Fevralın 1-də  Milli Məclisin  2018-ci ildə ilk plenar iclası keçirildi.  Milli Məclisin Sədri Oqtay Əsədov yaz sessiyasını açıq elan etdikdən sonra dövlət himni səsləndirildi.
Gündəliyin təsdiqindən  sonra Oqtay Əsədov diqqətə çatdırdı ki, parlament yaz sessiyasında da dövlət başçısının həyata keçirdiyi quruculuq işlərinin hüquqi bazasını təmin etmək  üçün əzmlə  çalışacaq.  Sədr Azərbaycan Prezidenti İlham Əliyevin Azərbaycan Xalq Cümhuriyyətinin 100 illik yubileyi haqqında Sərəncam imzaladığını,  iyun ayında Milli Məclisdə bu münasibətlə  geniş tədbirlər planlaşdırıldığını vurğuladı. Qeyd olundu ki,  yaz  sessiyasında  parlamentdə Konstitusiyaya uyğun olaraq hökumətin və İnsan Hüquqları üzrə Müvəkkilin hesabatları da dinləniləcək.
Sonra  gündəlikdəki  məsələlərin müzakirəsinə başlanıldı. Əvvəlcə Milli Məclisin Hesablayıcı və İntizam komissiyalarının yenidən təşkil edilməsi haqqında parlamentin qərarları müzakirəyə çıxarıldı. Spiker Oqtay Əsədov bildirdi ki, müzakirəyə təklif olunan sənəddə komissiyaların əvvəlki sədrləri və üzvləri olduğu kimi saxlanılır. Hər iki  qərar  ayrı-ayrılıqda səsə qoyularaq təsdiqləndi.
Sonra Milli Məclisin 2018-ci il yaz sessiyasının qanunvericilik işləri planına baxıldı. Qanunvericilik işlər planına “Azərbaycan Respublikasının Dövlət bayrağı haqqında”, “Azərbaycan Respublikasının Dövlət gerbi haqqında”, “Azərbaycan Respublikasının Dövlət himni haqqında” Konstitusiya qanunları, “Azərbaycanda Dövlət daktiloskopik və genom qeydiyyatı haqqında”, “Daxili qoşunlar haqqında”, “Ələt Azad İqtisadi Zonası haqqında”, “Ətraf mühitə təsirin qiymətləndirilməsi haqqında”, “Texniki təmizləmə haqqında”, “Standartlaşma haqqında”, “Hesablama Palatası haqqında”, “Kabel şəbəkəsi yayımı haqqında”, “Kinematoqrafiya haqqında”, “Kənd təsərrüfatında sığortanın stimullaşdırılması haqqında”, “Əlilliyi olan şəxslərin hüquqları haqqında”, “Turizm haqqında”, “Psixoloji yardım haqqında”, “Uşaqların sağlamlığına və inkişafına ziyan vuran informasiyalardan qorunması haqqında” çox mühüm qanun layihələri daxil edilib. Həmçinin Azərbaycan Prezidentinin, deputatların, Ali Məhkəmənin, Baş Prokurorluğun, Naxçıvan Ali Məclisinin qanunverici təşəbbüs qaydasında təqdim etdiyi qanun layihələri var.
Millət  vəkilləri  Fazil  Mustafa,  Siyavuş  Novruzov,  Zahid  Oruc,  Əli Məsimli,  Elmira Axundova,  Fərəc Quliyev,  Tahir Kərimli,  Qüdrət  Həsənquliyev,  Əflatun Amaşov,  Qənirə Paşayeva,  Rövşən Rzayev  sənədlə əlaqədar fikirlərini bildirdilər, təkliflərini səsləndirdilər.  Qanunvericilik işləri planı səsə qoyularaq təsdiqləndi.
Sonra Beynəlxalq münasibətlər və parlamentlərarası əlaqələr komitəsinin sədri Səməd Seyidov   “Azərbaycan Respublikası Hökuməti ilə Litva Respublikası Hökuməti arasında xidməti pasportlara malik şəxslərin viza tələbindən azad edilməsi haqqında” Sazişin təsdiq edilməsi barədə qanun layihəsini təqdim etdi. Bildirildi ki, Avropa  Birliyinin üzvü olan Litva  ilə xidməti  pasportlar  sahəsində  belə bir  sənədin imzalanması  Azərbaycan üçün əhəmiyyətli məsələdir. Sənəd səsə qoyularaq  yekdilliklə  qəbul edildi.
Əmək və sosial siyasət komitəsinin sədri Hadi Rəcəbli  “Sosial sığorta haqqında” qanunda edilən dəyişiklikləri  diqqətə  çatdırdı.  Bildirildi ki,  sənəd “Nağdsız hesablaşmalar  haqqında”  2017-ci il   13 iyun  tarixli  qanuna  uyğunlaşdırma  məqsədi  daşıyır.  Qanunun  6-cı maddəsinə nəzərdə  tutulan dəyişiklikdə  bildirilir ki,  bu uyğunlaşdırma  əsasında  “sosial sığorta  ödəmələri  sığorta  olunanlara  yalnız  nağdsız  qaydada, sığortaçı tərəfindən əməliyyat-axtarış, kəşfiyyat, əks-kəşfiyyat fəaliyyətinin subyektlərinə veriləcək. Sənəd  səsə  qoyularaq  təsdiqləndi.
Hüquq siyasəti və dövlət quruculuğu komitəsinin sədri Əli Hüseynli  “Cinayət prosesində iştirak edən şəxslərin dövlət müdafiəsi haqqında” qanuna edilən  dəyişikliklərin  də  eynilə, “Nağdsız hesablaşmalar  haqqında” 2017-ci il   13 iyun  tarixli  qanuna  uyğunlaşdırma  məqsədi ilə  edildiyini diqqətə  çatdırdı. Sənəd  təsdiq  edildi.
  Sonra Milli Məclis Sədrinin birinci müavini, Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov “Terrorçuluğa qarşı mübarizə  haqqında” qanunda dəyişiklik edilməsi barədə  sənədi  təqdim etdi. Bildirildi ki, “Nağdsız hesablaşmalar haqqında” qanuna uyğunlaşdırma məqsədi ilə  edilən  dəyişiklik qanunun 14-cü maddəsinə tətbiq  edilir. Maddədə  terrorçuluğa qarşı mübarizədə iştirak edən şəxs terror əleyhinə aparılan əməliyyatlar zamanı həlak olduqda və ya xidmətini davam etdirməyə imkan verməyən dərəcədə xəsarət aldıqda ona və ya onun ailəsinə dövlət büdcəsi hesabına orta aylıq əmək haqqı məbləğinin müvafiq olaraq yüz və ya doxsan misli miqdarında birdəfəlik müavinət ödənilməsi  bildirilir. Təklif olunan dəyişikliyə görə isə həmin müavinət nağdsız qaydada ödəniləcək.  Sənəd  səsvermə  yolu ilə qəbul  edildi. 
“Azərbaycan Respublikasında vərəmlə mübarizə haqqında” qanunda dəyişiklik edilməsi barədə sənədi şərh edən Səhiyyə komitəsinin sədri Əhliman Əmiraslanov burada aparılan dəyişikliyin də “Nağdsız hesablaşmalar haqqında” qanuna uyğunlaşdırma məqsədi ilə  edildiyini dedi.  Layihəyə görə, işləməyən vərəm xəstələrinə müalicə müddətində verilən müavinətin ödənilməsi yalnız nağdsız qaydada həyata keçiriləcək. Sənəd  təsdiqləndi.
Sonra Hüquq siyasəti və dövlət quruculuğu komitəsinin sədri Əli Hüseynli “Azərbaycan Respublikasının vətəndaşlığı haqqında” qanunda dəyişikliklər edilməsi barədə məlumat verdi. Bildirildi ki, qanunun 14-cü (Azərbaycan Respublikasının vətəndaşlığına qəbul) maddəsinə yeni müddəa əlavə  edilir.  Təklif olunan bənddə bildirilir ki, “2006-cı il yanvarın 1-ə qədər Azərbaycana gələrək burada daimi yaşayan, heç bir dövlətin vətəndaşlığına mənsub olmayan və şəxsiyyətini təsdiq edən etibarlı sənədləri olmayan şəxsin heç bir dövlətin vətəndaşlığına mənsub olmaması, habelə Azərbaycan Respublikasında daimi yaşaması faktı məhkəmə tərəfindən müəyyən edilir. Bu müddəa könüllü olaraq mənsub olduğu dövlətin vətəndaşlığından çıxmış şəxslərə şamil edilmir.  Qanuna bu əlavənin təklif edilməsi 2006-cı il yanvarın 1-ə qədər Azərbaycana gələn və burada daimi yaşayan, keçmiş SSRİ pasportlarına malik olan şəxslərə Azərbaycan vətəndaşlığına qəbul olunmaq imkanı yaratmaq məqsədi daşıyır. Sənəd  səsə  qoyularaq   təsdiq  edildi.
Sonra Əli Hüseynli İnzibati Xətalar, Şəhərsalma və Tikinti Məcəllələrinə dəyişikliklər edilməsi haqqında sənədləri  birlikdə  şərh etdi.  Birdirildi ki,  hər  iki  sənəddə  edilən  dəyişikliklər  “Reklam haqqında”  qanuna dəyişikliklər  edilməsi  barədə  2017-ci il 30 iyun tarixli  qanunun  tətbiqi ilə əlaqədar  edilib.  Bu  dəyişikliklərə əsasən  açıq məkanda  ölçülərindən asılı olmayaraq  reklam  daşıyıcılarının tikintisinə,  quraşdırılmasına, onlara konstruktiv dəyişikliklərin edilməsinə  Şəhərsalma  və Tikinti Məcəlləsində nəzərdə  tutulmuş  qaydada  və hallarda  müvafiq  icra  hakimiyyəti orqanı icazə verə bilər.  Hər  iki sənəd  ayrı-ayrılıqda  səsvermə  yolu ilə təsdiqləndi.
Səhiyyə komitəsinin sədri Əhliman Əmiraslanov  “Dərman vasitələri haqqında” qanuna edilən dəyişikliyi  diqqətə  çatdırdı. Bildirildi ki, təklif  olunan dəyişiklik sənədin 13-cü maddəsində aparılıb. 14  yaşı tamam olmamış şəxslərin  həyat və sağlamlığına zərər  vurulmaması məqsədi ilə onlara  dərman  vasitələrinin buraxılmasını qadağan edir. Qanun layihəsinə müsbət  münasibət  bildirildi.
Əli Hüseynli İnzibati Xətalar Məcəlləsində dəyişiklik edilməsi haqqında  qanun layihəsini də təqdim etdi.  Qeyd olundu  ki,  təklif olunan dəyişiklik Məcəllənin “ekoloji  təhlükəsizlik haqqında”  bölməsində  aparılıb. Dəyişiklikdə  ətraf  mühitə və insan  sağlamlığına  mənfi  təsir göstərən  vibrasiya və səs-küy çirklənməsi normalarının pozulmasına  görə müvafiq  icra  hakimiyyəti orqanı  tərəfindən  məsuliyyətin  nəzərdə  tutulması halları əksini tapır. Müzakirələrdən  sonra  sənəd  səsə  qoyularaq  təsdiqləndi.
 “Azərbaycan Respublikasının Şəhərsalma və Tikinti  Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” qanunda dəyişiklik edilməsi barədə sənədlə əlaqədar  məlumat verən Əli Hüseynli  bildirdi ki, layihəyə əsasən Azərbaycanda tikinti layihələrinin şəhərsalma sənədlərinin, o cümlədən müfəssəl planın müəyyənləşdirdiyi tələblərə uyğunluğuna dair tələbin tətbiqi müddəti 1 illiyinə uzadılır. Sənəd  təsdiq  edildi.
İclasda  Elm və təhsil komitəsinin sədri İsa Həbibbəyli  “Peşə təhsili haqqında” qanun layihəsini ilk oxunuşda  təqdim etdi. Sənədlə  bağlı ətraflı məlumat verən  komitə  sədri bildirdi ki, burada peşə hazırlığının səmərəliliyinin artırılması və rəqabətqabiliyyətli ixtisaslı kadrların hazırlanması məqsədilə peşə təhsili sahəsində dövlət siyasətinin prinsipləri, peşə təhsili və təlimi sisteminin təşkilati-hüquqi və iqtisadi əsasları müəyyən edilir. Qanunun hazırlanmasında məqsəd peşə təhsili sahəsində vətəndaşların Konstitusiya ilə nəzərdə tutulmuş təhsil hüququnun təmin olunmasından, peşə təhsili prosesi iştirakçılarının hüquqlarını və vəzifələrini müəyyən etməkdən, onlar arasında münasibətlərin tənzimlənməsindən və təşkilati-hüquqi bazanın yaradılmasından ibarətdir.
Sənəddə Azərbaycanın təhsil sistemində peşə təhsilinin yeri müəyyənləşib, bu təhsili alanlara müəyyən güzəştlər nəzərdə tutulub. Qanun layihəsində  peşə təhsili ilə orta ixtisas təhsilinin inteqrasiyası əsas götürülüb. Komitə  sədri  sənəddə  nəzərdə  tutulan  yenilikləri də şərh etdi.  Layihəyə əsasən, peşə təhsili müəssisələrinin məzunlarına növbəti təhsil pilləsinə keçid zamanı üstünlük verilir. Bundan əlavə, ali məktəbə daxil olmaq istəyənlərə həqiqi hərbi xidmətdən möhlət hüququ verilir. Bu məktəbləri bitirənlərə həm də sahibkarlıq fəaliyyəti ilə bağlı xüsusi imtiyazlar təqdim olunur. Qanun layihəsində peşə təhsili müəssisələrinə birdəfəlik, müddətsiz lisenziya verilməsi, Peşə Təhsilinin İnkişafı Fondunun yaradılması ilə bağlı müddəalar da əksini  tapır. Bildirildi ki, 5 fəsil, 26 maddədən ibarət sənəd təhsil və elm vasitəsilə ölkənin gələcək tərəqqisini və rifahını yüksəltməyə xidmət  edəcək. Ətraflı  müzakirələrdən sonra sənədə konseptual  baxımdan müsbət  münasibət bildirildi.
Bununla  da  Milli Məclis  bugünkü  işini baş  çatdırdı.

Milli Məclisin
Mətbuat  xidməti