Martın 14-də  Milli Məclisin Çinlə parlamentlərarası  əlaqələr  üzrə  işçi  qrupunun üzvlərinin Çin Xalq Respublikasi Xarici ölkələrlə Dostluq  Cəmiyyətinin nümayəndələri ilə görüşü  oldu.
Qonaqları  salamlayan işçi  qrupun rəhbəri, parlamentin İctimai birliklər və dini qurumlar komitəsinin sədri Siyavuş Novruzov əvvəlcə Çinlə beynəlxalq  təşkilatlardakı  səmərəli əməkdaşlığımızdan söz  açdı. Bildirildi ki, Azərbaycan dövlət müstəqilliyini qazandıqdan sonra Çinlə  münasibətlər yüksək  səviyyədə inkişaf  etmişdir. Təməli ümummilli lider Heydər  Əliyev  tərəfindən qoyulan  bu  münasibətlər  ölkə  başçısı  İlham Əliyev  tərəfindən bu  gün uğurla  davam  etdirilir. O,  parlamentlərarası  əlaqələrin  inkişafinda  dostluq  qruplarının rolunu vurğuladı, qeyd  etdi ki, Azərbaycan parlamentində Çinlə dostluq  qrupunda 25  nəfər  təmsil olunur.  Sonra Çin Kommunist  Partiyası ilə Yeni Azərbaycan Partiyası  arasında  əlaqələrdən, təhsil  sahəsindəki  əməkdaşlıqdan  söhbət  açıldı. 
Qonaqlara  Ermənistan-Azərbaycan,  Dağlıq  Qarabağ  münaqişəsinin  hazırkı  durumu  barədə  məlumat verən  işçi qrupun rəhbəri  bildirdi ki,  işğalçı dövlət mütəmadi olaraq atəşkəsi pozur. Torpaqlarımızın 20 faizi  hələ də düşmən tapdağı altındadır.  Bir  milyondan  artıq  soydaşımız  oz  doğma dədə-baba  torpaqlarından  qovulub. Ermənistan beynəlxalq  təşkilatların Azərbaycan  torpaqlarını qeyd-şərtsiz  azad  etməsi  ilə bağlı   qəbul  etdiyi  heç bir qətnaməyə məhəl qoymur. Bu münaqişə bütün regionun  təhlükəsizliyini  təhdid  altında  saxlayır.
Çinin Xarici ölkələrlə Dostluq Cəmiyyətinin sədr müavini, nümayəndə  heyətinin başçısı  Song  Jingüu  səmimi görüş və ətraflı məlumat  üçün  təşəkkürünü  bildirdi.  Qonaq ölkəmizə Heydər  Əliyev  Fondunun  dəvəti ilə  gəldiklərini bildirdi, keçirdikləri görüşlərdən, səfərdən aldıqları  təəssüratdan  olduqca məmnun olduqlarını  qeyd  etdi.  O, Çinin BMT Təhlükəsizlik Şurasının tam hüquqlu  üzvü, bütün dünyada iqtisadi  qüdrətinə  görə seçilən bir  dövlət kimi  hər  zaman Azərbaycanın ərazi  bütövlüyünü  dəstəklədiyini bildirdi.  Ölkələrimiz  arasında  siyasi  münasibətlərdə  hər  zaman  qarşılıqlı inam və  etimadın  olduğunu  deyən  Song  Jingüu  Tayvan məsələsində  verdiyi  dəstəyə görə Azərbaycan  dövlətinə təşəkkürünü  ifadə etdi.
Söhbətdə hər iki ölkənin təşəbbüskarı olduğu yeni iqtisadi  layihələr, ölkələrimizarası humanitar təmaslar, münasibətlərin gələcək inkişaf  perspektivləri barədə fikir  mübadiləsi  aparıldı.
Görüşdə Milli Məclisin komitə  sədri Hadi Rəcəbli, deputatlardan Əliağa  Hüseynov, Hüseynbala Mirələmov, Malik Həsənov, Rauf  Əliyev, Xanlar Fətiyev və digər rəsmi şəxslər  iştirak  edirdilər.

Milli Məclisin
Mətbuat  xidməti