Sədr İsa Həbibbəyli əvvəlcə Milli Məclisin 2016-cı ilin payız sessiyası ərzində komitənin fəaliyyəti barədə hesabatı diqqətə çatdırdı. Bildirdi ki, ötən sessiyada komitənin 6 iclası keçirilmiş, 11 məsələ müzakirə olunmuşdur. Hesabat dövründə komitənin ünvanına 184 müraciət daxil olmuş və onlarla bağlı müvafiq tədbirlər görülmüşdür. Payız sessiyasında “Məktəbəqədər təhsil haqqında” Qanun layihəsi geniş müzakirələrdən sonra Milli Məclisdə birinci oxunuşda qəbul edilmiş, layihə ikinci oxunuş üçün hazırlanmışdır. Bundan başqa komitədə bir sıra qanunlara dəyişikliklər müzakirə olunaraq plenar iclasa tövsiyə olunmuşdur.

Komitənin 2016-cı ilin payız sessiyası dövründə fəaliyyəti qənaətbəxş hesab edildikdən sonra, 2017-cı ilin yaz sessiyası üçün iş planına baxıldı. Bildirildi ki, yaz sessiyasında “Məktəbəqədər təhsil haqqında” Qanun layihəsinin ikinci və üçüncü oxunuşlarda Milli Məclisin plenar iclasına çıxarılması və “Peşə təhsili haqqında” Qanun layihəsinin hazırlanması nəzərdə tutulur. 

Sonra iclasda “Peşə təhsili haqqında” qanun layihəsinin hazırlanması üzrə yaradılmış işçi qrupunun tərkibi təsdiq edildi. İsa Həbibbəylinin rəhbərlik edəcəyi işçi qrupuna deputatlar və müvafiq strukturların nümayəndələri daxil edilib. Komitə sədri yaz sessiyasının sonuna qədər qanun layihəsinin hazırlanmasının nəzərdə tutulduğunu diqqətə çatdırdı.

İclasda çıxış edən deputatlar Bəxtiyar Əliyev, Musa Qasımlı, Şəmsəddin Hacıyev, Asim Mollazadə, Ağacan Abıyev və müvafiq strukturların nümayəndələri gündəlikdəki məsələlərlə bağlı fikirlərini bildirdilər.

Sonda gündəlikdəki hər üç məsələ Milli Məclisin plenar iclasına tövsiyə olundu.