Dekabrın 14-də Milli Məclisin Əmək və sosial siyasət komitəsinin  növbəti  iclası  keçirildi. 
İclası açan komitə sədri Hadi Rəcəbli “Turizm  haqqında” qanunda dəyişikliklər edilməsi barədə  sənədi  təqdim etdi. 
Qanun layihəsindəki dəyişiklikləri  diqqətə  çatdıran komitə  sədri bildirdi ki, sənəddə aparılan dəyişiklik  Miqrasiya  Məcəlləsinə  uyğunlaşdırma xarakteri daşıyır. Qanunun 7.1-ci (Turizm vizası) maddəsinə edilmiş əlavəyə əsasən, elektron vizanın verilməsi ilə bağlı müraciətə ən geci 3 iş günü müddətində baxılır, imtina üçün əsas olmadıqda viza rəsmiləşdirilərək müraciət etmiş şəxsin elektron poçt ünvanına göndərilir. Viza verilməsindən imtina edildikdə, müraciət etmiş şəxsin elektron poçt ünvanına bu barədə məlumat göndərilir. Bəndə edilən əlavəyə əsasən, elektron vizanın sürətləndirilmiş qaydada alınması üçün müraciət edildikdə ən geci 3 saat müddətində baxılacaq.
Komitə  üzvləri yeni əlavənin çox əhəmiyyətli və vacib olduğunu vurğuladılar, dəyişikliyin turizmin  inkişafına, bu sahənin  daha  da  təkmilləşməsinə xidmət  edəcəyini qeyd etdilər. Bildirildi ki,  bu yenilik əcnəbilərin  və vətəndaşlığı olmayan şəxslərin  ölkəyə  gəliş-gedişini də asanlaşdırmış olacaq. 
Ətraflı  müzakirələrdən sonra qanun layihəsi Milli Məclisin plenar  iclasına tövsiyə  edildi.

Milli Məclisin
Mətbuat xidməti