Mayın 31-də Milli Məclisin 2017-ci il yaz sessiyasının sonuncu iclası keçirildi. İclası  parlamentin Sədri Oqtay Əsədov açdı.
Gündəliyin  təsdiqindən sonra müzakirələr başlanıldı. Əvvəlcə Əmək və sosial siyasət komitəsinin sədri Hadi Rəcəbli Əmək Məcəlləsində dəyişikliklər edilməsi haqqında qanun layihəsi barədə məlumatı  diqqətə  çatdırdı. O, bildirdi ki, yeni layihəyə görə işçilərin sayı azaldıqda və ya ştatları ixtisar olunduqda işəgötürən əmək müqaviləsinin ləğvi barədə xəbərdarlıq edərkən onların əmək stajını nəzərə alacaq. İşçinin bir ilədək əmək staji olduqda ona ixtisar və ştatının ləğv olunacağı barədə xəbərdarlıq müqavilə ləğv edilməzdən azı iki təqvim həftəsi əvvəl, stajı bir ildən beş ilədək olduqda azı dörd təqvim həftəsi əvvəl, stajı bir ildən on ilədək olduqda azı 6 təqvim həftəsi əvvəl, stajı on ildən çox olduqda azı doqquz təqvim həftəsi əvvəl edilməlidir. İşdən çıxarma müavinətləri ödənilərkən işçinin stajı nəzərə alınacaq. İşçinin bir ilədək əmək stajı olduqda ona orta aylıq əmək haqqı miqdarında, bir ildən beş ilədək stajı olduqda orta aylıq əmək haqqının azı 1,4 misli miqdarında, beş ildən on ilədək stajı olduqda 1,7 misli miqdarında, on ildən çox stajı olduqda azı iki misli miqdarında müavinət ödəniləcək. Qanun layihəsi səsə qoyularaq qəbul edildi.
Sonra İqtisadi siyasət, sənaye və sahibkarlıq komitəsinin sədri Ziyad Səmədzadə “Azərbaycan Respublikasının 2016-cı il dövlət büdcəsinin icrası haqqında”  qanun layihəsi barədə məlumatı  təqdim etdi. O, qeyd etdi ki, 2016-cı il Azərbaycan tarixində islahatlar ili kimi yadda qalıb. Dünya ölkələri arasında toqquşmaların, ziddiyyətlərin artmasına baxmayaraq, ölkəmiz daxili stabillik nümayiş etdirib. Bunun nəticəsidir ki, Azərbaycan iqtisadiyyatı öz inkişafını davam etdirir. Vurğulandı ki, sənəd  və hesabat “Büdcə sistemi haqqında” qanuna uyğun olaraq hazırlanıb. Hesabat 2016-cı il dövlət büdcəsində nəzərdə tutulan xərclərin icra vəziyyəti ilə bağlı göstəricilərlə yanaşı, dövlət borcları və ona xidmət, Azərbaycan Prezidentinin ehtiyat fondunun, dövlət büdcəsinin ehtiyat fondunun vəsaitindən istifadə haqqında və digər zəruri məlumatları özündə əks etdirir. Ziyad  Səmədzadə qeyd etdi ki, qlobal mühitdəki proseslərə cavab olaraq Azərbaycan Prezidenti İlham Əliyevin Azərbaycan iqtisadiyyatının inkişaf perspektivləri üzrə təsdiq etdiyi Strateji Yol Xəritəsinin icrası istiqamətində atılan çevik addımlar, həyata keçirilən qabaqlayıcı və tənzimləyici tədbirlər dünya iqtisadiyyatında baş vermiş proseslərin ölkə iqtisadiyyatında yarana biləcək mənfi təsirlərini neytrallaşdırmağa imkan verib. Büdcə gəlirlərinin artıqlaması ilə yerinə yetirilməsi hesabına 1 yanvar 2017-ci il tarixinə 2 307 milyon manat həcmində sərbəst xəzinə qalığı yaranıb. ÜDM-də gəlirlərin xüsusi çəkisi yüksək qalıb və keçən il bu göstərici 29 faiz təşkil edib. Qeyri-neft sektorundan daxilolmaların büdcə gəlirlərində payı 47,3 faizə çatıb ki, bu da 2015-ci illə müqayisədə 5,7 faiz çoxdur.  2016-cı ildə dövlət büdcəsinin xərcləri 18495,0 milyon manat proqnoza qarşı 17751,3 milyon manat və ya 96 faiz icra edilib ki, bu da 2015-ci illə müqayisədə 33,2 milyon manat azdır. 2016-cı ildə dövlət büdcəsinin kəsiri 245604,1 min manat təşkil edib. Təqdim olunmuş hesabat və məlumatlarda dövlət büdcəsi kəsirinin maliyyələşdirilməsi mənbələri üzrə özəlləşdirmədən daxilolmalar 31231,6 min manat, xarici qrantlar 12325,5 min manat, daxili və xarici borclanmadan daxilolmalar isə 186818,5 min manat təşkil edib.
Sonra iclasda Hesablama Palatasının sədri Vüqar Gülməmmədov 2016-cı ilin dövlət büdcəsinin icrası ilə bağlı rəhbərlik etdiyi qurumun rəyini təqdim etdi. O, bildirdi ki, 2016-cı ildə dövlət büdcəsinin gəlirləri 104,1 faiz icra edilib. 2015-ci illə müqayisədə ümumilikdə qlobal makroiqtisadi tərəddüdlər fonunda büdcə gəlirlərində azalmanın olmaması, hətta artım müşahidə edilməsi aparılan islahatların təzahürü kimi qiymətləndirilməlidir.
Vüqar Gülməmmədov  hesabat ilində dövlət büdcəsinin xərcləri ilə bağlı əsas meylləri diqqətə çatdıraraq 2016-cı ildə dövlət büdcəsinin xərclərinin 17751,3 milyon manat təşkil etməklə, 96 faiz icra edildiyini bildirib. O, proqnozlaşdırılmış məbləğlə müqayisədə icra edilməmiş büdcə xərclərinin 743,7 milyon manat təşkil etdiyini, həmin məbləğin 42,7 faizinin əsaslı xərclərin üstünlük təşkil etdiyi “Sənaye, tikinti və faydalı qazıntılar” bölməsinin, 14,2 faizinin isə “Ümumi dövlət xidmətləri” bölməsinin payına düşdüyünü deputatların diqqətinə çatdırdı. Qeyd  olundu ki,  2016-cı il dövlət büdcəsinin icrası ilə bağlı əsas məqam il ərzində dövlət büdcəsinin icrası prosesində plan göstəricilərinin funksional təsnifatında bir sıra dəyişikliklər aparılıb ki, bu dəyişikliklər əsasən Azərbaycan Respublikası Nazirlər Kabinetinin bəzi sərəncamlarının icrası ilə bağlı olub.
Milli Məclisin deputatları Vahid Əhmədov, Əli Məsimli, Zahid  Oruc, Qüdrət  Həsənquliyev, Tahir  Kərimli, Fərəc  Quliyev, Mahir  Abbaszadə, Aydin Mirzəzadə,  Siyavuş  Novruzov qanun layihəsi ilə bağlı fikirlərini bildirdilər,  sənədin qanunvericiliyə uyğun hazırlandığını söylədilər. 
Sonra  iclasda iştirak  edən maliyyə  naziri Samir  Şərifov  çıxış edərək bildirdi ki, hazırda  ölkədə neftdən asılılığın aradan qaldırılması istiqamətində mühüm tədbirlər görülür. Yeni fiskal qaydalar hazırlanmaqdadır. 2018-ci ilin dövlət büdcəsinin hazırlanmasına başlanılıb. O,  qeyd etdi ki, dövlət müəssisələrinin dividendləri ilə bağlı proqnoz göstəriciəri dəyişə bilər. İcra olunmayan dividendlər maliyyə sektorunda fəaliyyət göstərən qurumlar tərəfindən həyata keçirilir. Ötən il bank sektoru üçün ağır il olub. Buna görə də dividendlərin ödənilməsində problemlər var. Səhiyyə sahəsində bəzi tədbirlərin görülməsi ilə bağlı qərar verilib. İcbari tibbi sığorta ilə bağlı olan pilot layihə Mingəçevir və Yevlax rayonlarında uğurla həyata keçirilməkdədir. Sonra nazir sənədlə bağlı millət vəkillərini maraqlandıran bəzi məqamlara  aydınlıq  gətirdi. Qanun layihəsi səsvermə  yolu ilə  təsdiqləndi.
Regional məsələlər komitəsinin sədri Arif Rəhimzadə “Bələdiyyə üzvlərinin etik davranış qaydaları haqqında” qanun layihəsi barədə məlumatı təqdim etdi. Bildirildi ki, qanun layihəsi bələdiyyə üzvləri üçün etik davranış qaydalarını, prinsiplərini və onlara əməl edilməsi ilə bağlı hüquqi mexanizmləri müəyyən edir. Qanunun məqsədi yerli özünüidarə orqanlarının və bələdiyyə üzvlərinin nüfuzunun artırılması, vətəndaşların yerli özünüidarə orqanlarına və bələdiyyə üzvlərinə etimadının yüksəldilməsi, onların fəaliyyətində səmərəliliyin və şəffaflığın artırılması, bu sahədə korrupsiyanın və maraqların toqquşmasının qarşısının alınması, bu orqanların fəaliyyətinin qiymətləndirilməsi zamanı vətəndaşların təsir imkanlarının genişləndirilməsindən ibarətdir. Diqqətə çatdırıldı ki, etik davranış qaydalarına əməl olunmasına bələdiyyə sədri nəzarət edir. Qanuna görə, etik davranış qaydalarını pozmuş bələdiyyə üzvü intizam məsuliyyətinə cəlb edilir. İntizam məsuliyyəti bələdiyyə iclasının qərarı əsasında xəbərdarlıq və töhmət şəklində tətbiq edilir. Sənəd  səsə  qoyularaq  üçüncü  oxunuşda  qəbul  edildi.
Milli Məclis Sədrinin birinci müavini, Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov “Cinayət fəaliyyətindən əldə edilən gəlirlərin leqallaşdırılmasına, axtarışına, həbsinə, müsadirəsinə, və terrorçuluğun maliyyələşdirilməsinə dair” Avropa Şurası Konvensiyasının təsdiq edilməsi haqqında qanun layihəsi barədə məlumat verdi.  Bildirildi ki, 16 may 2005-ci il tarixdə Varşavada imzalanmış bu sənədə Azərbaycan müvafiq qeyd-şərt və bəyanatlarla qoşulur. Sənəd  səsvermə  yolu  təsdiqləndi.
Sonra İqtisadi  siyasət, sənaye  və sahibkarlıq komitəsinin sədri  Ziyad  Səmədzadə “Azərbaycan Respublikası Hökuməti ilə Danimarka Krallığı Hökuməti arasında gəlirlərə görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında” Konvensiyanın təsdiq edilməsi barədə, həmçinin, “Azərbaycan Respublikası Hökuməti və Qətər Dövləti Hökuməti arasında hava daşımalarına dair Sazişə dəyişikliklər edilməsi barədə” Protokolun təsdiq edilməsi haqqında qanun layihələri barədə  məlumatı təqdim etdi. Hər  iki sənəd  ayrı-ayrılıqda  səsə  qoyularaq  təsdiqləndi.
Hüquq siyasəti və dövlət quruculuğu komitəsinin sədri Əli Hüseynlinin “Müdafiə tədbirlərinin həyata keçirilməsi ilə bağlı xərclərin ödənilməsi məsələləri üzrə Cinayət mühakimə icraatı iştirakçılarının müdafiəsi haqqında 28 noyabr 2006-cı il tarixli Sazişin həyata keçirilməsinə dair” Protokolun təsdiq edilməsi haqqında qanun layihəsi ilə bağlı məlumatı  dinlənildikdən  sonra  sənəd  təsdiq  edildi.
Sonra  iclasda Elm və təhsil komitəsinin üzvü Sona Əliyeva  “Sağlamlıq imkanları məhdud şəxslərin təhsili (xüsusi təhsil) haqqında” qanunda dəyişiklik edilməsi barədə  sənədi şərh  etdi. Sənəddəki uyğunlaşdırıcı  texniki  dəyişiklik təsdiq  edildi.
Gündəlikdəki  növbəti 11 məsələ barədə məlumat verən  Əli Hüseynli  bu  sənədlərə  edilən  dəyişikliklərin ötən il  “Dövlət qulluğu  haqqında” qanunun   28-ci  maddəsinə (“Dövlət  qulluğuna  qəbul”  bölməsi)  edilmiş əlavə ilə bağlı  olduğunu qeyd  etdi. Bundan  sonra “Diplomatik xidmət haqqında”,  “Dövlət qulluğu haqqında”, “Ədliyyə orqanlarında qulluq keçmə haqqında”, “Dövlət qulluqçularının etik davranış qaydaları haqqında”, “Ölçmələrin vəhdəti  haqqında” qanun layihələrində, “Azərbaycan Respublikasının daxili işlər orqanlarında xidmət keçmə haqqında”, “Fövqəladə  hallar  orqanlarında  xidmətkeçmə  haqqında”, “Gömrük orqanlarında xidmət haqqında”, “Miqrasiya orqanlarında  xidmətkeçmə  haqqında”, “Vergi  orqanlarında  xidmət  haqqında” Əsasnamələrdə edilən dəyişikliklərlə bağlı  sənədlər  ayrı-ayrılıqda  səsə  qoyularaq  təsdiqləndi.
Gündəlikdəki  “Haqsız rəqabət  haqqında”, “Müəllif hüququ və əlaqəli hüquqlar haqqında” qanunlara  dəyişiklik edilməsi barədə  sənədlərin mahiyyətcə “Reklam haqqında” qanuna uyğunlaşdırma  məqsədi  daşıdığı bildirildi. Hər  iki sənəd  səsə  qoyularaq  qəbul edildi.
Səhiyyə komitəsinin sədri Əhliman Əmiraslanov “Əhalinin sağlamlığının qorunması haqqında” qanunda dəyişikliklər edilməsi barədə  sənədlə  əlaqədar  məlumat verdi. Bildirildi ki, sənədin 11-ci   və 50-ci maddələrinə “hamiləliyin süni yolla pozulması və  süni mayalanma  üzrə tibbi xidmətin reklamının qadağan olunması” ilə bağlı  müvafiq  dəyişikliklər edilib. Sənəd  səsə  qoyularaq  təsdiqləndi.
Ailə, qadın və uşaq məsələləri komitəsinin sədri Aqiyə Naxçıvanlı “Uşaq hüquqları haqqında” qanuna edilən dəyişikliklərin də “Reklam haqqında” qanuna  uyğunlaşdırma məqsədi  ilə  edildiyini bildirdi. Bu  sənəd  də təsdiq  edildi.
Aqrar siyasət komitəsinin sədr müavini Eldar Quliyev  “Üzümçülük və şərabçılıq haqqında” qanunda edilən dəyişikliklə bağlı məlumat verdi.  Qeyd edildi ki, “Reklam haqqında” qanuna uyğunlaşdırmaq məqsədi ilə qanuna yeni maddənin əlavə edilməsi nəzərdə tutulur. Tündlüyü 5 faizdən yuxarı olan şərabçılıq məhsullarının reklamı telekommunikasiya qurğularında, dövri mətbu nəşrin üz və arxa qabığında, internet informasiya ehtiyatlarının ön səhifəsində, yetkinlik yaşına çatmayanlar üçün nəzərdə tutulmuş mətbu nəşrlərdə, audio və video materiallarda, nəqliyyat vasitələrinin üzərində, habelə onların fəaliyyətini təmin edən binaların, qurğuların üzərində və daxilində yerləşdirilə bilməz. Şərabçılıq məhsullarının nümunələrinin paylanılması və dequstasiyası ilə müşayiət olunan reklam aksiyalarının keçirilməsinə yalnız onların pərakəndə satış yerlərində, ixtisaslaşmış sərgilərin dequstasiya zallarında icazə verilir. Sənəd  səsvermə  yolu ilə  təsdiqləndi.
Sonra  Regional məsələlər  komitəsinin sədri Arif  Rəhimzadə “Yerli (bələdiyyə) vergilər və ödənişlər haqqında” Qanuna dəyişiklik barədə məlumat verdi. O, diqqətə çatdırdı ki, təklif olunan dəyişikliyin əsas mahiyyəti ondan ibarətdir ki, 9.1.1-ci maddədə “küçə” sözü “açıq məkanda” ifadəsi ilə əvəz edilir. Qeyd edildi ki, dəyişiklik “Reklam haqqında” qanuna uyğunlaşdırmaq məqsədi ilə təklif edilir. Sənəd  səsə  qoyularaq  qəbul  edildi.
Mədəniyyət komitəsinin sədri Rafael Hüseynov “Telekommunikasiya haqqında” qanuna dəyişiklik edilməsi barədə  məlumatında dedi ki, sənədə “Reklam haqqında” qanuna  uyğunlaşdırma  məqsədi ilə “telekommunikasiya  vasitələri  və qurğuları ilə yayımlanan reklam”  başlıqlı yeni 50-1  maddəsi əlavə  edilir.  Texniki  dəyişiklik  səsə  qoyularaq  təsdiqləndi.
Aqrar siyasət komitəsinin sədr müavini Eldar Quliyev  Torpaq Məcəlləsində dəyişikliklər edilməsi haqqında qanun layihəsini təqdim etdi. Sənədin növbəti iclasda  müzakirə  edilməsi məqsəduyğun sayıldı.
Sonra İqtisadi siyasət, sənaye və sahibkarlıq komitəsinin sədri Ziyad Səmədzadə Vergi Məcəlləsinə dəyişiklik edilməsi haqqında  sənədi  şərh etdi. Bildirildi ki,  qanun layihəsi “Vergi  ödəyicilərinin  2017-ci ilin 1 yanvar tarixinə  mövcud  olan vergi  borclarının  tənzimlənməsi  haqqında” qanunun tətbiqi ilə bağlı hazırlanıb.  Gündəlikdəki “İcra haqqında” qanuna dəyişiklik edilməsi barədə sənədin 20-ci maddəsinə düzəliş edilməsi  də  məhz  bununla  bağlı idi. Millət  vəkilləri hər iki sənədə edilən  dəyişiklikləri  razılıqla  qarşıladılar.
Sonra Ziyad  Səmədzadə  gündəlikdəki növbəti -  “Sosial təminatı və müdafiəni həyata keçirən müvafiq icra hakimiyyəti orqanının 2017-ci il büdcəsi haqqında” 2016-cı il 16 dekabr tarixli 449-VQ nömrəli  qanunun tətbiqi ilə əlaqədar bəzi qanunlarda dəyişikliklər edilməsi ilə  bağlı məsələ ilə əlaqədar fikirlərini bildirdi. Qeyd  olundu ki,  qanun layihəsinə  edilən  dəyişiklik  4  sənədi - “İcarə haqqında”, “Sahibkarlıq  fəaliyyəti  haqqında, “Veteranlar  haqqında,  “Azərbaycan  vətəndaşlarının  pul  gəlirlərinin və əmanətlərinin indeksləşdirilməsi  haqqında”  qanunları  əhatə  edir. Sənədlərdəki “Dövlət  Sosial Müdafiə Fondu”  sözləri, “müvafiq  icra  hakimiyyəti orqanına” sözləri ilə əvəzlənir. Qanun layihəsi  səsvermə  yolu ilə  təsdiqləndi.
Sonra Əli Hüseynli Cəzaların İcrası Məcəlləsində dəyişiklik edilməsi haqqında qanun layihəsini  şərh etdi. Bildirildi ki, sənədə  edilən  dəyişikliklər  əmək  fəaliyyəti ilə  məşğul olan məhkumların qazancından  məcburi  dövlət  sosial siğorta  haqqının tutulması  prinsipini  özündə  ehtiva  edir.  Sənəd  səsə   qoyularaq  təsdiqləndi. 
Əli  Hüseynli  “Azərbaycan Respublikasının vətəndaşlığı haqqında” sənədi  şərh  edərkən bildirdi ki, buradakı  dəyişikliklər  Azərbaycan  Respublikası  vətəndaşlığına  qəbul  və  vətəndaşlıqdan  çıxma  ilə bağlı rüsumların bundan  sonra “Dövlət  rüsumu  haqqında”  qanunun tələblərinə uyğun olaraq  tənzimlənəcəyini  ehtiva  edir.  Sənəd  təsdiq  edildi.
Sonra Əli Hüseynli “Dövlət qulluğu haqqında” qanunda dəyişiklik edilməsi barədə  sənədə edilən  dəyişiklikləri  diqqətə  çatdırdı. Bildirildi ki, sənədin 2-ci maddəsinə “səfərbərlik və hərbi  xidmətə çağırış üzrə  dövlət  xidməti”  sözləri əlavə  edilir ki,  bu da dövlət qulluğu növü siyahısına Səfərbərlik və Hərbi Xidmətə Çağırış üzrə Dövlət Xidmətinin adının salınmasını nəzərdə tutur. Sənəd  səsə qoyularaq  təsdiqləndi.
Daha sonra Əli Hüseynli Cinayət Məcəlləsində edilən  dəyişiklikləri  diqqətə  çatdırdı.  Bildirildi ki, yeni dəyişikliklərdə  İnzibati  Xətalar Məcəlləsinin  təsdiq  edilmiş  müvafiq  bəndlərinin icrasına  uyğunlaşdırmaq məqsədi ilə Cinayət  Məcəlləsinin  17  fəslində  cərimələrin artırılması  nəzərdə  tutulur. Müzakirələrdən sonra sənəd  səsə  qoyularaq  təsdiq  edildi.
 İclasda Hüquq siyasəti və dövlət quruculuğu komitəsinin üzvü Rafael Cəbrayılov “Publik hüquqi şəxslər haqqında” qanuna  edilən  dəyişiklikləri  diqqətə  çatdırdı. Bildirildi ki, dövlət başçısının  qanunvericilik təşəbbüsü  qaydasında qanunun 3.4 və 6.4 maddələrinə əlavələr  edilir. Belə ki, publik hüquqi şəxslər qanunun tələblərinə uyğun şəkildə hüquqi xidmət göstərirlərsə “Dövlət  rüsumu  haqqında” qanunda  nəzərdə  tutulmuş  qaydada  və məbləğdə dövlət rüsumu tuta  bilərlər.  Onların fəaliyyəti qanunun tələbləri ilə tam uyğunlaşırsa, “Publik hüquqi şəxslərin nizamnaməsi”nə  əsasən həmin əməkdaşlar dövlət  qulluqçusu statusuna bərabər  tutulurlar.   Sənəd  səsə  qoyularaq  təsdiq  edildi.
İclasda  “Bələdiyyələrin maliyyəsinin əsasları haqqında” qanun layihəsinə  edilən  dəyişikliklər də  səsə  qoyularaq təsdiqləndi. 
Sonda Səhiyyə komitəsinin sədri Əhliman Əmiraslanov  “Əhalinin sağlamlığının qorunması haqqında” qanunun 53-cü  maddəsinə  edilən  “həqiqi  hərbi  xidmətə  çağırılma və səfərbərliklə bağlı” dəyişiklikləri diqqətə çatdırdı. Sənəd  təsdiq  edildi.
Parlamentin  Sədri  Oqtay  Əsədov   84  nəfər millət  vəkilinin  müraciəti əsasında parlamentin növbədənkənar sessiyasının  çağırılacağını  söylədi  və Milli  Məclisin yas  sessiyasını  bağlı  elan  etdi.
Azərbaycan  Respublikasının  Dövlət  himni  səsləndirildi  və   Milli  Məclisin 2017-ci il yaz  sessiyası  öz  işini  başa  çatdırdı.

Milli Məclisin
Mətbuat  xidməti