MÜDAFİƏ, TƏHLÜKƏSİZLİK VƏ KORRUPSİYA İLƏ MÜBARİZƏ KOMİTƏSİNDƏ

Komitə iclasları
10 fevral 2017 | 10:02   
Paylaşın:        

Fevralın 9-da Milli Məclisin Müdafiə, təhlükəsizlik və korrupsiya ilə mübarizə komitəsinin iclası keçirildi. İclasda -  “Azərbaycan Respublikasının dövlət sərhədi haqqında” və “Sərhəd qoşunları haqqında” qanunlara nəzərdə tutulan  dəyişikliklər müzakirə edildi.
Milli Məclis Sədrinin birinci müavini, komitənin sədri Ziyafət Əsgərov bildirdi ki, “Azərbaycan Respublikası  Dövlət Sərhəd Xidmətinin Əsasnaməsinin, strukturunun və hərbi qulluqçularının və işçilərinin ümumi say tərkibinin təsdiq edilməsi haqqında” Fərmana 2016-cı il 21 may və 9 iyun tarixlərində müvafiq dəyişikliklər edilmiş və Dövlət Sərhəd Xidmətinin üzərinə müəyyən vəzifələr qoyulmuş, hüquqlar verilmişdir. Prezidentin Fərmanında qeyd olunan məsələlərlə bağlı müzakirəyə çıxarılan qanunlara bir sıra düzəlişlər təklif olunur. 
Diqqətə çatdırıldı ki, “Dövlət sərhədi haqqında” qanunun  12-ci maddəsinin ikinci və üçüncü hissələri yeni redaksiyada verilir. Dəyişikliklərə görə nəqliyyat vasitəsi və ya mal sahibləri, yaxud nəqliyyat vasitələri barəsində səlahiyyətli olan digər şəxslər və ya onların nümayəndələri Gömrük Məcəlləsində nəzərdə tutulmuş hallarda gömrük orqanlarının və ya əməliyyat-axtarış, kəşfiyyat, əks-kəşviyyat  fəaliyyətinin iştirakı ilə nəqliyyat vasitələrini və yüklərini açmağa borcludurlar. Xəzər dənizinin Azərbaycana mənsub olan bölməsində milli maraqlara təhdidlər haqqında əməliyyat məlumatları olduqda, gömrük orqanlarının iştirakını təmin etmək mümkün olmadığı hallarda milli təhlükəsizliyi və ya dövlət sərhədinin toxunulmazlığını təmin etmək məqsədi ilə onlar sərhəd qoşunlarının tələbi ilə nəqliyyat vasitələrini və yüklərini aşmağa borcludurlar.
Şəxslərin Azərbaycanın dövlət sərhədindən qanunsuz keçməsinin, habelə narkotik vasitələrin, psixotrop maddələrin və onların prekursorlarının, güclü təsirli, zəhərli, zəhərləyici, radioaktiv, partlayıcı maddələrin və qurğuların, hərbi texnikanın, odlu silah və döyüş sursatının, nüvə, kimyəvi, bioloji və digər kütləvi qırğın silahlarının hazırlanmasında istifadə oluna bilən materialların və avadanlıqların, mülki dövriyyəsi qadağan olmuş və ya məhdudlaşdırılmış digər əşyaların dövlət sərhədindən qanunsuz keçirilməsinin qarşısını almaq məqsədilə sərhəd qoşunları ölkəmizin dövlət sərhədinin buraxılış məntəqələrində ölkəyə gələn və ölkədən gedən nəqliyyat vasitələrinə, yüklərə və başqa əşyalara müəyyən edilmiş qaydada baxış keçirirlər.
Ziyafət Əsgərov bildirdi ki,  bununla bağlı həmçinin “Sərhəd qoşunları haqqında” qanununda da müvafiq düzəlişlər edilmişdir. Düzəlişlərə əsasən sərhəd qoşunlarının vəzifə və hüquqları daha da genişləndirilmişdir. Onlar yuxarıda qeyd olunan hallarda dövlət sərhədinin buraxılış məntəqələrindən kənarda qeyri qanuni hərəkətlərin qarşısının alınmasını təmin etməli və bunun üçün müvafiq tədbirlər görməlidirlər.
Müzakirələr zamanı çıxış edən komitə üzvləri Fərəc Quliyev, Adil Əliyev, Aqil Abbas qanunlara edilən dəyişiklikləri məqsədəuyğun hesab etdilər, öz təkliflərini verdilər.
Yekunda hər iki qanun layihəsi yekdilliklə Milli Məclisin plenar iclasına tövsiyə olundu.
Milli Məclis Sədrinin birinci müavini Ziyafət Əsgərov Azərbaycanın işğal altındakı ərazilərinə qanunsuz səfərlər edən blogger Aleksandr Lapşinin ölkəmizə ekstradisiya olunmasına münasibət bildirdi.  Qeyd edildi ki, bu, dövlətimizin  diplomatik uğuru və beynəlxalq aləmdə yüksək nüfuzunun göstəricisidir. Vitse-spiker bu məsələdə göstərdiyi yardıma görə Belarus Respublikasına minnətdarlığını ifadə etdi, hər bir ölkənin beynəlxalq hüququn norma və prinsiplərinə əməl etməsini vacib saydı. Qeyd etdi ki, Azərbaycan beynəlxalq hüquqa daim hörmətlə yanaşan və ona əməl edən ölkədir.

 

Milli Məclisin
Mətbuat xidməti

 


Azərbaycan Respublikasının Milli Məclisi — Azərbaycan Respublikasında qanunvericilik hakimiyyətini həyata keçirən dövlət hakimiyyəti orqanı. Birpalatalı orqan olub 125 deputatdan ibarətdir. Deputatlar majoritar seçki sistemi, ümumi, bərabər və birbaşa seçki hüququ əsasında sərbəst, şəxsi və gizli səsvermə yolu ilə seçilirlər. Azərbaycan Respublikası Milli Məclisinin hər çağırışının səlahiyyət müddəti 5 ildir.

AZ EN RU