Aprelin  25-də  Milli Məclisin növbəti plenar  iclası  keçirildi. İclası Milli Məclisin Sədri Oqtay Əsədov  aparırdı. Gündəliyin təsdiqindən  sonra  qanun  layihələrinin müzakirəsinə başlanıldı.
Əvvəlcə Milli Məclis Sədrinin birinci müavini, Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov  “Azərbaycan Respublikası Hökuməti ilə Türkiyə Respublikası Hökuməti arasında hərbi maliyyə əməkdaşlığı haqqında” Sazişin təsdiq edilməsi barədə qanun layihəsini təqdim etdi.  2016-cı il dekabrın  29-da  Bakı şəhərində və dekabrın 30-da  Ankara  şəhərində  imzalanmış Saziş  millət  vəkilləri  tərəfindən  razılıqla  qarşılandı.
 Əmək və sosial siyasət komitəsinin sədri Hadi Rəcəbli Əmək Məcəlləsində dəyişikliklər edilməsi haqqında qanun layihəsi barədə  məlumat verərək bildirdi ki, sənəddə nəzərdə tutulan dəyişikliklər “Korrupsiyaya qarşı  mübarizə haqqında” qanunda  dəyişikliklər  edilməsi barədə” 2016-cı il 14 oktyabr  tarixli  334-VQD nömrəli qanuna uyğunlaşdırmaq məqsədi  daşıyır. Komitə sədri Məcəllənin 65  və 267-ci  maddələrinə  edilən  dəyişiklikləri  diqqətə çatdırdı.  Sənəd  səsə  qoyularaq  qəbul edildi.
Sonra Ziyafət Əsgərov “Vətəndaşların müraciətləri haqqında” qanunda dəyişiklik edilməsi barədə məlumatında  bildirdi ki, aparılan dəyişiklik “Korrupsiyaya qarşı mübarizə haqqında” qanuna dəyişikliklər edilməsi barədə 2016-cı il 14 oktyabr tarixli 334-VQD nömrəli sənədə uyğunlaşdırmaq məqsədi daşıyır. Qeyd olundu ki, layihənin əsas mahiyyəti korrupsiya ilə əlaqədar hüquqpozmalarla bağlı məlumatların verilmə qaydaları və məlumat verən şəxsin dövlət müdafiəsi ilə bağlı normaların müəyyən edilməsidir. Sənəd  səsvermə  yolu ilə təsdiqləndi.
Hüquq siyasəti və dövlət quruculuğu komitəsinin sədri Əli Hüseynli İnzibati Xətalar Məcəlləsində dəyişikliklər edilməsi haqqında qanun layihəsi barədə məlumat verdi. O, qeyd  etdi ki, sənədə korrupsiya ilə əlaqədar hüquqpozmalar barədə məlumat verən şəxsin  dövlət  müdafiəsi  ilə bağlı qanunvericiliyin tələblərinin pozulması  hallarını tənzimləyən  yeni 594-2-ci maddə əlavə  edilir və burada cərimə formasında  müəyyən edilən məsuliyyət  nəzərdə tutulur.   Sənəd  səsə  qoyularaq  qəbul  edildi.
Əli Hüseynli “Dövlət qulluğu haqqında” qanunda dəyişikliklər edilməsi barədə sənədlə əlaqədar məlumat verdi. Bildirildi ki,  sənədə  dəyişikliklər  Azərbaycan Konstitusiyasına 2016-cı il sentyabrın 26-da keçirilmiş ümumxalq səsverməsində (referendumda) qəbul edilmiş dəyişikliklərə uyğun olaraq, yeni yaradılmış Birinci  vitse-prezidentin  xidmətində olan  dövlət  qulluqçularının  statusunu, təminatını və dövlət  orqanındakı  təsnifatını müəyyən etmək  üçün  təklif  edilir. Qeyd  olundu  ki, inzibati  vəzifələrin ali təsnifatında  Birinci vitse-prezidentin  fəaliyyətini təmin edən  struktur  bölmələri, rəhbəri, müavin və müşavir  vəzifələri nəzərdə tutulur. Bu qanun layihəsi məhz  həmin  prosedurların yerinə  yetirilməsini özündə ehtiva  edir.  Sənəd  səsə qoyularaq  qəbul edildi.
Sonra Əli Hüseynli  “Məhkəmələr və hakimlər haqqında” qanunda dəyişiklik edilməsi barədə  məlumat verdi. Qeyd  olundu ki,  dəyişiklik “Məhkəmə-Hüquq Şurası haqqında” qanunda  dəyişiklik  edilməsi barədə 2016-cı il 29 noyabr  tarixli 437-VQD nömrəli qanuna uyğunlaşdırmaq  məqsədi  ilə edilib. Bu sənəd  də  deputatların razılığı ilə təsdiqləndi.
Əli Hüseynli “Yol hərəkəti haqqında” qanunda dəyişikliklər edilməsini  şərh edərək bildirdi ki,  sənədin 27-ci maddəsi Azərbaycan ərazisində bütün mexaniki nəqliyyat vasitələrinin və onların qoşqularının  qanunauyğun olaraq  müvafiq  icra  hakimiyyəti  orqanı  tərəfindən  qəbul edilən “Mexaniki nəqliyyat  vasitələrinin  və onların qoşqularının  müəyyən  edilmiş  qaydada  dövlət  qeydiyyatından  keçirilməsi və  dövlət  qeydiyyatı  üzrə  uçota  alınması  haqqında”  Əsasnamə ilə müəyyən  edilərək uçota alınmasını  müəyyən edir. Yeni  təklifə əsasən  nəqliyyat  vasitəsi  dövlət  qeydiyyatından  keçirilmək və uçota  alınmaq  üçün  mühərrik, ban və şassi  nömrələrini,  habelə rəngini  tutuşdurmaq  məqsədi ilə  müayinə  edildikdən  sonra texniki baxışdan keçirilir.  Qanuna əsasən  nəqliyyat  vasitəsi istehsal olunduğu  vaxtdan 4 il keçdikdə  - iki ildə bir  dəfə, istehsal olunduğuı  vaxtdan 10 il keçdikdə ildə bir  dəfə  texniki baxışdan  keçirilməsi nəzərdə tutulur.   Nəticə  etibarı ilə  təklif  texniki  baxışı həyata  keçirən qurumların  fəaliyyətinin təkmilləşdirilməsinə xidmət  edir.  Sənəd  ətraflı müzakirələrdən sonra  təsdiqləndi. 
Sonra Əli Hüseynli Miqrasiya Məcəlləsində dəyişikliklər edilməsi haqqında  2015-ci il 29 may tarixli 1295-IVQD nömrəli qanunda dəyişiklik edilməsi barədə  danışdı. Komitə  sədri  qeyd  etdi ki,  dəyişiklik “Azərbaycan Respublikası vətəndaşının yeni nəsil  şəxsiyyət  vəsiqəsinin və 15 yaşı  tamam  olmamış  Azərbaycan  vətəndaşının fərdi  identifikasiya  kartının  tətbiqi müddətləri ilə əlaqədar  bəzi  qanunlarda  dəyişiklik edilməsi barədə”  2015-ci  il  28 aprel tarixli 1276-İVQD  nömrəli  qanunda  dəyişikliklər  edilməsi barədə” Azərbaycan Respublikasının  2016-cı il  29 noyabr   tarixli  433-VQD  nömrəli qanunun icrası  ilə əlaqədar  təklif  edilir.  Həmin  qanunlara  əsasən bəzi  qanunlara  dəyişikliklərin qüvvəyə minməsi  tarixi 1 yanvar 2018-ci  il tarixindən nəzərdə  tutulur.  Sənəd  səsvermə  yolu ilə   təsdiqləndi.
 “Ədliyyə orqanlarında qulluq keçmə haqqında” qanunda dəyişiklik edilməsi barədə də Əli Hüseynli  məlumat verdi.  Bildirildi ki, dəyişiklik “Ədliyyə orqanlarının  inkişafı haqqında”  Azərbaycan Prezidentinin  17 avqust 2006-cı il tarixli fərmanında  dəyişiklik  edilməsi barədə 18 noyabr  2016-cı il   tarixli 1119 nömrəli fərmanı ilə əlaqədardır.  Bu fərmanla təsdiq edilmiş “Azərbaycan Respublikası Ədliyyə  Nazirliyinin Strukturu”nun 3-cü hissəsində Ədliyyə Nazirliyi Strukturuna  daxil olan ədliyyə orqanları  və təşkilatlar müəyyən edilir.  Qanun layihəsinə  təklif  olunan dəyişikliklər  təkmilləşdirmə  məqsədi daşıyır. Sənəd  səsvermə  yolu ilə qəbul  edildi.
 Əli Hüseynli 2005-ci il 28 iyun tarixli 960-IIQ nömrəli Qanunla təsdiq edilmiş “Azərbaycan Respublikasının ərazisində dövriyyəsi qadağan edilmiş, məhdudlaşdırılmış və nəzarət edilən narkotik vasitələrin, psixotrop maddələrin, habelə Azərbaycan Respublikasının ərazisində idxalına, ixracına, tranzit nəql edilməsinə və istehsalına lisenziya tələb olunan prekursorların siyahıları”nda dəyişikliklər edilməsi haqqında qanun layihəsi ilə əlaqədar dedi ki, dövriyyəsi  qadağan olunan və tənzimlənən maddələrin siyahısına BMT-nin Narkotiklər  üzrə Komisssiyasının üzv ölkələrə verdiyi  tövsiyələrə əsasən yeni növ 2 narkotik və 4 psixotrop  maddələrin adları bu  siyahıya  əlavə  edilir. Sənəd səsə  qoyularaq  təsdiqləndi.
 Əli Hüseynli 2005-ci il 28 iyun tarixli 961-IIQ nömrəli qanunla təsdiq edilmiş “Şəxsin cinayət məsuliyyətinə cəlb edilməsi üçün kifayət edən narkotik vasitələrin və psixotrop maddələrin miqdarına, habelə onların külli miqdarına görə siyahıları”nda dəyişikliklər edilməsi haqqında sənədlə əlaqədar bildirdi ki, bu qanun layihəsi əvvəlcə qəbul edilən sənədin davamıdır.  Burada  narkotik maddə  və psixotrop maddələrin külli miqdarı müəyyən edilir  və milliqramla  göstərilir.  Sənəd səsə  qoyularaq qəbul edildi. 
İclasda Mənzil Məcəlləsində dəyişikliklər edilməsi haqqında sənəd müzakirə  edildi. Əli Hüseynli  qanun  layihəsinin təqdimatında  bildirdi ki, dəyişikliyə əsasən, mehmanxana, mehmanxana tipli obyektlər və müvəqqəti yaşayış üçün nəzərdə tutulan digər tikinti obyektləri “yerləşdirmə vasitələri” adlandırılır və statusuna görə yaşayış sahəsi hesab edilirlər. Nəticədə, özəl mənzil fonduna aid çoxmənzilli yaşayış sahələrinin və yaşayış evlərinin mülkiyyətçi tərəfindən yerləşmə vasitəsi kimi istifadəsi üçün heç bir prosedur qaydası tələb olunmayacaq. Sənədlə  əlaqədar  müzakirələrdə millət  vəkilləri Hadi Rəcəbli, Asim Mollazadə, Əflatun Amaşov fikirlərini bildirdilər. Sənəd  səsə  qoyularaq  qəbul  edildi.
Əli  Hüseynli gündəlikdəki  digər  3 məsələ Cinayət, İnzibati Xətalar və Mülki Məcəllələrə  edilən əlavə və dəyişikliklə bağlı   sənədləri birlikdə şərh  etdi. Komitə  sədri bildirdi ki,  təklifin mahiyyəti hüquqi şəxslərə aidiyyəti olan şəxslərlə əqdlərin bağlanması qaydalarının pozulması  hallarına görə cinayət məsuliyyətini nəzərdə  tutur. Bu müəyyən cərimələr  və  cinayət  məsuliyyətinə cəlbetmə halı ola bilər. Sənəddə bağlanmış əqdlərin  səhmdara  vurduğu  ziyana görə də məsuliyyət  halları  əksini tapır. Bildirildi ki, sonradan məhkəmə mübahisələrinə  gətirib çıxaran hüquqi  şəxslərlə bağlı əqdlərin bağlanması  qaydalarında  baş verən  pozuntuların qarşısını alacaq. Qanun  layihələri ayrı-ayrılıqda  səsə  qoyularaq  qəbul edildi. 
İqtisadi siyasət, sənaye  və sahibkarlıq  komitəsinin sədri  Ziyad Səmədzadə “Müflisləşmə və iflas haqqında” qanunda dəyişikliklər edilməsi barədə  məlumat  verərək bildirdi ki, sənəd  müflisləşmə  zamanı  təyin olunan  əmlak inzibatçısının hüquq  və vəzifələrini,  borclunun kreditorlarının hüquqlarını, müəssisənin sağlamlaşdırma  şərtlərini,  müflisləşmə  zamanı  ödənişlərin növbəliliyini,  borcluya  aidiyyəti olan  şəxsləri  dəqiqləşdirmək məqsədi ilə hazlrlanmışdır.  Sənəd millət  vəkillərinin razılığı ilə qarşılandı.
Milli Məclisin bugünkü iclasında  Ali Məhkəməyə yeni hakimin seçilməsi məsələsinə də baxıldı. Əziz Seyidovun Ali Məhkəmənin hakimliyinə namizədliyi irəli sürüldü. Millət vəkilləri Əziz Seyidovun təyinatının lehinə səs verdilər.
İclasda  Mülki Məcəllədə və İnzibati  Xətalar  Məcəlləsində “Kommersiya  sirri haqqında” qanuna  uyğunlaşdırmaq  məqsədi ilə edilən  texniki  dəyişikliklər  də təsdiqləndi.
Sonra Ziyad Səmədzadə  Vergi Məcəlləsində “beynəlxalq  daşıma”   anlayışının dəqiqləşdirilməsi məqsədi ilə edilən  dəyişikliyi  diqqətə çatdırdı.  Qeyd  olundu ki, beynəlxalq  daşıma  - yüklərin, sərnişinlərin, baqajın və poçtun  daşıma  sənədləri  əsasında müxtəlif  nəqliyyat  növləri ilə  Azərbaycan ərazisində yerləşən  göndərilmə (təyinat) məntəqəsi ilə digər  dövlətdəki təyinat (göndərilmə) məntəqəsi  arasında  daşınmasıdır.  Sənəd  səsə  qoyularaq  qəbul  edildi.
Ziyad Səmədzadə “Daşınmaz əmlakın dövlət reyestri haqqında” qanunda dəyişikliklər edilməsi barədə  qanun layihəsi barədə  danışarkən vurğuladı ki,  sənədə  təklif  olunan dəyişiklik  hüquq sahiblərinə daşınmaz  əmlaka  mülkiyyət  və digər əşya  hüquqlarının  əmələ gəlməsi, eləcə də başqasına  keçməsinə dair  qeydiyyat  orqanı tərəfindən  verilən  çıxarışın  dövlət  reyestrindən  elektron  informasiya  sistemləri  vasitəsilə əldə  etmək imkanı verir. Qanun layihəsi səsvermə  yolu ilə  təsdiqləndi.
İclasda Ziyad Səmədzadə “Dövlət rüsumu haqqında” qanunda dəyişikliklər edilməsi barədə də  məlumat verdi. Bildirildi ki, sənədin 22-ci (Lisenziyalaşdırılan sahibkarlıq fəaliyyəti növlərinə lisenziya verilməsinə görə dövlət rüsumunun dərəcələri) maddəsinə yeni bənd əlavə edilir. Yeni bəndə əsasən valyuta mübadiləsi fəaliyyətinin həyata keçirilməsi lisenziyalaşdırılan sahibkarlıq fəaliyyəti növü hesab ediləcək və buna görə 500 manat rüsum tələb olunacaq. Sənəd qəbul edildi.
Hüquq  siyasəti  və  dövlət  quruculuğu  komitəsinin  sədri Əli Hüseynli  növbəti 4 məsələ - “Yol hərəkəti haqqında”,  “Miqrasiya orqanlarında qulluq keçmə haqqında Əsasnamə”də, Vergi  və Gömrük Məcəllələrində dəyişikliklər edilməsi barədə birgə məlumatı nəzərə  çatdırdı. Qeyd  olundu ki,  dəyişikliyin əsas mahiyyəti   büdcə  vəsaitlərinin daha səmərəli istifadə olunmasından büdcədənkənar  fondların  vəsaitlərinə nəzarət  mexanizmlərinin təkmilləşdirilməsindən ibarətdir.  Belə ki, qanunvericilikdə bir  sıra hallarda cərimələr,  haqqı  ödənilən  xidmətlərdən daxil olan vəsaitlər  həmin  qurumun özündə qalırdı. Təklif olunur ki, bu vəsaitlər  bir nəzarət  orqanında  cəmləşsin.  Nəzarət orqanı Azərbaycan Prezidentinin Fərmanı ilə müvafiq  icra  hakimiyyətinin hansı orqandan ibarət olacağı əksini tapacaqdır.   Sənədlər  ayrı-ayrılıqda  səsə  qoyularaq  təsdiqləndi.
 Ziyad Səmədzadə “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” qanuna dəyişiklik edilməsi barədə sənədi izah edərkən bildirdi ki,  qanun cinayət  təqibinin həyata  keçirilməsi və məhkəmə icraatı  çərçivəsində  aparılan yoxlamalara  şamil edilmir. Sənəd  səsə  qoyularaq  qəbul  edildi.
Sonra Ziyad Səmədzadə “Azərbaycan Respublikası Mərkəzi Bankı haqqında” Qanunda dəyişikliklər edilməsini şərh etdi. Bildirildi ki, ölkəmizdə pul-kredit  siyasətinin daha  təkmil həyata  keçirilməsi üçün  Mərkəzi bank tərəfindən kredit təşkilatlarına (banklara) məqsədli kreditlərin  verilməsini nəzərdə  tutan  49-1-ci maddə ləğv edilir. Qanun layihəsi  səsvermə yolu ilə təsdiq olundu.
Ziyad Səmədzadə “Valyuta tənzimi haqqında” qanunda edilən dəyişiklikləri də diqqətə çatdırdı. Onun sözlərinə görə, bundan sonra valyutadəyişmə məntəqələrinə nəzarəti Maliyyə Bazarlarına Nəzarət Palatası həyata keçirəcək. Qeyd edildi ki, lisenziyalar təkcə poçtlara deyil, eyni zamanda banklara, rezident və qeyri-rezident vətəndaşlara veriləcək. Valyutadəyişmə məntəqəsinə lisenziya almaq üçün girov tələb ediləcək. Millət  vəkilləri Vahid  Əhmədov, Qüdrət Həsənquliyev, Elmira Axundova, Siyavuş Novruzov, Əli Məsimli, Zahid  Oruc, Yevda  Abramov cıxış edərək valyuta tənzimi ilə bağlı  ölkə gündəmində mövcud  olan problemlərin həlli  istiqamətində fikirlərini bildirdilər.
İclasda  “Dövlət rüsumu haqqında” və “Lisenziyalar və icazələr haqqında” qanunda müvafiq  dəyişikliklər  də təsdiqləndi.
Ziyad Səmədzadə “Daşınmaz əmlakın dövlət reyestri haqqında” qanunda dəyişikliklər edilməsi barədə  sənədin  “Şəhərsalma  və Tikinti Məcəlləsinə  dəyişikliklər  edilməsi  haqqında” 2016-ci il  14 oktyabr  tarixli  345-VQD nömrəli qanunun tətbiqi ilə əlaqədar  hazırlandığını dedi. Bildirildi ki, sənədin  8-ci  maddəsinin  müvafiq  bəndlərində “digər  tikinti obyektləri” və “sifarişli poçt  göndərişi ilə və ya bilavasitə”  sözləri əlavə olunur.  Sənəd səsə  qoyularaq  qəbul  edildi.
Sonra Səhiyyə komitəsinin sədri Əhliman Əmiraslanov “Dərman vasitələri haqqında” qanunda dəyişiklik edilməsi barədə sənədlə bağlı məlumatda  vurğuladı ki, normativ hüquqi  aktların, o cümlədən  texniki  normativ hüquqi aktların tələblərinə cavab verməyən, keyfiyyətsiz, mənşəyi məlum olmayan, yaradıcılıq müddəti bitmiş dərman  vasitələrinin  satışı, satış məqsədi ilə saxlanması və ya idxalı qadağan edilir. Qeyd  olundu ki, nəzərdə tutulan dəyişiklik “İnzibati Xətalar Məcəlləsində dəyişiklik edilməsi haqqında” 2016-cı il 14 oktyabr tarixli qanuna uyğunlaşdırmaq məqsədi daşıyır. Qanun layihəsi  millət  vəkilləri tərəfindən  məqsədəuyğun  hesab edildi.
Sonra  Əhliman Əmiraslanov bildirdi ki,  “Mülki dövriyyədə olmasına yol verilməyən (mülki dövriyyədən çıxarılmış) əşyaların siyahısı haqqında” qanuna edilən dəyişikliyə əsasən, burada göstərilən siyahının “İnsan orqanı və toxumaları” adlı 12-ci bəndinə “gözün buynuz qişası istisna olmaqla” sözləri əlavə edilir. Müvafiq olaraq, “Mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların siyahısı haqqında” qanuna yeni – “gözün buynuz qişası” maddəsi əlavə olunur. Diqqətə çatdırıldı ki, bu dəyişikliklərdən sonra gözün buynuz qişasının Azərbaycana gətirilməsi ilə bağlı yaranan çətinliklər aradan qaldırılacaq. Əhliman Əmiraslanov ölkəmizdə gözün buynuz qişası bankının yaradılmasının zəruri olduğunu söylədi. Burada əks olunan məsələlərin insanların sağlamlığının qorunmasında mühüm əhəmiyyət kəsb etdiyini dedi. Eyni zamanda, qanunun ölkədə transplantologiya sahəsinin inkişafında müsbət rol oynayacağını vurğuladı. Sənədlər  ayrı-ayrılıqda  səsə  qoyularaq  qəbul edildi.
İclasın sonunda “Daşınar əmlakın yüklülüyü haqqında” qanun layihəsinin  birinci oxunuşda  müzakirəsi keçirildi.  Ölkədə yeni iqtisadi  sistemin formalaşdığını deyən  Ziyad Səmədzadə bildirdi ki, qanun layihəsinə əsasən, daşınar əmlakın rəsmi reyestrlərində qeydiyyata alınan daşınar əşyalar və dövlət qeydiyyatına alınmalı olan kağızlar istisna olmaqla, yüklülük predmetini istənilən daşınar əmlak, o cümlədən gələcəkdə yüklülük sahibinin mülkiyyətində olacaq daşınar əmlak təşkil edir. Layihədə qeyd olunur ki, daşınar əmlakın yüklülüyü dövlət, bələdiyyə və xüsusi yüklülük növlərinə bölünür. Sənəddə daşınar əmlakın yüklülük sahiblərinin tələblərinin ödənilməsi, yüklülük predmetinin özgəninkiləşdirilməsi, satış üsulları, əldə olunan gəlirin bölüşdürülməsi, daşınar əmlakın yüklülüyünün dövlət reyestri və yüklülüyün qeydə alınması qaydaları əksini tapmışdır. Layihəyə əsasən kredit təşkilatları mal-qaranı, maşın və avadanlıqları, kiçik texnikanı, televizor və kompüteri və digər daşınar əmlakları girov kimi qəbul edə biləcəklər. Qanun daşınar əmlakın qirov qoyulması əsasında sahibkarların, fiziki şəxslərin maliyyə resursuna çıxışını asanlaşdıracaq. Layihədə daşınar əmlakın dövlət reyestrinin yaradılması da nəzərdə tutulur. Burada həmin əmlaklarla bağlı məlumatlar, onların göstəriciləri qeydə alınacaq və reyestrə ötürüləcək. Beləliklə, istənilən kredit təşkilatı daşınar əmlakı girov kimi qəbul etməzdən əvvəl reyestr vasitəsilə bu əmlakın üzərində yüklülüyün olub-olmadığını aydınlaşdıra biləcəkdir. Ekspertlər hesab edir ki, bu qanunun qəbulundan və tətbiqindən sonra bankların girov kimi qəbul etdiyi daşınar əmlakın sayı 2 dəfə artacaq, kiçik və orta biznesə kredit qoyuluşunda nəzərəçarpacaq irəliləyiş olacaq. Layihə ilk oxunuşda səsə qoyularaq qəbul edildi.
Bununla  da Milli Məclis  öz işini  başa çatdırdı.

Milli Məclisin
Mətbuat  xidməti