3-cü  iclasının yeri və vaxtı təyin olundu. Bildirildi ki, gələn ilin ikinci yarısında Qazaxıstan paytaxtı Astanada keçirilməsi planlaşdırılan toplantı “Alternativ  enerji mənbələrinin  inkişafı” mövzusuna  həsr  olunacaq.
Bununla  da  komissiya  öz işini başa  çatdırdı.

Milli Məclisin
Mətbuat  xidməti