Mayın 25-də Milli Məclisin Hüquq siyasəti və  dövlət  quruculuğu, Gənclər  və idman komitələrinin birgə  iclası  keçirildi. Əli  Hüseynlinin  sədrliyi ilə keçirilən iclasda  əvvəlcə  deputatlar “Normativ hüquqi aktlar haqqında” qanuna dəyişikliklər  edilməsi  barədə məsələni  müzakirə  etdilər.
Əli Hüseynli bildirdi ki, bir müddət əvvəl vitse-spiker Valeh Ələsgərovun rəhbərlik etdiyi İşçi Qrupu tərəfindən yaradılan və parlament tərəfindən qəbul edilən “Ələt azad iqtisadi zonası haqqında” qanunla bağlı təxminən 50-yə yaxın qanuna dəyişiklik etmək zərurəti yaranıb. Sənədin  qəbulu ilə əlaqədar “Normativ hüquqi aktlar haqqında” qanuna yeni bir maddə əlavə edilməsi təklif edilir.  Millət vəkilləri Qüdrət Həsənquliyev,  Rəfael Cəbrayılov, Tahir  Kərimli, Çingiz Qənizadə, Elşən Musayev çıxış edərək sənədlə  əlaqədar  fikirlərini  bildirdilər,  təkliflərini səsləndirdilər.
 İclasda  Gənclər  və  idman  komitəsi sədrinin müavini Ülvi  Quliyev “Bədən tərbiyəsi və idman haqqında”, “İdmanda dopinq vasitələrindən və üsullarından istifadəyə qarşı mübarizə haqqında” qanunlara təklif  edilən dəyişiklikləri  təqdim etdi.  Qeyd  olundu ki, hər iki qanuna  təklif edilən  dəyişikliklər eyni  xarakterlidir. “İdmanda dopinq vasitələrindən və üsullarından istifadəyə qarşı mübarizə haqqında” qanunun 7-ci maddəsinə əlavə edilən yeni bəndə görə, Azəraycan Milli Dopinq  Agentliyinə yeni  səlahiyyətlər verilir. Bu  dəyişikliyə əsasən idmanda dopinqdən istifadənin qarşısının alınması, habelə qadağan olunan dopinq vasitələrinin qanunsuz dövriyyəsində iştirak edən şəxslər barədə məlumat almaq üçün müvafiq icra hakimiyyəti orqanları ilə əməkdaşlıq etmək, o cümlədən məlumat mübadiləsini həyata keçirmək mümkün olacaq.
Sonra  Hüquq  siyasəti  və  dövlət  quruculuğu  komitəsinin üzvləri “Yol hərəkəti haqqında” qanuna əlavə və dəyişikliklərə baxdılar. Komitə sədri Əli  Hüseynli vurğuladı ki, layihə Azərbaycan Prezidentinin  qanunvericilik təşəbbüsü  qaydasında irəli sürülüb. Layihəyə əsasən, qanunun 33-cü (Nəqliyyat vasitələrini idarəetmə hüququ) maddəsinə edilən əlavəyə görə, “A”, “B” və “C” kateqoriyaları ilə yanaşı “B1” və “C1” altkateqoriyaları da müəyyənləşdirilir. Bu altkateqoriyaya aid olan nəqliyyat vasitələrini idarəetmə hüququ 18 yaşdan etibarən verilir.
İclasda “Azərbaycan Prokurorluğunun  100 iliyi (1918-2018)” yubiley medalının  təsis  edilməsi  ilə əlaqədar “Azərbaycan  Respublikasının orden və medallarının  təsis  edilməsi  haqqında  qanuna  dəyişiklik  də məqsədəuyğun hesab  edildi.
Sonra  komitə üzvləri “Azərbaycanda  dövlət  daktiloskopik və genom qeydiyyatı haqqında” qanun layihəsinə və “Dövlət  qulluğu  haqqında” qanunda  texniki  xarakterli  dəyişikliklərə baxdılar.
Layihələrin Milli Məclisin plenar iclasına tövsiyə olunması qərar  alındı.

Milli Məclisin
Mətbuat  xidməti