Noyabrın 28-də  Milli Məclisin  Aqrar siyasət  komitəsinin növbəti  iclası  keçirildi.  İclası  açan komitə sədri  Eldar İbrahimov  gündəlikdəki  məsələlərlə  bağlı məlumat verdi.
Əvvəlcə Torpaq  Məcəlləsində  dəyişikliklər edilməsi haqqında sənədə  baxıldı. Qeyd  olundu ki, dəyişikliklərə əsasən torpaq qanunvericiliyinin pozulmasına görə toplanan cərimələrin bir hissəsi müvafiq icra hakimiyyəti orqanlarının işçilərinin sosial müdafiəsini gücləndirmək məqsədi ilə onların hesablarına köçürüləcək.
Milli Məclis Aparatının İqtisadi  qanunvericilik şöbəsinin müdir  müavini - Aqrar qanunvericilik sektorunun  müdiri Vilayət Əlizadə  gündəlikdəki növbəti 4 məsələ - “Meliorasiya  və  irriqasiya  haqqında”,   “Toxumçuluq  haqqında”, “Heyvanlar  aləmi  haqqında”,  “Taxıl haqqında” qanunlarda dəyişikliklər edilməsi barədə sənədləri  birlikdə təqdim etdi. Qeyd  olundu ki, bu  qanun layihələrində olan  dəyişikliklər  İnzibati  Xətalar Məcəlləsinə  uyğunlaşdırmaq  məqsədi ilə  edilib. Belə ki, qanun layihələrində müəyyən edilmiş  sahələrlə  bağlı  nöqsanlar  üzrə  inzibati  məsuliyyətlər  müəyyən  edilərək sadalanır. 
Sonra “Torpaqların münbitliyi haqqında”  qanunda və İnzibati Xətalar  Məcəlləsində  dəyişikliklər  edilməsi ilə bağlı  məsələlərə  baxıldı.  Bildirildi ki,  bu  sənədlərdəki dəyişikliklərin əsas məqsədi  əkin yerlərinin, xüsusilə də taxıl biçinindən sonra kövşənliklərin yandırılması  hallarının, bununla  bağlı baş verən fəsadların qarşısının alınması  üçün müvafiq  məsuliyyət  növünün  müəyyən edilməsindən ibarətdir.
Millət  vəkilləri Tahir  Süleymanov, Aydın Hüseynov, Cavanşir Paşazadə,  Novruzəli Aslanov, Hüseynbala Mirələmov,  Mahir  Aslanov,  İqbal Məmmədov və Elçin Quliyev  müzakirə  edilən  sənədlərlə bağlı  fikirlərini  bildirdilər.
Ətraflı  fikir  mübadiləsindən sonra sənədlərin  Milli Məclisin plenar  iclasının  gündəliyinə  çıxarılması  qərara  alındı.

Milli Məclisin
Mətbuat xidməti