Aprelin 21-də Milli Məclisin  növbəti plenar iclası  keçirildi.
İclası açan Milli Məclisin Sədri Oqtay Əsədov dedi: “Aprelin 11-də ölkəmizin həyatında olduqca önəmli hadisə baş verdi. Demokratik və şəffaf şəraitdə keçirilmiş, azad  və ədalətli prezident seçkilərində İlham Əliyevin yenidən Prezident seçilməsi dövlətimizin başçısının xalqımız qarşısındakı əvəzsiz xidmətlərinə verilən yüksək qiymətin və sonsuz inamın ifadəsidir.”
Parlament sədri Milli Məclis adından Prezident İlham Əliyevi təbrik etdi, dövlət başçısına qarşıdakı  illər ərzində fəaliyyətində uğurlar arzuladı. Spiker  bildirdi ki, Prezident İlham Əliyevin andiçmə mərasimini Milli Məclisdə keçirməsi dövlətimizin başçısının parlamentə verdiyi dəyərin və hörmətin göstəricisidir.
Oqtay Əsədovun təklifi ilə Milli Məclis adından Prezident İlham Əliyevə təbrik məktubunun göndərilməsi qərara alındı.
Sonra  Milli Məclis Sədri bildirdi ki, bugünkü iclasın gündəliyinə bir məsələ daxildir. Bu, “Novruz İsmayıl oğlu  Məmmədovun Azərbaycan Respublikasının Baş  naziri  vəzifəsinə  təyin edilməsinə  razılıq  verilməsi  haqqında” məsələdir.  Spiker  ölkə  başçısının bununla əlaqədar təqdimat məktubunu oxudu.
Millət  vəkilləri Səməd Seyidov, Siyavuş Novruzov, İsa  Həbibbəyli  çıxış edərək  namizədliyi  irəli  sürülən Novruz Məmmədovu yüksək  peşəkarlıq səviyyəsinə, intellektual savada malik, beynəlxalq  münasibətləri  və ölkə  başçısının yürütdüyü  daxili  və xarici  siyasəti  dərindən mənimsəmiş bir  insan kimi  dəyərləndirdilər.  Qeyd  olundu ki, o, 22 ildən artıqdır ki, Prezident Administrasiyasında məsul  vəzifələrdə çalışır. Hər zaman ölkə maraqlarını beynəlxalq aləmdə müdafiə edib. Dövlətimiz əleyhinə aparılan, həqiqətə uyğun olmayan məlumatlara, yazılara tutarlı cavablar verib. Millət vəkilləri Novruz  Məmmədovun  namizədliyini dəstəklədilər, ona gələcək  fəaliyyətində uğurlar  arzuladılar.
 Səsvermədən sonra namizədliyinə parlament  tərəfindən razılıq  verilən  Novruz Məmmədov  çıxış  edərək  dedi: “Mənə belə bir etimad göstərdiyi üçün cənab Prezidentə minnətdarlığımı bildirirəm. Bu, çox şərəfli bir fəaliyyət sahəsidir. Mənə göstərilən bu etimad Azərbaycan Prezidenti tərəfindən üzərimə çox böyük məsuliyyət, qarşıma çox böyük vəzifələr qoyur.
Azərbaycan bu gün dünyada öz xüsusi mövqeyi, yeri olan dövlətdir. Ölkəmiz ən mürəkkəb geosiyasi regionda yerləşir.  Dünyanın müxtəlif  ölkələrində  siyasi  gərginlik yaşanır. Amma belə böhranlı bir  mühitdə Azərbaycanda  siyasi sabitlikdir. Hər bir  sahədə iqtisadi dirçəliş, tərəqqi  yaşanır. Azərbaycan ən müxtəlif  sahələrdə - siyasətdə, enerji, idman, mədəniyyət, multikulturalizm sahələrində qlobal layihələrin təşəbbüskarı  və fəal iştirakçısıdır. Hazırda  dünyanın heç bir  ölkəsi  Azərbaycanla  rəqabətə  davam gətirə bilmir. Bunu qoruyub saxlamaq, bu inkişafı daha da sürətləndirmək lazımdır. Mənim də hər  zamankı kimi bundan  sonrakı  fəaliyyətimdə əsas  prinsiplər  bu inkişafa  və sabitliyə  xidmət  olacaq.
Mən eyni  zamanda  Milli Məclisin üzvlərinə də mənə göstərdikləri yüksək etimada görə təşəkkür edirəm. Əminəm ki, gələcəkdə yüksək səviyyədə əməkdaşlıq quracağıq və birlikdə bu dövlətə daha inamla xidmət etməyə davam edəcəyik. Mən çalışacağam ki, üzərimə qoyulan bu vəzifəni Azərbaycanın dövlət strukturları ilə sıx əməkdaşlıq şəraitində, ümummilli lider Heydər Əliyevin yoluna daha inamla bağlanaraq davam etdirim. Ölkəmizin davamlı inkişafı üçün əlimdən gələni edim.”
Milli Məclisin Sədri Oqtay Əsədov sonda bir  daha  Novruz  Məmmədovu  təbrik etdi, ona  gələcək  fəaliyyətində uğurlar  arzuladı.
Bununla  da Milli Məclis öz işini başa çatdırdı.

Milli Məclisin
Mətbuat  xidməti