Oktyabrın 20-də  Milli Məclisin növbəti plenar iclası  keçirildi. İclası  Milli Məclisin Sədri Oqtay Əsədov aparırdı.
Gündəliyin  təsdiqindən sonra Milli Məclisin Beynəlxalq münasibətlər və parlamentlərarası əlaqələr  komitəsinin sədri,  AŞPA-dakı nümayəndə heyətinin rəhbəri Səməd Seyidov qurumun payız  sessiyasının  yekunları  barədə  məlumat verdi. Qeyd  olundu ki, qurumun bu sessiyası əvvəlkilərdən fərqli olaraq Azərbaycan  nümayəndə  heyəti  üçün o qədər də asan keçməyib. Bildirildi ki, qurumda Azərbaycandan başqa monitorinq altında olan  heç bir ölkəyə  belə yanaşma  nümayiş olunmayıb. Ölkəmizlə bağlı məlum qərəzli qətnamələrin qəbul olunması prosesində Azərbaycana mənfi münasibət bəsləyən deputatlar əsassız iddialar səsləndiriblər. Çıxış edən şəxslərin qəbul edilmiş sənədlərə təklif  etdiyi əlavələr ümumiyyətlə, həqiqəti əks etdirməyib. Vurğulandı ki, Avropa Şurasının baş katibi ən yüksək dəyərləri – insan haqlarını və demokratiyanı alətə çevirərək Azərbaycana təzyiq göstərir. Səməd  Seyidov dedi ki, bir milyon qaçqın və məcburi köçkünün pozulmuş hüquqlarına etinasızlıq ölkəmizə qarşı ən böyük ədalətsizlikdir  və biz AŞPA ilə münasibətlərimizi çox ciddi təhlil etməliyik, qəti mövqeyimizi ortaya qoymalıyıq.
Millət  vəkilləri AŞPA-nın payız  sessiyasında ölkəmizin hədəf  seçilməsindən  narazılıqlarını  ifadə  etdilər, Azərbaycana  qarşı bu  münasibətin haqsız  olduğunu  bildirdilər. 
Sonra gündəlikdəki  məsələlərin  müzakirəsinə  başlanıldı.
Əvvəlcə Hüquq siyasəti və dövlət quruculuğu komitəsinin sədri Əli Hüseynli “Naxçıvan Muxtar Respublikasının Konstitusiyasında dəyişikliklərin təsdiq edilməsi haqqında” Konstitusiya qanununun layihəsi barədə məlumat  verdi.  Qeyd  olundu ki, sənəd Naxçıvan Muxtar Respublikası Ali Məclisinin Sədri Vasif Talıbov tərəfindən qanunvericilik təşəbbüsü qaydasında təqdim edilib. Muxtar respublika Konstitusiyasının 6 maddəsi üzrə edilən dəyişikliklər ötən ilin sentyabrında referendum yolu ilə Azərbaycan Konstitusiyasına olunan dəyişikliklərdən irəli gəlir. Belə ki, 8-ci maddənin 3-cü hissəsinə əsasən müəyyən kateqoriyadan olan şəxslərin passiv seçki hüququ qanunla məhdudlaşdırıla bilər. Muxtar Respublikanın Ali Məclisinə deputatlığa namizədlərə tələblərlə bağlı “yaşı 25-dən aşağı olmayan” sözləri “seçkilərdə iştirak etmək hüququna malik olan” sözləri ilə əvəzlənir. Digər bir maddədə Ali Məclisə deputatlıqdan məhrumetmə ilə bağlı 5 hal nəzərdə tutulurdusa, buna əsas yaradan daha iki hal maddəyə əlavə olunur. “Naxçıvan Muxtar Respublikası Ali Məclisinin sədrinə aid tələblər” maddəsindən “yaşı otuzdan aşağı olmayan” sözləri çıxarılır. Naxçıvan Nazirlər Kabinetinin üzvlüyünə namizədlərə aid tələblər maddəsi də yeni redaksiyada verilir və orada da yaş tələbi aradan qaldırılır. Yeni redaksiyada qeyd olunur ki, Naxçıvan Muxtar Respublikasının Baş naziri, Baş nazirinin müavini, nazir, digər mərkəzi icra hakimiyyəti orqanı rəhbəri vəzifəsinə seçkilərdə iştirak etmək hüququna malik, ali təhsilli, başqa dövlətlər qarşısında öhdəliyi olmayan Azərbaycan vətəndaşı təyin edilir. Sənəd  səsə  qoyularaq  qəbul edildi.
 “Azərbaycan Respublikasının Standartlaşdırma, Metrologiya və Patent üzrə Dövlət Komitəsi ilə Çin Xalq Respublikasının  Keyfiyyətə Nəzarət, Yoxlama və Karantin üzrə Baş Administrasiyası (AQSİQ) arasında texniki tənzimləmə, metrologiya, standartlaşdırma və uyğunluğun qiymətləndirilməsi sahələrində əməkdaşlığa dair” Anlaşma Memorandumunun təsdiq edilməsi haqqında” qanun layihəsi barədə İqtisadi siyasət, sənaye və sahibkarlıq komitəsinin sədri Ziyad Səmədzadə məlumat  verdi. 2017-ci ilin mayın 15-də Pekində  imzalanmış  sənədin iqtisadi əhəmiyyəti  vurğulandı. Bildirildi ki, Azərbaycanın mühüm ticarət  müttəfiqi olan Çinlə ölkəmiz  arasında imzalanan bu  sənəd   insan  sağlamlığının qorunmasına, məhsulların  və xidmətlərin keyfiyyətinin yüksəldilməsinə böyük töhfə olacaq. Sənəd  səsə  qoyularaq  qəbul  edildi.
Gündəlikdəki  növbəti 3 məsələ -“Banklar haqqında”,  “Poçt haqqında” və “Mərkəzi Bank haqqında” qanunlara təklif olunan dəyişiklikləri Ziyad Səmədzadə  geniş şərh etdi. Bildirildi ki,  hər  3  qanuna  təklif  olunan  dəyişikliklər  “Valyuta  tənzimi  haqqında”  qanuna  dəyişiklik  edilməsi  barədə  2017-ci il  25  aprel  tarixli qanunun  tətbiqi ilə əlaqədar uyğunlaşdırma   xarakteri  daşıyır. Sənədin  qəbulu ilə əlaqədar son illər ölkəmizdə fəaliyyət göstərən bankların qarşılaşdıqları problemlərin aradan qaldırılması, bankların sağlamlaşdırılması üçün qanunvericiliyin dəyişdirilməsi zərurəti meydana gəlib. Sənədlər  ayrı-ayrılıqda  səsə  qoyularaq  qəbul  edildi.
Əli  Hüseynli  “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında”  qanuna təklif  edilən  dəyişikliyin də “Valyuta  tənzimi  haqqında”  qanuna  dəyişiklik  edilməsi  barədə  qanunun  tətbiqi ilə əlaqədar olduğunu diqqətə  çatdırdı. Bu  sənəd  də  razılıqla  qarşılandı.
Sonra  Ziyad Səmədzadə “Poçt haqqında” qanunda dəyişikliklər edilməsi barədə sənədi  təqdim etdi. Qeyd  olundu ki,  qanuna  təklif  edilən  dəyişiklik xüsusi poçt rabitəsi xidmətində  “Dövlət sirri haqqında” Qanunla qorunan məlumatların, qiymətli metalların, qiymətli daşların, zərgərlik məmulatlarının, qiymətli kağızların və xüsusi yüklərin göndərildiyi poçt göndərişlərinin qəbulunu, çeşidlənməsini, saxlanmasını, daşınmasını və ünvan sahiblərinə çatdırılmasını həyata keçirir. Sənəd  səsə  qoyularaq  qəbul  edildi.
Ziyad Səmədzadə Azərbaycan Respublikasının Ticarət Gəmiçiliyi Məcəlləsində dəyişikliklər edilməsi haqqında qanun layihəsini şərh  edərkən bildirdi ki, sənəd “Dəniz  tələbləri ilə  bağlı məsuliyyətin  məhdudlaşdırılması haqqında”  1976-cı il tarixli Beynəlxalq  Konvensiyanın  tələblərinə uyğunlaşdırmaq  məqsədi ilə hazırlanmışdır.  Dənizdə  baş vermiş  qəza  hadisələrinin Beynəlxalq  Dəniz  Təşkilatı  tərəfindən  araşdırılması  nəticəsində müəyyən  olunub ki, qəzanın  nəticələrinin  aradan qaldırılması  üçün hesablanmış məbləğ Beynəlxalq  Konvensiyanın  müəyyən etdiyi  məbləğdən  dəfələrlə  artıqdır.  Azərbaycanın  Konvensiyaya  qoşulması  müəyyən edilmiş  tələblərin  təmin  edilməsi  məqsədi ilə  Ticarət  Gəmiçiliyi  Məcəlləsində  də müvafiq  dəyişiklikləri etmək  zərurəti  yaratmışdır. Sənəd  səsə  qoyularaq  qəbul  edildi.
Sonra Əli  Hüseynli  “Mülki aviasiya sahəsində xidmətlərə görə” medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” qanunda dəyişiklik edilməsi barədə sənədi təqdim etdi.  Bildirildi ki,  bu  medalla  vəzifələrini  nümunəvi icra  edən, istehsal  fəaliyyətində  yüksək  nəticələr  göstərən mülki  aviasiya  işçiləri, Azərbaycanda  bu sahənin inkişafı və  təkmilləşdirilməsində  xüsusi  rolu olan insanlar  təltif olunacaqlar. Sənəd  səsvermə  yolu ilə  təsdiqləndi.
Əli Hüseynli Miqrasiya Məcəlləsində dəyişikliklər edilməsi haqqında sənədlə  əlaqədar  dəyişiklikləri  diqqətə  çatdırdı.  Qeyd  olundu ki, Məcəllənin 53.1-ci maddəsinə edilən dəyişiklik  əcnəbilər  və  vətəndaşlığı  olmayan  şəxslərə Azərbaycan  ərazisində  daimi  yaşamaq  icazəsinin alınması  ilə bağlı  tələb  olunan  sənədlərin  siyahısının  təqdim edilməsindən ibarətdir. Təklif olunan  dəyişiklik  bu sahədə mövcud bürokratik əngəllərin qarşısını almaq baxımından mütərəqqi bir addımdır.  Sənəd  təsdiq  edildi.
 Sonra Əli  Hüseynli  İnzibati Xətalar Məcəlləsində dəyişikliklər edilməsi haqqında qanunun layihəsi barədə məlumat verdi. Qeyd  olundu ki, dəyişikliklər “Reklam haqqında”  qanunun müvafiq maddələrinin tələblərinin pozulmasına görə inzibati məsuliyyəti yaratmaq məqsədi ilə təklif edilir. Nəzərdə tutulan dəyişikliklərin mahiyyəti açıqlandıqdan sonra  sənəd  səsə  qoyularaq  təsdiqləndi.
Əli Hüseynli “Məhkəmə-Hüquq Şurası haqqında” qanuna təklif  olunan dəyişiklikləri də diqqətə  çatdırdı.  Bildirildi ki, layihə “Dövlət  qulluğu  haqqında”  qanunun tələblərinə uyğunlaşdırma  məqsədi  ilə  hazırlanıb. Sənəd  müzakirə  edilərək təsdiqləndi. 
 Əli Hüseynli “Məhkəmələr və hakimlər haqqında” qanuna dəyişikliklər edilməsi barədə sənədin  təqdimatında  bildirdi ki, layihədə   bir sıra dəyişikliklər edilir. Bu dəyişikliklər ölkə Prezidentinin “Azərbaycan Respublikasında biznes mühitinin əlverişliyinin artırılması və beynəlxalq reytinqlərdə ölkəmizin mövqeyinin daha da yaxşılaşdırılması ilə bağlı əlavə tədbirlər haqqında” 2016-cı il 13 iyul tarixli sərəncamına əsasən hazırlanmışdır. Sənəd  səsvermə  yolu ilə  təsdiqləndi.
Sonra Əli Hüseynli bildirdi ki, İnzibati Xətalar Məcəlləsindəki  dəyişikliklər “Yol hərəkəti haqqında”  qanuna  dəyişikliklər  edilməsi  barədə  2016-cı il oktyabrın 14-də  qəbul olunmuş  qanunun  tətbiqi ilə əlaqədar  təklif  edilir.   Həmin qanuna  əsasən  yol  hərəkəti təhlükəsizliyinin təmin olunması  məqsədi ilə iri qabaritli  və  ağır çəkili  nəqliyyat  vasitələri icazədən  artıq yüklə hərəkətdə olduğu zaman müəyyən hallarda  ümumi  istifadədə  olan  avtomobil  yollarında iştirakdan kənarlaşdırıla  bilər. Sənəd  təsdiqləndi.
Mədəniyyət komitəsinin sədri Rafael Hüseynov “Mədəniyyət haqqında” qanuna dəyişiklikləri şərh  edərkən bildirdi ki, 1960-cı ildən sonra istehsal olunmuş mədəniyyət nümunələrinin ölkəmizdən ixracını sadələşdirmək məqsədilə sənədə bir neçə yeni maddə əlavə olunub, bəzi maddələrdə isə dəqiqləşdirmələr aparılıb. Bu  dəyişiklikdən  sonra mədəniyyət  məhsullarının ölkədən ixracı  zamanı  süni  maneələr  aradan  qaldırılacaq. Sənəd  səsə  qoyularaq  qəbul  edildi.
Sonda Əli Hüseynli Cinayət Məcəlləsində və İnzibati Xətalar Məcəlləsində əlavə  və   dəyişikliklər edilməsi barədə  sənədləri təqdim etdi. O, bildirdi ki, bu ilin fevral  ayında  ölkə Prezidenti  cənab İlham Əliyev  tərəfindən cəza  siyasətinin humanistləşdirilməsi ilə bağlı müvafiq sərəncam imzalanmışdır. Bu sərəncamın icrası  istiqamətlərindən biri də  bugünkü sənədlərdir. Əli Hüseynli  qeyd  etdi ki, Cinayət  Məcəlləsinə 7 istiqamət  üzrə  dəyişikliklər təklif  olunub 300-ə yaxın dəyişiklik nəzərdə tutulub. Cinayət tərkiblərinin Məcəllədən çıxarılması yolu ilə 15-ə yaxın cinayət əməli dekriminallaşdırılıb.  Bunlar əsasən mülkiyyət əleyhinə cinayətlər və ehtiyatsızlıqla törədilən cinayətlərdir.  Məcəlləyə “azadlığın məhdudlaşdırılması” cəzası da əlavə edilir. Azadlığın məhdudlaşdırılması və digər bu kimi cəzalar bütövlükdə 152 maddənin sanksiyasına daxil edilib. Dəyişiklikdə 18 cinayət az ağır cinayətlər kateqoriyasından “böyük cinayət törətməyən” kateqoriyasına, 4 cinayət əməli ağır kateqoriyadan az ağır kateqoriyaya keçirilib.
Sənədlərlə əlaqədar  millət  vəkilləri  Fazil Mustafa, Qüdrət  Həsənquliyev, Əli Məsimli, Elmira  Axundova, Musa Quliyev,  Zahid  Oruc, Tahir  Kərimli,  Vüsal Hüseynov,  Fərəc Quliyev, Fuad  Muradov, Çingiz  Qənizadə, Ziyafət  Əsgərov fikirlərini bildirdilər. Sənədlər  ayrı-ayrılıqda  səsə  qoyularaq  təsdiqləndi.
Bununla  da  Milli Məclis öz işini başa çatdırdı.

Milli Məclisin
Mətbuat  xidməti