Aprelin 21-də Milli Məclisin bir sıra komitələrində təmsil olunan deputatların iştirakı ilə Təbii ehtiyatlar, energetika və ekologiya komitəsinin iclası oldu. Komitənin sədri, Milli Məclis Sədrinin müavini Valeh Ələsgərov bildirdi ki, gündəlikdə bir məsələ var.
 Azərbaycan Prezidentinin imzası ilə parlamentə daxil olmuş “Xəzər dənizinin Azərbaycan sektorunda Ümid yatağının və Babək perspektiv strukturunun daxil olduğu dəniz blokunun kəşfiyyatı və işlənməsi haqqında” Azərbaycan Respublikasının Dövlət Neft Şirkəti ilə SOCAR Umid Oil and Gaz Limited şirkəti arasında Risk Xidmət Sazişinin və ona əlavə olunmuş “Xəzər dənizinin Azərbaycan sektorunda Ümid yatağının və Babək perspektiv strukturunun daxil olduğu dəniz blokunun kəşfiyyatı və işlənməsi üzrə neft-qaz əməliyyatlarının aparılması haqqında” SOCAR Umid Oil and Gaz Limited şirkəti ilə Umid, Babək Eksploreyşn end Prodakşn şirkəti arasında Müqavilənin qəbul və təsdiq edilməsi, həyata keçirilməsinə icazə verilməsi barədə” qanun layihəsini slaydlarla təqdim edən vitse-spiker konkret faktlara diqqət yönəltdi.
Valeh Ələsgərov bildirdi ki, 1953-cü ildə aşkar olunmuş Ümid yatağı üzrə kəşfiyyat işlərinin bərpası 2008-ci ildə qərara alınıb və bu məqsədlə SOCAR Umid birgə müəssisəsi yaradılıb. 2010-2011-ci illərdə həmin birgə müəssisə tərəfindən aparılan kəşfiyyat işləri nəticəsində iki quyu qazılıb. İlkin hesablamalara görə, Ümid yatağında 2 milyard kubmetr təbii qaz və 40 milyon ton kondensat ehtiyatının olduğu müəyyənləşdirilib. Deputatların nəzərinə çatdırıldı ki, Ümid yatağı üzrə hasilat 2012-ci ildən etibarən həyata keçirilir. 2017-ci ilin 1 mart tarixinədək həmin yataqdan 1 milyard 314 milyon kubmetr təbii qaz və 217 min 700 ton kondensat hasil olunub. 
 İclasda məlumat verildi ki, 1954-cü ildə aşkar edilmiş Babək perspektiv strukturunda isə 1987-ci ildə aparılmış geniş seysmik kəşfiyyat işləri nəticəsində strukturun bioloji quruluşu dəqiqləşdirilib. Ehtimala görə, bu strukturda Ümid qaz kondensat yatağı ilə hidrodinamik əlaqədə olan qaz kondensat yatağı aşkar edilə bilər.
Gündəlikdəki qanun layihəsində yer almış Müqavilə barədə ətraflı məlumat verdikdən sonra komitə sədri Risk Xidmət Sazişinin müddəalarını da geniş şərh etdi. Bildirdi ki, sazişdən məqsəd yerli bazarın neft-qaza olan tələbatını SOCAR-ın fəaliyyəti sayəsində ödəmək, xarici bazardan asılılığı azaltmaq, daxili bazarda təbii qaza olan tələbatı mümkün qədər aşağı qiymətə təmin etməkdir. 
Müzakirə zamanı Aqrar siyasət komitəsinin sədri Eldar İbrahimov, Əmək və sosial siyasət komitəsinin sədri Hadi Rəcəbli, deputatlar Mirkazım Kazımov, Şəmsəddin Hacıyev, Tahir Kərimli, Bəxtiyar Əliyev, İlham Məmmədov qanun layihəsinə müsbət münasibət bildirdilər.
Sonra Təbii ehtiyatlar, energetika və ekologiya komitəsinin sədri Valeh Ələsgərov və komitənin üzvü, SOCAR-ın prezidenti Rövnəq Abdullayev millət vəkillərini maraqlandıran suallara aydınlıq gətirdilər. Qeyd olundu ki, uğurlu neft siyasəti ilə dünya miqyasında özünə möhkəm yer tutmuş Azərbaycan karbohidrogen ehtiyatları sahəsində bütün riskləri nəzərə alır və istənilən saziş bağlanarkən ilk növbədə ölkəmizin milli maraqları qorunur. Əvvəlki sazişlər kimi, bu saziş də böyük iqtisadi əhəmiyyətə malikdir.
Yekunda qanun layihəsi parlamentin plenar iclasına tövsiyə edildi.

                                                    Milli Məclisin

Mətbuat xidməti